1O loo faapea ona fetalai mai o Ieova, Faauta, ou te faaosoina le matagi e faaumatia ai Papelonia, atoa foi ma i latou o e nonofo i totonu o e laga mai ia te au.
2Ou te aauina atu i Papelonia o e faasavili saito, latou te faasaviligia o ia, ma matuā sasaaina atu lona nuu; auā latou te tau ma ia i ona itu uma i le aso o le malaia.
3Ia lolo‘u le tagata fanafana u lana aufana, e fana atu ai i le ua lolo‘u mai lana aufana, ma le ua mitamita i lona ofutau uamea; aua foi ne‘i faasaoina ona taulelea; ia matuā faaumatia ana ‘au uma lava.
4E pauu foi e ua fasiotia i le nuu o Kaletaia, ma e ua tu‘ia ua ati e pauu i ona ala.
5Auā e ui lava ina tumu lo latou nuu i le agasala i le Paia o Isaraelu, e le tuua Isaraelu, po o Iuta e lona Atua, o Ieova o ‘au.
6Ina sosola ia outou ai totonu o Papelonia, ia taitasi ma faasaoina lona ola; aua ne‘i fano outou i lana agasala; auā o le tausaga lenei o le taui ma sui a Ieova; na te taui atu ai ia te ia lona taui.
7O Papelonia o le ipu auro lea i le aao o Ieova, ua onā ai le lalolagi uma; ua feinu nuu i lona uaina; o le mea lea ua faavalea ai nuu.
8Ua faafuasei ona paū o Papelonia, ua momomo; ina uio ia outou ona o ia; ina avatu ia ni pulu pasama i lona tiga, atonu e malolo ai o ia.
9Na tatou fofoina Papelonia, a e lei malolo ai o ia; ina tatou tuua ia o ia; ma taitasi ma alu i lona nuu; auā o lana sala ua pai atu i le lagi, ua maualuga e oo i ao.
10Ua faaalia e Ieova la tatou amiotonu; ina o mai ia, se‘i tatou ta‘uta‘u atu i Siona le galuega a Ieova lo tatou Atua.
11Ina faapupulaina ia o u fanafana; ina faatumuina ia o talita; ua faaosoina e Ieova loto o tupu o Metai; auā o lona finagalo e tau ma Papelonia, ia faaumatia ia; auā o le taui ma sui lenei a Ieova, o le taui ma sui lava ona o lona malumalu.
12Ina sii ia i luga o le tagavai i pa o Papelonia, ia faamalosia le leoleoga, ia tofia tagata leoleo, ia tofia ‘au e tanu; auā ua finagalo lava Ieova, ma na faia le mea na ia fetalai mai ai i e o nonofo i Papelonia.
13O oe na le mau i le vai tele, ua tamaoaiga i oloa, ua oo mai lou iuga, le fua o lou matapeapea.
14Ua tauto Ieova o ‘au ia te ia lava, ua faapea, E moni, ou te faatumuina oe i tagata, e pei o le sē aleka; e pa foi la latou alaga ia te oe.
15Na faia e ia le lalolagi i lona mana, na faatumauina e ia le atu laulau i lona poto, na fofolaina foi e ia o le lagi i lona faautauta.
16Ua tŭlei mai lona siufofoga, ona tele ai lea o le vai i le lagi; e avae foi e ia o le ausa mai tuluiga o le lalolagi; e faia e ia le uila atoa ma le ua, e aumaia foi e ia le matagi mai ana mea e teu ai oloa.
17Ua taitasi ma valea tagata uma e leai so latou poto; ua taitasi ma faamaina foi tufuga fai mea uamea, ona o le tupua ua ta; auā o le mea pepelo lana tupua uamea, e leai foi se mānava ia te i latou.
18E faatauvaa ia mea, o le galuega e tauemua; e fano lava i latou i ona po e tauia ai i latou.
19E le pei o ia mea le tofi o Iakopo; auā o ia lava na faia mea uma; o Isaraelu foi o le tootoo o lona tofi lea; o Ieova o ‘au, o lona suafa lea.
20O oe o la‘u uatogi, o le auupega o le taua; o oe ua ou tu‘imomomoina ai nuu; o oe foi ua ou faaumatia ai malo;
21o oe foi ua ou tu‘imomomoina ai le solofanua ma lē tietie ai; o oe foi ua ou tu‘imomomoina ai le kariota ma lē tietie ai;
22o oe foi ua ou tu‘imomomoina ai le tane ma le fafine; o oe foi ua ou tu‘imomomoina ai le toeaina ma le tama itiiti; o oe foi ua ou tu‘imomomoina ai le taulealea ma le taupou;
23o oe foi ua ou tu‘imomomoina ai le leoleo mamoe ma lana lafu; o oe foi ua ou tu‘imomomoina ai le tagata galue fanua ma ana povi e lua; o oe foi ua ou tu‘imomomoina ai ta‘ita‘i ma faipule.
24Ua ou tauia foi i Papelonia, ma i latou uma o e nonofo i Kaletaia, la latou amio leaga uma ua latou faia i Siona i o outou luma, ua fetalai mai ai Ieova.
25Faauta, ou te faia oe mo‘u fili, o loo fetalai mai ai Ieova, o oe na le mauga na te faaumatia; o le faaumatia ai le lalolagi uma; ou te faaloaloa lo‘u lima i luga ia te oe, ma ou fuli ifo ia te oe mai papa, ma ou faia oe ma mauga ua mu.
26Latou te le avea se maa ia te oe e fai ma tulimanu, po o se maa e fai ma faavae; auā e fai oe ma faatafunaga e faavavau, ua fetalai mai ai Ieova.
27Ia outou sii i luga le tagavai i le lalolagi, ia ilia le pu i nuu, ia outou sauniuni nuu e tau ma ia, ia faalaei‘au i malo o Ararata, ma Meni, ma Asekeneso e tau ma ia; ma ia tofia alii e pule i ‘au e tau ma ia; ia o ae foi solofanua e pei o le sē aleka taufulufulu.
28Ia sauniuni nuu e tau ma ia, o tupu o Metai, ma ona ta‘ita‘i, ma ona faipule uma, ma le nuu uma ua ia pule i ai.
29E gatete le laueleele ma le tiga; auā e tumau le pule a Ieova i Papelonia, e fai le nuu o Papelonia ma faatafunaga, e leai se nofo ai.
30Ua tuua le taua e toa o Papelonia, ua latou nonofo i ‘olo; ua mavae lo latou malosi; ua avea i latou ua ni fafine; ua susunuina ana mea e mau ai; ua gauia ona faamau faalava.
31E momo‘e le tagata tele vave e faafetaiai i le tagata tele vave, o lē ave feau foi e faafetaiai i le ave feau, e ta‘u atu i le tupu o Papelonia ua matuā aea lana aai;
32ua maua foi ala, ua faamuina u i le afi, ua atuatuvale tagata tau.
33Auā o loo faapea ona fetalai mai o Ieova o ‘au, le Atua o Isaraelu, O le tama fafine a Papelonia e pei o le mea e soli ai saito o ia i ona po e solia ai; e toe itiiti ane, ona oo ai lea i ona po e selesele ai ia te ia.
34Ua ‘aina a‘u, ua faaumatia e Nepukanesa le tupu o Papelonia, ua faia a‘u e ia ma ipu e le i‘o, ua na foloina a‘u e pei o le tanimo, ua na faatumuina lona manava i a‘u mea faafiafia; ua na tulia lava a‘u.
35E fai ane le ua nofo i Siona, O le sauaina o a‘u ma lo‘u tino ia i luga o Papelonia lea; e fai ane foi Ierusalema, Ia i luga o e nonofo i Kaletaia lo‘u toto.
36O le mea lea o loo faapea ona fetalai mai ai o Ieova, Faauta, ou te faia lau finauga, ou te matuā taui foi ma sui ona o oe; ou te faamateina lona vai, ma faamatutuina lona vaipuna.
37E fai foi Papelonia ma faupuega maa, o le mea e fale ai luko, o le mea foi e ofo ai, ma uisa ai, e leai foi sē nofo ai.
38Latou te fetagisi faatasi e pei o leona taanoa, latou te leo tetele foi e pei o tamai leona.
39Ou te saunia a latou tausamiga a o vevela i latou, ou te faainu foi ia te i latou ia onā, ina ia latou olioli, ma momoe i le moe e faavavau, ma latou le ala mai, ua fetalai mai ai Ieova.
40Ou te aveina ifo i latou e pei o tamai mamoe ia fasia, e pei o mamoe poa foi ma ‘oti poa.
41E! ua aea Sesaka; ua maua le na viia e le lalolagi uma. E! ua avea Papelonia ma mea e ofo ai nuu.
42Ua alu ae le vai i luga o Papelonia; ua ufitia o ia i le tele o ona peau.
43Ua fai ona aai ma faatafunaga, o le fanua naumati, ma le lafulafua; o le nuu e leai se tagata e nofo ai, e le ui ane ai foi se atalii o se tagata.
44Ou te taui atu ia Pele i Papelonia; ou te to ae i lona gutu le mea na ia foloina; e le toe gasolo atu foi ia te ia o nuu; e solo i lalo foi le pa o Papelonia.
45Lo‘u nuu e, ina o ese atu ia i totonu ia te ia, ma ia taitasi ma faasaoina lona ola ai le toasa tele o Ieova.
46Aua ne‘i faavaivai o outou loto, aua ne‘i outou fefefe i le tala e lagona i le nuu; auā e sau le tala i lea tausaga, e mulimuli ane foi le tala i le tasi tausaga, e i ai foi le saua i le nuu, e tauva lea faipule ma lea faipule.
47O le mea lea faauta, e oo mai ai ona po ou te taui atu ai i tupua ua ta a Papelonia; e faamaina lona nuu uma; e pauu foi i totonu ia te ia ona tagata uma ua fasiotia.
48Ona alalaga fiafia ai lea o le lagi, ma le lalolagi, ma mea uma ua i ai, ona o Papelonia; auā e o mai ia te ia tagata faatafuna mai le itu i matu, ua fetalai mai ai Ieova.
49E paū lava Papelonia, outou tagata o Isaraelu ua fasia; e pauu foi faatasi ma Papelonia o tagata ua fasia i nuu uma lava.
50O outou ua sao i le pelu, ina o ia outou, aua le tutū; ia outou manatua Ieova ai le nuu mamao, ia outou manatunatu foi i Ierusalema.
51Ua faamaina i matou, auā ua matou faalogo i le luma; ua ufitia o matou tama i le masiasi; auā ua ulu atu tagata ese i mea paia i le fale o Ieova.
52O le mea lea faauta, e oo mai ai ona po, ua fetalai mai Ieova, ou te taui atu ai i ona tupua ua ta; e feoi foi tagata manunua i lona nuu uma.
53E ui lava ina alu ae o Papelonia i le lagi, e ui lava ina teua foi e ia le ‘olo i le mea maualuga e malosi ai o ia, a e o atu mai ia te au o e faatafuna ia te ia, ua fetalai mai ai Ieova.
54O le leo o le alaga mai Papelonia, ma le olopalaina tele mai le nuu o Kaletaia;
55auā ua faatafunaina Papelonia e Ieova, ma ua faaumatia e ia le leo tele nai ia te ia; ua taalili mai ona galu e pei o le vai e tele, ua vagana mai o latou leo;
56auā ua oo ia te ia, o Papelonia lava, o le na te faatafunaina; ua puea ona tagata totoa, ua gauia a latou aufana; auā o Ieova le Atua o ia e taui atu, e matuā taui atu e ia.
57Ou te faainu ia onā ona alii, ma ona tagata popoto, ma ona ta‘ita‘i, ma ona faipule, ma ona toa; latou te momoe i le moe e faavavau, ma latou le ala mai, ua fetalai mai ai le Tupu, o Ieova o ‘au, o lona suafa lea.
58O loo faapea ona fetalai mai o Ieova o ‘au, E matuā sŏloia i lalo pa o Papelonia lautele e susunuina i le afi ona puipui maualuluga; o nuu e galulue fua i latou, o tagata foi e galulue ma le afi, ma lailoa i latou.
59O le upu na fai atu ai Ieremia le perofeta ia Seraia le atalii o Neria, le atalii o Maaseia, ina ua alu atu o ia faatasi ma Setekaia le tupu o Iuta i Papelonia, i le fa o tausaga o lana nofoaiga. O Seraia foi o le alii filemu ia.
60Na tusia e Ieremia i le tusi e tasi o le malaia uma o le a oo i Papelonia, o ia upu uma ua tusia ia Papelonia.
61Ua fai atu foi Ieremia ia Seraia, A ē oo i Papelonia, ma e vaai, ma faitau i nei upu uma,
62ona e fai atu ai lea, Ieova e, ua e fetalai mai i lenei mea ina ia faaumatia, ina ia leai sē nofo ai, o se tagata po o se manu, a e fai ia ma faatafunaga e faavavau.
63A uma foi ona e faitauina o lenei tusi, ia e nonoa ai se maa, ma lafoina i totonu o Eufirate;
64e te fai atu foi, E faapea ona goto o Papelonia, ma lē toe ea i le malaia ou te faaoo ai i ona luga; e lailoa foi i latou. Ona gata lea o upu a Ieremia.
Who We AreWhat We EelieveWhat We Do
2025 by iamachristian.org,Inc All rights reserved.
