TANIELU, 2 - Samoan Old Version Bible

O LE MATAUPU II.O le miti a Nepukanesa.

1Ua lua tausaga o le nofoaiga a Nepukanesa, ona fai ai lea o miti a Nepukanesa, ua atuatuvale ai lona finagalo, ua le iloa e ia sina moe.

2Ona fai atu lea o le tupu e aami i taulāitu, ma vaafaatau, ma e fai togafiti faataulāitu, atoa ma le au Kaletaia, e faailoa mai i le tupu ana miti; ona latou o mai ai lea ma tutū i luma o le tupu.

3Ona fai atu lea o le tupu ia te i latou, Ua fai la‘u miti, ua atuatuvale ai lo‘u loto i le fia iloa le miti.

4Ona faapea mai ai lea o le au Kaletaia i le tupu i le upu Arama, Le tupu e, ia soifua oe e faavavau. Ia e fetalaia mai le faalepo i au auauna, ona matou faaali atu ai lea o le uiga.

5Ua tali atu le tupu, ua faapea atu i le au Kaletaia, Ua mavae atu ia te au le mea; afai tou te le faailoa mai ia te au le miti ma lona uiga, o le a vaevaeniniiina outou, e fai foi o outou fale ma faatăfuna.

6A e afai tou te faailoa mai le miti ma lona uiga, tou te maua mai ia te au o mea alofa, ma le taui, atoa ma le mamalu tele; o lenei, ia outou faailoa mai ia te au le miti ma lona uiga.

7Ua toe tali mai i latou, ua faapea mai, Ina fetalai mai ia le tupu i ana auauna le faalepo, ona matou faailoa atu ai lea o lona uiga.

8Ua tali atu le tupu, ua faapea atu, Ua ou iloa lava tou te faatuatuai, auā ua outou iloa ua mavae atu ia te au le mea.

9A e afai tou te le faailoa mai ia te au le miti, e tasi lava le tulafono ia te outou; auā ua outou saunia upu pepelo ma le faa‘ole‘ole e fai mai ia te au, seia faatuatuai; o lenei, ina outou ta‘u mai ia ia te au le miti, ona ou iloa ai lea ua outou mafaia ona faailoa mai ia te au lona uiga.

10Ona tali mai ai lea o le au Kaletaia i le tupu, ua faapea mai, E leai se tagata i le lalolagi na te mafaia ona faailoa mai le mea a le tupu; o le mea lea e leai ai se tupu, po o se alii, po o se faipule ua ia fetalaia mai se mea faapena i se taulāitu, po o se vaafaatau, po o se Kaletaia.

11O le mea foi ua fetalai mai ai le tupu, e faigata; e leai lava se tasi na te mafaia ona faailoa atu i le tupu, na o atua lava, latou te le mau faatasi ma tagata.

12O le mea lava lea na ita ai, ma matuā lili ai le tupu, ua fai atu foi ia faaumatia le au popoto uma o i Papelonia.

13Ona oo atu ai lea o le poloaiga ia fasiotia le au popoto; ona latou saili ai lea ia Tanielu ma ana uo ia fasiotia.

14Ona tali atu lea o Tanielu ma le faautauta ma le poto ia Arioka le pule i le ‘au e faafeao i le tupu, o le na alu atu e fasioti i le au popoto o i Papelonia;

15ua tautala atu ia, ua faapea atu ia Arioka, le ua i ai le pule mai le tupu, Pe se a le mea ua tele vave ai le poloaiga a le tupu? Ona faailoa lea o le mea e Arioka ia Tanielu.

16Ona ulufale atu ai lea o Tanielu, ma faatoga atu i le tupu, se‘i faatuatuai, ona faailoa ai lea o le uiga i le tupu.

17Ona alu atu ai lea o Tanielu i lona fale, ma na faailoa atu le mea ia Hanania, ma Mesaelu, ma Asaria, o ana uo,

18ina ia latou faatoga atu ia alofa mai le Atua o le lagi i lenei mea ua lilo, ia le faaumatia Tanielu ma ana uo faatasi ma le au popoto uma o i Papelonia.

19Ona faaali mai ai lea i le faaaliga i le po ia Tanielu o le mea sa lilo; ona faamanū ai lea o Tanielu i le Atua o le lagi.

20Ua fai atu Tanielu, ua faapea atu, Ia viia le suafa o le Atua e faavavau, e faavavau lava; auā e ona le poto ma le mana.

21O ia foi na te liua tausaga ma tau; e aveeseina e ia o tupu, e tofia foi e ia o tupu; e foaiina mai e ia le poto i e o popoto, ma le malamalama i e o iloa mafaufau.

22O ia na te faaalia mai mea loloto ma mea ua lilo; ua na silafia le mea o loo o i le pouliuli, o le malamalama foi la te mau faatasi ma ia.

23Ou te faamanū ma vivii atu ia te oe, le Atua o o‘u tamā, o le ua foaiina mai ia te au le poto ma le malosi; ua e faailoaina mai nei foi ia te au le mea sa matou aioi atu ai ia te oe; auā ua e faailoa mai ia te i matou le mea a le tupu.

24Ona ulufale atu ai lea o Tanielu ia Arioka, le na tofia e le tupu e faaumatia le au popoto o i Papelonia; ua alu atu ia ma faapea atu ia te ia, Aua le faaumatia le au popoto o i Papelonia; ta o ma oe i luma o le tupu, ona ou faailoa ai lea o le uiga i le tupu.

25Ona faataalise lea ona ulu atu o Arioka ma Tanielu i luma o le tupu, ua na faapea atu ia te ia, Ua ou maua le tagata o le tafeaga o Iuta na te faailoa atu le uiga i le tupu.

26Ona fai mai lea o le tupu, ua faapea mai ia Tanielu o le ua igoa ia Peletisara, Ua e mafaia ea ona faailoa mai ia te au le miti na a‘u iloa, atoa ma lona uiga?

27Ua tali atu Tanielu i luma o le tupu, ua faapea atu, E le mafai i e popoto, ma vaafaatau, ma taulāitu, ma e o popoto i fetu, ona faaali atu i le tupu o le mea a le tupu ua lilo na ia fetalai atu ai.

28A o i ai le Atua i le lagi, o le na te faaalia mea ua lilo, ma faailoa mai ia Nepukanesa le tupu o mea e oo mai i aso amuli. Sa faapea lau faalepo ma le mea na e silafia i lou tofaga.

29O oe, le tupu e, sa tutupu ou manatu i luga o lou tofaga i mea e oo mai i aso amuli. O le na te faaali mai mea ua lilo ua ia faailoa mai ia te oe o mea o le a oo mai.

30O a‘u foi, e lei faaalia mai ia te au lenei mea sa lilo ona o se poto ua ia te au e sili i tagata ola uma, na o lenei, ona ia faailoa i le tupu le uiga, ma ia e silafia manatunatu o lou finagalo.

31O oe, le tupu e, na e silafia, faauta foi o le tasi tupua tele; o lenei tupua tele sa maeu lona matagofie, na tu i ou luma, sa matautia foi lona tino mai.

32O le ulu o lenei tupua, o le auro lelei lea; o lona fatafata ma ona lima, o le ario ia; o lona manava ma ona ogavae o le ‘apa memea ia.

33O ona vae, e uamea ia, o ona tapuvae o uamea isi mea, a o omea isi mea.

34Na e silasila ua tofia le maa a e lei tofia i lima, na lavea ai le tupua i ona tapuvae na fai i uamea ma omea, ua nutililii ai ia mea.

35Ona nutililii faatasiina ai lea o le uamea, o le omea, o le ‘apa memea, o le ario, atoa ma le auro, ua pei o le aputi i le mea e soli ai saito, ua lelea i le matagi, ua le maua lava se mea latou te i ai; a o le maa na lavea ai le tupua ua avea lea ma mauga tele, ua tumu ai le lalolagi uma.

36O le faalepo lena, o le a matou ta‘uina atu foi i le tupu lona uiga.

37Le tupu e, o oe o le tupu o tupu; auā ua foaiina mai ia te oe e le Atua o le lagi le malo, ma le malosi, ma le mamalu, ma le viiga;

38ua na avatu foi ia te oe mea uma e mau ai tagata, ma manu o le vao, ma manu felelei, ua tuuina atu ia mea uma i lau pule; o le ulu auro o oe lava lea.

39A mavae atu oe, ona tu lea o le tasi malo, e le tusa ma oe; ma le tasi o lona tolu foi o malo, o le ‘apa memea lea, e pule foi lea i le lalolagi uma.

40O lona fa foi o malo e malosi ia pei o le uamea; auā e nutililii ma tu‘imomomo mea uma i le uamea, e pei o le uamea ona tu‘imomomo o ia mea uma e faapea lea malo ona nutililii ma tu‘imomomo.

41E vaevaeina foi le malo, auā na e silafia tapuvae ma tamatamai vae o uamea isi mea, a o isi mea o omea a le fai ipu omea; a e peitai e i ai lava ia te ia le malosi o le uamea, auā na e silafia le uamea ua filogia ma le omea a le fai ipu.

42O tamatamai vae foi o uamea isi mea a o omea isi mea, e faapea lava le malo, e malosi nisi mea a e vaivai nisi mea.

43Na e silafia le uamea ua fefiloi ma le omea a le fai ipu, e faapea foi ona filogia o i latou ma le fanau a tagata; a e latou te le pipii le tasi i le tasi, e pei ona le filogia o le uamea ma le omea.

44O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tu‘imomomoina ma faaumatia ia malo uma lava, a o ia e tumau lava e faavavau;

45e pei ona e silafia na tofia le maa i le mauga, a e lei tofia i lima, ma na tu‘imomomoina le uamea, le ‘apa memea, le omea, le ario, atoa ma le auro. O mea ia ua faailoa mai ai e le Atua silisili i le tupu o mea e oo mai amuli; e moni lava le li‘a, e faamaoni foi lona uiga.

46Ona faapaū fao ai lea o Nepukanesa le tupu, ua ifo ia Tanielu, ua ia fai atu latou te avatu ia te ia se taulaga atoa ma mea manogi.

47Ona fai atu lea o le tupu ia Tanielu, ua faapea atu, E moni, o lo outou Atua o le Atua o atua ia, ma le Alii o tupu, o lē faaali foi i mea ua lilo, auā ua e mafaia ona faaali o lenei mea sa lilo.

48Ona avatu ai lea e le tupu o le mamalu tele ia Tanielu, ua na foai atu foi ia te ia mea alofa e tele ma le sili, na ia tofia foi o ia e pule i le itu malo uma o Papelonia, ia sili foi o ia i e pule i le au popoto uma o Papelonia.

49Ua faatoga atu Tanielu i le tupu, ona ia tofia lea o Sataraka, o Mesako, ma Apeteniko latou te pule i sauniga a le itu malo o Papelonia; a o Tanielu, sa nofo o ia i le faitotoa o le tupu.