1O le afioga a Ieova na oo atu ia Hosea le atalii o Peri, i ona po o Usia, Iotama, Aasa, ma Esekia, o tupu o Iuta; o ona po foi o Ierepoamo le atalii o Ioasa le tupu o Isaraelu.
2O le amataga o le afioga a Ieova ia Hosea. Ua fetalai mai Ieova ia Hosea, Alu ia oe, ia e fai avā i le fafine talitane, ma ia fai māu le fanau a le faitaaga, auā ua matuā faitaaga lava le nuu, ua o ese ia Ieova.
3Ona alu lea o ia ua fai mana avā o Komeri le afafine o Tipelaima, ua to ai foi o ia, ua fanau mai ai lona atalii.
4Ua fetalai mai foi Ieova ia te ia, Ia e faaigoa ia te ia, o Isereelu; auā e toe itiiti, ona ou taui atu ai lea o le toto o Isereelu i le aiga o Ieu, ou te faaumatia foi le malo o le aiga o Isaraelu.
5O lea aso ou te gauia ai le aufana a Isaraelu i le vanu o Isereelu.
6Ua toe to foi o ia, ua fanau ai le tama teine; ona fetalai mai lea o Ieova ia te ia, Ia e faaigoa ia te ia, o Loruama; auā ou te le toe alofa atu i le aiga o Isaraelu, a e ou te matuā aveesea i latou.
7A o le aiga o Iuta, ou te alofa i ai, ou te faaola ia te i latou ona o Ieova lo latou Atua; ou te le faaola ia te i latou i le aufana, po o le pelu, po o le taua, po o solofanua, po o ‘au e tietie i solofanua.
8Ua ia faate‘a Loruama ma le susu; ona to ai lea o ia, ua fanau mai ai le tama tane.
9Ona faapea mai ai lea a le Atua, Ia e faaigoa ia te ia, o Loama; auā e le so‘u nuu outou, e le so outou Atua foi a‘u.
10A o le faitau aofai o le fanauga a Isaraelu e pei o le oneone o le sami ia, e le mafuatia, e le mafaitaulia; o i le mea foi na faapeaina atu ai ia te i latou, E le so‘u nuu outou, e iu ina faapeaina atu ai ia te i latou, O atalii o le Atua soifua outou.
11Ona faapotopotoina faatasi ai lea o le fanauga a Iuta, atoa ma le fanauga a Isaraelu, latou te tofia foi le ta‘ita‘i e toatasi mo i latou, latou te o ae foi ma le nuu; auā e sili le aso o Isereelu.
Who We AreWhat We EelieveWhat We Do
2025 by iamachristian.org,Inc All rights reserved.
