1Ua oo mai foi le afioga a Ieova ia te au, ua faapea mai,
2Le atalii e o le tagata, ia e fai atu i le alii o Turo, Ua faapea ona fetalai mai o le Alii o Ieova, Ua faamaualuga lou loto, ma ua e fai mai, O a‘u o le atua, ua ou nofo i le nofoa o le atua i le sami; ua e faatusa foi lou loto i le finagalo o le Atua, a o le tagata lava oe, e le o le Atua.
3Faauta, ua sili lou poto i lo Tanielu; e leai foi se mea lilo e lilo ia te oe.
4O lou poto ma lou faautauta ua e maua ai oloa; ua e maua auro ma ario i au mea e teu ai oloa.
5O lou poto ina tele, ma lou faatauina o mea ua e faateleina ai au oloa, ma ua faamaualugaina lou loto i au oloa.
6O le mea lea o loo faapea ona fetalai mai ai o le Alii o Ieova, Ua e faatusa lou loto i le finagalo o le Atua;
7faauta, o le mea lea ou te au mai ai tagata ese ia te oe, o e ua matautia i nuu; latou te to ae foi a latou pelu ia leaga ai le matagofie o lou poto, latou te faaleagaina lou matagofie.
8Latou te ave ifo oe i le lua, e te oti oe e pei ona oti o e ua fasia i totonu o le sami.
9E te fai mai pea ea i luma o lē fasioti ia te oe, O a‘u o le atua? a o le tagata lava oe i le lima o lē fasi ia te oe, a e le o le Atua.
10E te oti e pei ona oti o e lē peritomeina i lima o tagata ese; auā o a‘u nei ua ou fai atu ai, o loo fetalai mai ai le Alii o Ieova.
11Ua oo mai foi le afioga a Ieova ia te au, ua faapea mai,
12Le atalii e o le tagata, ia e sauni atu se pese e aualofa a‘i i le tupu o Turo, ma fai atu ia te ia, O loo faapea ona fetalai mai o le Alii o Ieova, O oe na, ua e faamau faailogaina le atoatoa; ua tumu oe i le poto, ua atoatoa foi lou matagofie.
13Sa i Etena oe i le faatoaga a le Atua, na liloia oe i maa tāua uma, o le salikea, ma le topasi, ma le ialoma, ma le tasesa, ma le soama, ma le iasepi, ma le safaira, ma le nofeka, ma le pereketa, atoa ma auro; na fai au topa ma au fagufagu; na saunia ia i le aso na faia ai oe.
14O oe o le kerupi ua faauuina, o lē faamalumalu; na ou tuuina oe, sa e i luga o le mauga paia o le Atua; sa e fealualuai i le va o maa o le afi.
15Na atoatoa ona lelei o au sauniga talu le aso na faia oe, ua oo i le aso na iloa ai lau amio leaga.
16O lou faatauina o oa ina tele ua faatumuina ai oe i le saua, ma ua e agasala; o le mea lea ou te faaleagaina ai oe, ia te‘a ese i le mauga o le Atua; ou te faaumatia oe le kerupi faamalumalu nai le va o maa o le afi.
17Na faamaualugaina lou loto i lou matagofie; ua e faamaumau lou poto ma lou matagofie; ou te lafoina oe i lalo i le eleele; ou te tuuina atu oe i luma o tupu ina ia latou vaavaai ia te oe.
18O au amio leaga ina tele, ma le pepelo i lou faatauina o mea, ua e faaleagaina au mea paia, o le mea lea ou te faatupuina ai se afi ai totonu ia te oe, e faaumatia ai oe, ou te avea oe ma lefulefu i le fogāeleele i luma o i latou atoa o e vaavaai ia te oe.
19O nuu uma e iloa oe e fememeai i latou uma ona o oe; e avea foi oe ma mea e ala ai le mata‘u e le toe ai lava oe e faavavau.
20Ua oo mai foi le afioga a Ieova ia te au, ua faapea mai,
21Le atalii e o le tagata, ia e faasaga i Saitonu, ma vavalo atu i ai;
22ma e fai atu, O loo faapea ona fetalai mai o le Alii o Ieova; Faauta, Saitonu e, ou te fai oe mo‘u fili; e viia foi a‘u i totonu ia te oe; latou te iloa foi o a‘u lava o Ieova pe a uma ona ou faaoo sala ia te ia, ma ua faapaiaina o a‘u i totonu ia te ia.
23Auā ou te auina atu ia te ia le faamai ma le toto i ona ala; o e ua manunua e oti i latou i totonu ia te ia i le pelu e faasaga mai i itu uma; latou te iloa ai o a‘u lava o Ieova.
24E le toe ai i le aiga o Isaraelu se laau talatala e tiga ai, po o se laau matuitui e ogotia ai mai ia te i latou uma o e vagavagai ia te i latou, o e ‘ino‘ino ia te i latou; latou te iloa ai foi o a‘u lava o le Alii o Ieova.
25Ua faapea ona fetalai mai o le Alii o Ieova, A ou faapotopotoina le aiga o Isaraelu ai nuu o loo faataapeapeina ai i latou, ma faapaiaina a‘u ia te i latou i luma o nuu ese; ona latou nonofo ai lea i lo latou laueleele na ou foai atu ai i la‘u auauna o Iakopo.
26Latou te nonofo ai foi ma le filemu, latou te fai fale, latou te fai tovine foi, ma latou nonofo ma le filemu, pe a uma ona ou faaoo sala ia te i latou uma o e ‘ino‘ino ia te i latou i itu uma; ona latou iloa ai lea o a‘u lava o Ieova lo latou Atua.
Who We AreWhat We EelieveWhat We Do
2025 by iamachristian.org,Inc All rights reserved.
