1O le Atua o atua, o Ieova, ua fetalai mai o ia, ma ua valaau i le lalolagi ai le mea e alu ae ai le la e oo lava i le mea e alu ifo ai.
2O loo pupula mai le Atua mai Siona, o le mea e silisili ese ona matagofie.
3O loo afio mai lo tatou Atua, ua le tuua lona siufofoga; ua maamaai le afi i ona luma; o loo siosiomia foi o ia i le afā tele lava.
4E valaau ia i le lagi i luga, atoa foi ma le lalolagi, i le faamasinoina o lona nuu.
5Ina faapotopoto mai ia ia te au o‘u tagata amio Atua, o e ua osia le feagaiga ma a‘u i le taulaga.
6E ta‘ua foi e le lagi lana amiotonu; auā o le Atua o ia lava le faamasino. Selā.
7Ina faalogologo mai ia lo‘u nuu e, se‘i ou fai atu; Isaraelu e, se‘i ou ta‘utino atu foi i te oe; o ‘au lava o le Atua, o lou Atua lava.
8E le ona o au taulaga ou te aoai atu ai nei ia te oe, po o au taulaga mu, ua i ai i o‘u luma e le aunoa.
9Ou te le avea se povi poa ai lou fale, po o se ‘oti poa ai ou lotoā.
10Auā o ia te au manu uma i le vao matua, o manu e tataa i mauga e afe.
11Ua ou iloa manu felelei uma lava o i atu mauga; o manu tataa foi, o ia te au lava ia.
12Ana ou fia ‘ai, ou te le ta‘u atu ia te oe; auā o ia te au le lalolagi ma mea ua tumu ai.
13Ou te ‘ai ea i tino o povi poa, pe inu i le toto o ‘oti?
14O le viiga, ia e faia lea ma taulaga i le Atua; ia e avatu foi i lē Silisili ese mea na e tauto ai.
15Ia e valaau foi ia te au i le aso e i ai le puapuaga; ou te laveaiina ai oe, ona e vivii mai ai lea ia te au.
16A ua fetalai ane le Atua i le tagata amio leaga, Se a ea le mea ua e tautala ai i a‘u tulafono, ma e ta‘u la‘u feagaiga i lou gutu?
17O oe foi, ua e ‘ino‘ino i le aoaiga, ma ua e lafoaiina a‘u upu i ou tua.
18Ua e iloa atu se gaoi, ona e loto gatasi ai lea ma ia; ua fai foi lou tofi faatasi ma e mulilulua.
19Ua e lafo upu leaga i lou gutu, ua e fatu foi upu faa‘ole‘ole i lou laulaufaiva.
20Ua e nofo ma fai upu i lou uso; ua e fatu fua ni tala i le tama a lou tinā.
21Ua e faia ia mea, a ua ou faalologo lava a‘u; fa te oe ua tutusa lava a‘u ma oe; ou te aoai atu ia te oe, ma laulau atu ia mea i ou luma.
22Ina mafaufau ia i lenei mea, o outou o e faagalogalo i le atua, ina ne‘i ou saeia outou, a e leai se na te laveai.
23O lē faia le viiga ma taulaga, o lē ava lea ia te au; ma le ua mafaufau i lona ala, ou te faailoa atu ia te ia le faaolataga mai le Atua.
Who We AreWhat We EelieveWhat We Do
2025 by iamachristian.org,Inc All rights reserved.
