1O le iva o tausaga o lana nofoaiga, o le sefulu o masina, o le aso e sefulu o le masina na sau ai Nepukanesa le tupu o Papelonia, i Ierusalema, o ia ma lana itu taua uma, ua to lauapi, ua latou fai foi ‘olo e vagai a‘i e tau ma ia.
2Na vagaia le aai ua oo i le sefulu ma le tasi o tausaga o le tupu o Setekaia.
3O le aso iva foi o le fa o masina na velavela ai le oge i le aai, ua leai foi se mea e ‘ai mā tagata o le nuu.
4Na lepetia le aai, ona sosola ai lea o ‘au uma i le po, i le ala i le faitotoa i le va o pa e lua, e latalata i le fanua o le tupu, (ua vagaia foi le aai e Kaletaia;) na alu foi le tupu i le ala i le eleele laugatasi.
5Ona tuliloa lea e le itu taua a Kaletaia i le tupu, ua latou maua atu foi ia te ia i le eleele laugatasi o Ieriko; na taapeape foi lana itu taua uma na ia te ia.
6Ona latou pue lea i le tupu, ma avatu ia te ia i le tupu o Papelonia i Ripelu; ona latou faasala ai lea ia te ia.
7Ua latou fasioti foi i atalii o Setekaia, i ona luma; ua faatauaso foi ia Setekaia, ma fusifusi ia te ia i faamau ‘apa memea, ma ave i Papelonia.
8O le lima o masina o le aso fitu o le masina o le tausaga e sefulu ma le iva lea o le tupu o Nepukanesa o le tupu o Papelonia, na sau ai i Ierusalema o Nepusatana lē pule i le ‘au e faafeao, o le auauna a le tupu o Papelonia;
9na ia susunuina le fale o Ieova, ma le fale o le tupu, atoa ma fale uma o Ierusalema; o fale tetele uma foi ua susunuina e ia i le afi.
10Na soloia foi le pa na faataaliolio i Ierusalema e ‘au uma a Kaletaia sa i le alii e pule i le ‘au e faafeao.
11O e na totoe o le nuu sa i ai pea i le aai, ma e na sosola, o e na sosola i le tupu o Papelonia, atoa ma e na totoe o le vao tagata, na tāfea i latou e Nepusatana lē pule i le ‘au e faafeao.
12A ua tuua e le alii e pule i le ‘au e faafeao nisi o e matitiva o le nuu e fai ma teu vine, ma ē galulue i le fanua.
13O pou ‘apa memea foi sa i ai i le fale o Ieova, ma tuugā-taelega, atoa ma le vai ‘apa memea sa i le fale o Ieova, na taei e Kaletaia, ma latou ave le ‘apa memea i Papelonia.
14Na latou ave foi ulo ma suo, ma selelamepa, ma ipu, atoa ma mea ‘apa memea uma lava na latou fai a‘i sauniga.
15Na ave foi e le alii e pule i le ‘au e faafeao salefu, ma ipu; o le auro, o mea na faia i auro, ma le ario o mea na faia i ario.
16O pou e Ina, o le vai e tasi, atoa ma tuugā taelaga na faia e Solomona mo le fale o Ieova; ua le fuatia lava le mamafa o ‘apa memea o na mea uma.
17O le umi o le tasi pou o kupita e sefulu ma le valu, o le kapetala ‘apa memea foi na i ona luga; o le umi o le kapetala e tolu kupita; o le mea faaupega atoa ma rimoni sa i le kapetala e faataaliolio ai, o ‘apa memea uma ia; e faapei o ia mea foi sa i ai i lona lua o pou, atoa ma le mea faaupega.
18Na ave foi e le alii e pule i le ‘au e faafeao o Seraia le ositaulaga sili, ma Sefanaia le ositaulaga e aupito ane ia te ia, atoa ama leoleo faitotoa o toatolu.
19Na ia ave foi nai le aai le tasi auauna sili na tofia e pule i ‘au, ma tagata e toalima o e na iloa fofoga o le tupu, na maua i latou i le aai, ma le alii sili i e tusi ‘au, o le na faapotopoto i tagata o le nuu, atoa ma tagata o le nuu e toaonogafulu sa maua i latou i le aai.
20Na ave foi i latou e Nepusatana lē pule i le au, e faafeao, ma na avatua i le tupu o Papelonia i Ripelu.
21Ona fasia ai lea o i latou e le tupu o Papelonia, ua na fasioti ia te i latou i Ripelu, i le nuu o Amato na tāfea foi Iuta nai lo latou laueleele.
22A o tagata na totoe i le nuu o Iuta e na tuua e Nepukanesa le tupu o Papelonia, na ia tofia Ketalia le atalii o Aikamo, le atalii ia o Safana, e pule ia te i latou.
23Na lagona a alii uma na ave ‘au, o i latou ma o latou tagata, ua tofia Ketalia e le tupu o Papelonia e pule, ona o mai ai lea ia Ketalia i Mesepa, o Isamaeli le atalii o Netanaia, ma Ioanana le atalii o Karea, ma Seraia le atalii o Tanumeta o le Netopa, ma Iaasenaia le atalii o le Maaka, o i latou ma o latou tagata.
24Ona tauto ai lea o Ketalia ia te i latou ma o latou tagata, ua faapea atu foi ia te i latou, Aua ne‘i tou fefefe i auauna ia Kaletaia; nonofo ia i le nuu, ma ia outou auauna i le tupu o Papelonia, ona manuia ai lea o outou.
25A ua oo i le fitu o masina, ona o mai ai lea o Isamaeli le atalii o Netanaia, le atalii ia o Elisama, o le aiga to tino o le tupu, ma tagata e toasefulu faatasi ma ia, ua latou fasi ia Ketalia, ua oti ai o ia atoa ma sa Iutā ma tagata Kaletaia sa ia te ia i Mesepa.
26Ona tutū ai lea i luga o le nuu uma, o tama iti ma e matutua, atoa ma alii na ave ‘au, ua latou o atu i Aikupito, auā ua latou fefefe ia Kaletaia.
27Ua oo i le tolugafulu ma le fitu o tausaga o lo tafeaga a Ioakina le tupu o Iuta, o le sefulu ma le lua foi o masina, o le aso e luafulu ma le fitu o le masina, ona faaeaina ai lea o le ulu o Ioakina le tupu o Iuta ma aumaia o ia ai le fale puipui e Evile-marota le tupu o Papelonia i le tausaga na fai ai o ia ma tupu;
28na ia tautala ma le alofa ia te ia, ma tuu atu foi lona nofoālii ia sili i nofoālii o tupu na ia te ia i Papelonia;
29na ia sui foi ona ofu sa ofu ai i le fale puipui; sa ‘ai foi o ia e le aunoa i ona luma i aso uma o lona ola.
30O lana faaalumaga foi, o le faaalumaga e le aunoa, na tuuina atu ia te ia e le tupu i lea aso ma lea aso, i aso uma o lona ola.
Who We AreWhat We EelieveWhat We Do
2025 by iamachristian.org,Inc All rights reserved.
