1O lenei foi, ua ia te outou le au faitaulaga lenei poloaiga.
2Afai tou te le faalogo mai, afai foi tou te le mafaufau ina ia aumaia le viiga i lo‘u igoa, ua fetalai mai ai Ieova o ‘au, ona ou auina atu ai lea o le faafanoga ia te outou, ma ou faafanoina mea tou te manuia ai; a ua ou faafanoina lava; auā na outou le mafaufau i ai.
3Faauta, ou te aoai atu i le fua saito ona o outou; ou te palasi foi le otaota o manu i o outou mata, o le otaota o taulaga o a outou tausamiga, e aveesea foi outou faatasi ma lea mea.
4Tou te iloa ai, ua ou avatu lenei poloaiga ia te outou; auā sa ia Levi la‘u feagaiga, ua fetalai mai ai Ieova o ‘au.
5Sa ia te ia la‘u feagaiga o i ai le ola ma le manuia; na a‘u avatu ia mea ia te ia ona o lona mata‘u na mata‘u ai o ia ia te au; ua ia matuā mata‘u i lo‘u igoa.
6O le mataupu o le faamaoni sa i lona gutu lea; na le iloa foi se mea le tonu i ona laugutu; na savavali faatasi ma a‘u i le amio filemu ma le amio sa‘o; na ia faaliliuina foi ē toatele nai le amioletonu.
7Auā o laugutu o le faitaulaga e tausia ai le poto, latou te sailia foi le tulafono ai lona gutu; auā o le sāvali o ia a Ieova o ‘au.
8A o outou, ua outou o ese i le ala, ma outou faatausuai i e toatele i le tulafono; ua leaga ia te outou le feagaiga a Levi, na fetalai mai ai Ieova o ‘au.
9O a‘u foi, ua ou tuuina atu outou ia inosia ma ta‘ufaatauvaaina outou e le nuu uma, e pei ona outou le tausi i o‘u ala, ma outou faailogaina tagata i le tulafono.
10E le ua toatasi ea le Tamā o i tatou uma lava. E le faia ea i tatou e le Atua e toatasi? Pe se a le mea ua tatou faa‘ole‘ole ai le tasi i le tasi i lo tatou soli o le feagaiga a o tatou tamā?
11Ua faa‘ole‘ole Iuta, ua faia foi i Isaraelu ma Ierusalema le mea e inosia; auā ua solia e Iuta le mea ua paia ia Ieova, o le mea ua ia alofaina; ua ia fai avā foi i le afafine o le atua ese.
12E vavaeeseina e Ieova le tagata ua faia lena mea, o le ua mataala, ma le ua tali atu ai fale ie o Iakopo; atoa ma le ua avatu le taulaga ia Ieova o ‘au.
13Ua atu lua ona faia e outou o lenei mea, o loo liloia ai le fata faitaulaga o Ieova i loimata, o le tagi, ma le auega; o le mea lea ua le toe silafia ai la outou taulaga, e le talileleia foi mai o outou lima.
14A ua outou fai mai, Aisea foi? Auā o Ieova, o ia ua fai ma molimau ia te oe ma lau avā sa e fai a o ē taulealea, o le ua e faa‘ole‘ole i ai; a o ia sa lua mafuta, o le avā foi o ia o lau feagaiga.
15Na ia le faia ea le toatasi? A ua ia te ia foi ona toe o le agaga. Se a foi ua toatasi ai? Ina ia saili le fanau amio Atua; o lenei, ia faaeteete outou i o outou loto, ina ne‘i faa‘ole‘ole se tasi i lana avā na fai a o taulealea.
16Auā ou te ‘ino‘ino i le alei, ua fetalai mai ai Ieova le Atua o Isaraelu; auā ua ufiufi e ia lona ofu i le faasaua, ua fetalai mai ai Ieova o ‘au; o le mea lea ia outou faaeteete ai i o outou loto, a e aua tou te faa‘ole‘ole.
17Ua outou faatiga ia Ieova i a outou upu; a ua outou fai mai, Ua matou faatiga ia te ia i ni a? Ua faatiga ia te ia ina ua outou fai ane. O i latou uma o e fai mea leaga, e lelei i latou i luma o Ieova, ua fiafia foi o ia ia i latou; pe faapea ane outou, O ifea le Atua, o lē faamasino?
Who We AreWhat We EelieveWhat We Do
2025 by iamachristian.org,Inc All rights reserved.
