1E sili ona lelei o le ta‘uleleia i le suāuu lelei; ma le aso e oti ai e sili i le aso e fanau mai ai.
2E sili ona lelei o le alu i le fale o i ai le faanoanoa, i le alu i le fale ua fai ai le tausamiga; auā o le iuga lea o tagata uma; e manatua foi e le tagata ola i lona loto.
3E sili ona lelei o le tiga, i le ‘ata‘ata; auā o le faanoanoa o mata e lelei ai le loto.
4O le loto o le tagata poto ua i le fale o i ai le faanoanoa; a o le loto o e valelea, ua i ai lea i le fale o i ai le olioli.
5E sili ona lelei o le faalogo i le aoaiga a le tagata poto, i le faalogo o se tasi i le pese a e valelea.
6Auā e pei o le talalī o laau talatala i lalo o le ulo, e faapea le ‘ata‘ata o le vale; o le mea faatauvaa foi lea.
7O le saua e faavalea ai lava le tagata poto; o le mea foaifuaina foi e leaga ai le loto.
8E sili ona lelei o le iuga o se mea i lona amataga; e sili ona lelei o le ua onosai i le ua loto faamaualuga.
9Aua le faataalise ona ita o lou loto; auā e tumau le ita i loto o e valelea.
10Aua e te faapea, Se a le mea na sili ai ona lelei o ona po anamua i nei ona po? auā e le o le poto ua e fesili ai i lea mea.
11E lelei le poto e faatasi ma le tofi, e sili ona aoga foi i e o iloa atu le la;
12auā ua fai le poto ma mamalu, ua fai foi tupe ma mamalu; a o le aoga lenei o le poto ua maua, e ola ai e ua i ai.
13Ina manatunatu ia i le galuega a le Atua; auā o ai se na te mafaia ona faasa‘oina o le mea ua faapiopioina e ia?
14Ina fiafia ia i le aso e manuia ai, ia mafaufau foi i le aso e malaia ai; ua tuu feagai e le Atua le tasi i le tasi, ina ia le iloa e le tagata se mea e tupu pe a mavae atu o ia.
15Ua ou iloa nei mea uma i o‘u nei aso faatauvaa; o le tagata amiotonu e oti o ia i lana amiotonu; o le tagata amio leaga foi e ola loa o ia i lana amio leaga.
16Aua e te amiotonu naua, aua foi e te faatele naua lou poto; se a le mea e oti ai oe ia te oe?
17Aua e te amio leaga naua, aua foi e te faavalea; se a le mea e oti ai oe a o lei oo i ou po?
18E lelei ona e taofi i lenei, aua foi e te tuu ese lou lima i lena; auā o le ua mata‘u i le Atua e sao o ia ai na mea uma.
19O le poto e sili ai ona malosi o le ua poto, i faipule e toasefulu ua i le aai.
20E leai lava se tagata amiotonu i le lalolagi, o le na te faia amio lelei, ma le le agasala.
21Aua foi e te manatu i upu uma ua faia; ne‘i e faalogo i lau auauna o fetuu ia te oe;
22auā foi ua iloa lou loto, o oe lava ua atu lasi ona e fetuu i nisi tagata.
23Ua ou tofotofo ma le poto i nei mea uma; na ou faapea ifo, O le a ou poto; a ua mamao lava lea ia te au.
24O le mea ua mamao ma le matuā loloto, o ai se na te mafaia ona iloa?
25Na ou faasaga ma lo‘u loto ia iloa, ma saili, ma suesue i le poto ma le uiga o mea, ia iloa foi le leaga o le valea, ma le amio valea a e valelea;
26ua ou iloa foi e itiiti lava le tiga o le oti, a e tele lava ona o le fafine ua fai lona loto ma mailei ma upega, ma ona lima ma noanoaga; o le ua lelei i luma o le Atua, e sao o ia ia te ia; a o le ua agasala e maua o ia e ia.
27O loo faapea mai le Failauga, Faauta mai, ua ou iloa lenei mea i lo‘u faatatauina o le tasi i le tasi, e iloa ai le mea ua faapea ai;
28o loo saili ai pea lava a‘u, a ua le iloa; o le tane e toatasi o i le toaafe ua ou iloa; a o se fafine o i le toatele faapena ou te lei iloa.
29Faauta, na o lenei lava mea ua ou iloa, na faia e le Atua le tagata e amiotonu, a o i latou ua sailiili i latou i togafiti e tele.
Who We AreWhat We EelieveWhat We Do
2025 by iamachristian.org,Inc All rights reserved.
