1Ua uma le taalili vale, ona aami lea e Paulo o le au soo, ma faamāvae atu ia te i latou, ona alu lea o ia ua aga atu i Maketonia.
2Ua tuanai e ia ia nuu, ua uma foi ona apoapoai atu ia te i latou i upu e tele, ona oo lea o ia i Eleni.
3Ua tolu ai ona masina; ua taupulepule foi Iutaia ia te ia, ina a folau atu o ia i Suria; ona loto lea o ia e toe foi ma ui ane i Maketonia.
4O lana au malaga e o ma ia i Asia, o Sopata le Perea, o Aritako ma Sekuno, o Tesalonia ia; ma Kaio le Teipe, ma Timoteo; i le ma Tuiko ma Tofimo, o Asia ia.
5Na muamua atu i latou nei, ma faatali mai ia te i matou i Teroa.
6Ua mavae foi aso o areto e le faafefeteina, ona matou folau atu lea nai Filipi, ua oo ia te i latou i le po lima i Teroa; e po fitu o matou o nonofo ai.
7O le uluai aso o le vaisapati, ua faapotopotoina ai le au soo e tofitofi le areto, ua lauga atu Paulo ia te i latou, o le a alu o ia i le taeao; ua faalevaleva foi e ia lana lauga ua oo i le tulua o po.
8Ua tele foi lamepa i le afeafe aupitoaluga ua faapotopoto ai i latou.
9Sa nofo foi le tasi taulealea, o Eutiko le igoa, i le faamalama, ua maua e le moe gase; ua loa foi le lauga a Paulo, ua oo lava ia te ia le moe, ona paū ifo lea o ia mai luga i le tolu o pae o le fale, ua sii ae foi o ia ua oti.
10Ona alu ifo lea o Paulo, ua faō i luga ia te ia, ua fusi foi ia te ia, ma fai atu, Soia le fetagisi, auā o loo ia te ia lona ola.
11Ua toe alu ae foi o ia i luga, ua tofitofi le areto, ma ua ‘ai, ma ua talatala leleva ua oo ina ao, ona alu lea o ia.
12Ua au mai foi e i latou le tama ua ola, ua matuā faaolioliteleina ai i latou.
13Ua matou muamua foi i le vaa, ua matou folau atu i Aso, a matou talia mai ai Paulo; auā na faapea ona saunia e ia, a ui a uta o ia.
14Ua fetaliai foi o ia ma i matou i Aso, ona matou talia lea o ia, ona oo lea i Metulene.
15Ua toe folau atu ai, ua oo i matou i le taeao i gatai o Kioi; ona matou oo atu lea i le tasi aso i Samo; ua nonofo i matou i Tokulio, ona oo lea o i matou i le isi aso i Meleto.
16Auā ua manatu Paulo e folau loa e le afe i Efeso, ina ne‘i faalevaleva o lona nofo i Asia; auā o loo faavave o ia, pe mafai ona oo i Ierusalema i le aso Penetekoso.
17Ua aauina atu foi e ia nisi nai Meleto e ō i Efeso, e aami toeaina o le ekalesia.
18Ua oo mai i latou ia te ia, ona fai atu lea o ia ia te i latou, Ua outou iloa, talu le aso na ou faatoa sau ai i Asia, o la‘u amio i tausaga uma ina o ou ia te outou,
19na ou auauna i le Alii ma le loto maulalo lava, ma le maligi tele o loimata, ma faaosoosoga na oo ia te au ona o le taupulepulega a Iutaia;
20ma lo‘u lei natia se mea aoga, ina ne‘i le faailoa atu ma a‘oa‘o atu ia te outou i luma o le nuu, atoa foi ma lea fale ma lea fale,
21ua ou molitino ia Iutaia atoa ma Eleni le salamo i le Atua, ma le faatuatua i lo tatou Alii o Iesu Keriso.
22Faauta foi, ou te alu nei, ua tinoū le loto, i Ierusalema, ou te le iloa se mea e oo mai ia te au i lea mea;
23na o lenei, o loo molitino mai e le Agaga Paia i lea aai ma lea aai, o loo faapea mai, ua faatali mai noanoaga ma puapuaga ia te au.
24A e ou te le manatua se tasi mea, o lo‘u lava ola foi ou te le naunau i ai, se‘i ou faauma lo‘u momo‘e ma le olioli, atoa ma le faiva ua ou maua mai le Alii o Iesu, ou te molitino atu le tala lelei o le alofa tunoa o le Atua.
25Faauta nei foi, o a‘u nei ua ou iloa, e le toe iloa lava o‘u mata e outou uma sa ou fealuai ai, ma tala‘i le malo o le Atua.
26O lea ou te ta‘utino atu ai ia te outou i lenei lava aso, ou te mamā a‘u i le toto o tagata uma.
27Auā ua ou le natia se mea, ina ne‘i le faailoa atu ia te outou le finagalo uma o le Atua.
28O lenei, ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia mona i lona lava toto.
29Auā o a‘u nei, ua ou iloa lenei mea, pe a mavae ona ou alu, e oo mai ia te outou luko saua o e le faasaoina le lafu mamoe.
30E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.
31O le mea lea ia outou mataala ai, ma ia manatu e tolu tausaga ou te lei mapu ai i le po ma le ao i lo‘u apoapoai atu ma loimata i tagata taitoatasi.
32O lenei, le au uso e, ou te tuuina atu outou i le Atua, ma le upu o lona alofa tunoa, o le na te mafaia ona ati ae ia te outou, ma foai atu ia te outou le tofi faatasi ma i latou uma lava e ua faapaiaina.
33Na ou le manao i se ario, po o se auro, po o se ofu o se tasi.
34Ua outou iloa foi, sa auauna mai nei lima i mea e tatou i lo‘u tino, atoa ma e sa ia te au.
35Ua ou faaali atu ia te outou mea uma lava, ia faapea ona outou galulue ia fesoasoani i e ua vaivai e tatau ai, ma ia outou manatu i le afioga a le Alii o Iesu, na fetalai mai e ia, E sili le manuia o le na te foai atu, i le manuia o le na te talia mai.
36Ua mavae atu ia upu, ona tootuli lea o ia, ma tatalo faatasi ma i latou uma.
37Ua fetagisi tele i latou uma lava, ma fusi ia Paulo, ma faafeasogi ia te ia.
38Ua sili lava lo latou tiga i lea upu ua ia fai atu ai, latou te le toe iloa ona mata. Ona momoli lea e i latou ia te ia i le vaa.
Who We AreWhat We EelieveWhat We Do
2025 by iamachristian.org,Inc All rights reserved.
