1Ona fai atu ai lea o Palaamo ia Palako, Ia e faia iinei mo a‘u o fata faitaulaga e fitu, ma sauniuni mai iinei mo a‘u o povi poa e fitu ma mamoe poa e fitu.
2Ua faia foi e Palako e pei ona fai atu ai a Palaamo; ona osi ai lea e Palako ma Palaamo ua taitasi ai i fata faitaulaga o le povi poa ma le mamoe poa.
3Ona fai atu ai lea o Palaamo ia Palako, Ia e tu latalata ane i lau taulaga mu; a ou alu, atonu e afio mai Ieova ma te fetaiai ma a‘u; o le upu foi na te faaali mai ia te au, ou te ta‘uatua ia te oe. Ona alu ai lea o ia i le mea maualuga.
4Ua afio mai foi le Atua ia Palaamo; ona faapea atu ai lea o ia ia te ia, Ua ou saunia fata faitaulaga e fitu, ma ou osia e taitasi ai i fata faitaulaga o le povi poa ma le mamoe poa.
5Ona tuuina mai lea e Ieova le upu i le gutu o Palaamo, ua faapea mai, Ina foi atu ia ia Palako, ma ia faapea ona e fai atu ai.
6Ona toe foi atu ai lea o ia ia te ia, faauta foi, ua tu o ia e lata ane i lana taulaga mu, o ia ma alii uma o Moapi.
7Ona saunia ai lea e ia o lana faataoto, ua faapea atu, Na amia a‘u e Palako, le tupu o Moapi mai Arama, mai le atu mauga i sasae, ua faapea mai o ia, Ina sau ia, ia e fetuu ia Iakopo mo a‘u; ina sau ia ia e faafano ia Isaraelu.
8Pe faapefea ona ou fetuu i le ua le fetuuina e le Atua? Pe faapefea foi ona ou faafano i le ua le faafanoa e Ieova?
9Auā ou te iloa atu o ia ai tumutumu o papa, ou te vaaia o ia mai mauga; faauta, e nonofo le nuu na o i latou lava; a e le ta‘ufaatasia i latou ma nuu ese.
10O ai ea na te mafaia ona faitau le efuefu o Iakopo, po o le aofai o lona vaega e fa o Isaraelu? Ia oti lava a‘u i le oti o e ua amiotonu; ia tusa foi lo‘u iuga ma lona.
11Ona fai mai ai lea o Palako ia Palaamo, Se a ea lenei mea ua e faia ia te au? na ou amia oe e fetuu i o‘u fili, faauta mai foi, ua e faamanuia atu ai lava.
12Ona tali atu ai lea o ia, ua faapea atu, Ou te le anaana ea e ta‘u atu le upu ua tuuina mai e Ieova i lo‘u gutu?
13Ona fai mai ai lea o Palako ia te ia, Ou te aioi atu lava, ia ta o atu i se tasi mea e te iloa atu ai i latou i lea mea; tau lava o e aupito mai e te iloa, a e te le iloa atu i latou uma; e te fetuu atu foi ia te i latou i lea mea mo a‘u.
14Ona ave ai lea o ia ia te ia i le fanua o Sofima i le tumutumu o Peseka; ua faia foi e ia o fata faitaulaga e fitu; ua ia osia foi o le povi poa ma le mamoe poa ua taitasi ai i fata faitaulaga.
15Ona fai atu ai lea o ia ia Palako, Ia e tu iinei ia lata ane i lau taulaga mu; a o a‘u, ma te fetaiai ma Ieova i ō.
16Ua afio mai foi Ieova ia Palaamo, ma tuu mai le upu i lona gutu, ua faapea mai, Ia e toe foi atu ia Palako, ma ia faapea ona e fai atu.
17Ona alu atu ai lea o ia ia te ia, faauta foi, ua tu o ia e lata ane i lana taulaga mu, sa ia te ia foi o alii o Moapi. Ona fai mai ai lea o Palako ia te ia, Se a ea se fetalaiga mai ia Ieova?
18Ona saunia ai lea e ia o lana faataoto, ua faapea atu, Palako e, ina tulai mai ia, ma faafofoga mai, ia liliu mai ou fofoga ia te au, o oe na le atalii o Seporu.
19E le se tagata le Atua e talapepelo ai o ia, po o se atalii o se tagata e salamo ai o ia; ua fetalai mai o ia, na te le faia ea? Ua fetalai mai foi o ia, na te le faataunuuina ea?
20Faauta, na tuuina mai ia te au e faamanuia atu; ua uma foi ona faamanuia e ia, ou te le maliua.
21Na te le silafia se leaga ia Iakopo; na te le silafia foi se agasala ia Isaraelu; o loo ia te ia Ieova lona Atua, o loo ia te ia le alaga i le tupu.
22Ua uamaia i latou e le Atua ai Aikupito; ua ia te ia e peiseai o le tele vave o le rema.
23Auā e leai se mātemāte ia Iakopo, po o se togafiti faataulāitu ia Isaraelu; o ona po nei e faapea mai ai ia Iakopo atoa ma Isaraelu, Faauta i mea ua faia e le Atua!
24Faauta, e tulai le nuu e pei se leona fafine, e tulai lava ia e pei se leona; e le toe taoto seia na ‘aina le mea ua saeia, ma inumia e ia le toto o e ua fāsia.
25Ona fai mai ai lea o Palako ia Palaamo, Aua lava e te fetuu ia te i latou, aua foi e te faamanuia atu ia te i latou.
26A ua tali atu Palaamo, ua faapea atu ia Palako, Ou te lei fai atu ea ia te oe, ua faapea atu, O mea uma e fetalai mai ai Ieova, o mea ia ou te faia?
27Ona fai mai ai lea o Palako ia Palaamo, Ina sau ia, ta te o ma a‘u i se tasi mea, atonu e tatau i le Atua ona e fetuuina ai o i latou i lea mea mo a‘u.
28Ona aveina ae lea o Palaamo e Palako i le tumutumu o Peoro e fesagai ma le vao.
29Ona fai atu ai lea o Palaamo ia Palako, Ia e faia iinei mo a‘u o fata faitaulaga e fitu, ma sauniuni mai iinei mo a‘u o povi poa e fitu ma mamoe poa e fitu.
30Ona fai ai lea e Palako e pei ona fai atu ai o Palaamo, ua ia osia foi le povi poa ma le mamoe poa, ua taitasi ai i fata faitaulaga.
Who We AreWhat We EelieveWhat We Do
2025 by iamachristian.org,Inc All rights reserved.
