1O loo faapea ona fetalai mai o Ieova i le ua faauuina e ia, o Kuresa, o le ua ou taofia lona lima taumatau, ia faatoilaloina nuu i ona luma, ou te tatalaina foi sulugatiti o tupu; e tatalaina i ona luma o puipui vae lua; e le punitia foi faitotoa.
2O a‘u lava, ou te savali atu i ou luma, ma ou faalauleleiina mea maupuepue; ou te nutininii i puipui ‘apa memea; ou te gauia foi faamau uamea.
3Ou te foai atu foi ia te oe oloa o loo i le pogisa, ma oloa lilo o loo i mea nanā; ina ia e iloa o a‘u lava o Ieova, o lē valaau i lou lava igoa, o le Atua o Isaraelu.
4Ona o la‘u auauna o Iakopo, ma Isaraelu le na a‘u filifilia, o le mea lea ua ou valaauina ai oe i lou lava igoa; ua ou ta‘ua lou igoa, a o e lei iloa a‘u.
5O a‘u o Ieova, a e leai lava se tasi; e leai se Atua, na o a‘u lava; ua ou fusia oe, a o e lei iloa a‘u;
6ina ia latou iloa, e afua mai i le mea e alu ae ai le la, e oo i le mea e alu ifo ai, e leai se tasi na o a‘u; o a‘u o Ieova, a e leai lava se tasi;
7o a‘u lē faia le malamalama, ma faatupuina le pouliuli; o lē faia le manuia, ma faatupuina le mala; o a‘u o Ieova, o lē faia ia mea uma.
8Toulu mai ia, o oe le lagi i luga; o ao foi, ia faamaligi mai le amiotonu; ia faamaga mai le laueleele, ma ia fua mai le olataga ma le amiotonu, ia faatupuina faatasi; o a‘u o Ieova, ua ou faia lea mea.
9Oi talofa i le ua finau ma le na faia o ia, o le ta‘ega ipu i ta‘ega ipu o le eleele. Pe fai atu ea le omea i le na te gaosia, O le a ea e te faia? pe fai atu lau galuega, Ua leai ni ona lima?
10Oi talofa i le na te fai atu i lona tamā, O le a ea ua e fanaua? pe fai atu i le fafine, O le a ea ua e fanau mai?
11O loo faapea ona fetalai mai o Ieova, le Paia o Isaraelu, ma le na faia o ia, Fesili mai ia ia te au i mea o le a tutupu, fai mai ia te au i o‘u atalii, ma le galuega a o‘u lima;
12o a‘u lava, na ou faia le lalolagi, ma a‘u faia tagata o i ai; o a‘u, o o‘u lava lima na fofola ai le lagi, ma a‘u pule i ‘au uma o i ai.
13O a‘u lava, ua ou faaosoina mai o ia i le amiotonu; ou te faalauleleia foi ona ala uma; o ia na te faatuina la‘u faiaai, ma tuuina mai o‘u tagata sa tāfea latou te o; e le ona o le taui, po o se mea alofa, ua fetalai mai ai Ieova o ‘au.
14O loo faapea ona fetalai mai o Ieova, O le oa o Aikupito, ma mea faatau a Aitiope atoa ma Sepa, o tagata tino eese, latou te o ane ia te oe, e fai foi i latou mou tagata; latou te mulimuli atu ia te oe, latou te o ane ma maea uamea, latou te ifo atu ia te oe, ma latou ole atu ia te oe, e faapea, Ua na o oe ua i ai le Atua, a e leai se tasi, ua leai se tasi Atua.
15E moni, o oe lava le Atua e faaliloina oe e oe, le Atua o Isaraelu, le Faaola.
16Ua mamā i latou, ua masiasi lava o i latou uma; ua latou o faatasi ina ua masiasi, o tufuga ia o e fai tupua.
17A e faaolaina Isaraelu e Ieova, o le olataga e faavavau lava; tou te le mamā, tou te le masiasi foi e faavavau faavavau lava.
18Auā o loo faapea ona fetalai mai o Ieova, o le na faia le lagi; o ia lava o le Atua; o le tufuga o le na faia le lalolagi; o ia na faatumauina; na ia le faia fua, na ia faia ina ia āina, o a‘u o Ieova, a e leai se tasi.
19Ou te lei tautala faalilolilo i se mea pogisa o le lalolagi; ou te lei fai atu i le fanau a Iakopo, Ia outou saili fua mai ia te au; o a‘u o Ieova, o lē tautala ma le faamaoni, o lē faaali atu mea tonu.
20Ia faapotopotoina, ma ia o mai outou, ia faalatalata faatasi mai lava, o outou e ua sao mai nuu ese; latou te le iloa o e tauave le laau o lo latou tupua ua ta, ma latou tatalo i le atua na te le mafaia ona faaola.
21Faaali mai ia, ma ia outou faalatalata mai; ia filifili faatasi foi i latou. O ai ea ua na faailoa mai lenei mea mai anamua, ua faaalia mai talu anamua? E le o a‘u ea o Ieova? e leai se tasi atua, ua na o a‘u lava; o le Atua amiotonu, i le ma le Faaola; e leai se tasi na o a‘u.
22Liliu mai ia ia te au, tou te ola ai, o outou tuluiga uma o le lalolagi; auā o a‘u o le Atua, a e leai lava se tasi.
23Ua ou tauto ia te au lava, ua mavae atu le upu i lo‘u gutu e faamaoni, e le toe foi mai lava, E tootuli mai ia te au o tulivae uma lava, e tauto mai laulaufaiva uma lava;
24e fai mai se tasi, Ua na o Ieova ua ou maua ai le amiotonu ma le malosi; e sau o ia ia te ia; a e mamā i latou uma o e ua ita ia te ia.
25O Ieova e ta‘uamiotonuina ai ma mitamita ai le fanau uma a Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
