TEUTERONOME, 19 - Samoan Old Version Bible

O LE MATAUPU XIX.O aai e sosola i ai e ua fasioti tagata; o le sala a le molimau pepelo.

1A Faaumatia e Ieova lou Atua o nuu ua foaiina mai o lo latou laueleele e Ieova lou Atua, pe a e fai ai mou, ma e nofo i o latou aai ma o latou fale;

2ona e vavaeeseina lea o aai e tolu mo oe, i lou laueleele ua foaiina mai e Ieova lou Atua ia te oe e fai mou.

3Ia e teuteu se ala mo oe, ma ia e vaetoluina itu o lou laueleele, e foaiina mou tofi e Ieova lou Atua, ina ia sosola i ai o i latou uma o e fasioti tagata.

4O le upu foi lenei i le fasioti tagata, e sola i ai, e ola ai o ia; o le na te fasioti i lē la te tuaoi ma le le iloa, e lei muai ita foi ia te ia;

5a ua la o ma lē la te tuaoi i le vao e ta laau, ua ta ifo le tai lona lima e ta ai le laau i le mătau, ona mole atu ai lea o le uamea ai le ‘au, ua lavea ai lē la te tuaoi, ua oti ai o ia; o ia lava na te sola i se tasi o ia aai, e ola ai;

6ina ne‘i tuliloaina le fasioti tagata e le na te taui ma sui le toto, a o tiga lona loto, ma maua atu ia te ia, auā ua mamao le ala, ona fasioti ai lea ia te ia; a e le tatau ia te ia le oti, auā e lei muai ita o ia ia te ia.

7O le mea lea ou te fai atu ai ia te oe, e faapea atu, Ia e vavaeeseina mo oe o aai e tolu.

8Afai foi e faalauteleina e Ieova lou Atua lou laueleele, e faapei ona ia tauto i ou tamā; ma foaiina mai ia te oe le laueleele uma lava ua na fetalaia mai e avatu i ou tamā;

9afai e te anaana e fai o nei poloaiga uma, ou te fai atu ai ia te oe i le aso nei, ia alofa atu ia Ieova lou Atua ma savali i ona ala i aso uma lava; ona e toe faaopoopo lea mo oe o aai e tolu, i na aai e tolu;

10Ina ne‘i faamaligiina le toto o le ua le sala i lou laueleele ua foaiina mai e Ieova lou Atua ia te oe e fai mou tofi, ina ne‘i ia te oe le sala ona o le loto.

11A e afai e ita se tagata i lē la te tuaoi, ma lamalama ia te ia, ma tulai atu, ma fasi ia te ia ia oti, ona sola lea o ia i se tasi o ia aai;

12ona aauina atu lea nisi e toeaina o lona aai e aamiina atu ai o ia, ma tuuina atu o ia i le pule a le na te tauia ma sui le toto, ia oti ai o ia.

13Aua ne‘i e alofa ia te ia, a ia e tuueseina le sala o le toto o le ua le sala i Isaraelu, e te lelei ai.

14Aua e te sii le tuaoi o lē lua te tuaoi, o le tuaoi sa faia e na mua i lou fanua o le a fai mou tofi i le nuu e foaiina e Ieova lou Atua ia te oe e fai mou.

15Aua ne‘i tulai atu se molimau e toatasi e molimau i se amioletonu a se tagata, po o se agasala, i agasala uma lava e agasala ai o ia; a o mau a e molimau e toalua, po o mau a e molimau e toatolu e faamaoni ai le mea.

16Afai e tulai atu se molimau faasaua e molimau ai se amio leaga a se tagata;

17ona tutū ai lea o ia tagata e toalua ua i ai le finauga, i luma o Ieova, i luma o le au faitaulaga ma faamasino, e i ai i ia ona po;

18ona matuā suesue lea e faamasino; faauta foi, afai o le molimau o le molimau pepelo ia, ua na tala pepelo i lona uso;

19ona outou faia lea ia te ia, e pei ona manatu o ia, e fai i lona uso; ona e tuueseina ai lea o le leaga ai ia te oe.

20Ona faalogo ai lea, ma matatau ai nisi uma lava, ma latou le toe faia se mea leaga faapea i lou nuu.

21Aua ne‘i e alofa ia te ia; a ia sui atu le ola i le ola, o le mata i le mata, o le nifo i le nifo, o le lima i le lima, ma le vae i le vae.