TEUTERONOME, 23 - Samoan Old Version Bible

O LE MATAUPU XXIII.O le faatonuina o mea eseese.

1Aua ne‘i alu i le faapotopotoga a Ieova se tagata ua manua ua momomoina ona fuāmanava, po ua vavaeeseina lona aualuma.

2Aua ne‘i alu se tama toifale i le faapotopotoga a Ieova; aua lava ne‘i alu o ia i le faapotopotoga a Ieova e oo lava i le sefulu o augātupulaga.

3Aua ne‘i alu so sa Amorī, po o so sa Moapī i le faapotopotoga a Ieova; e oo lava i le sefulu o augātupulaga, aua ne‘i latou o i le faapotopotoga a Ieova e oo i le faavavau;

4auā na latou le fafetaiai atu ia te outou i le ala ma ni areto ma ni vai, ina o outou o mai mai Aikupito; auā foi na latou faaoloa ia Palaamo le atalii o Peoro, nai Petoru i Mesopotamia, ma te faafano ia te oe.

5A e lei finagalo Ieova lou Atua e faafofoga ia Palaamo; a ua faaliliuina e Ieova lou Atua le faafano e fai ma faamanuia ia te oe, auā na alofa mai Ieova lou Atua ia te oe.

6Aua ne‘i e fai se mea e filemu ai i latou, pe manuia ai i latou i ou aso uma lava e faavavau.

7Aua e te ‘ino‘ino i so sa Etomā, auā o lou uso lea; aua e te ‘ino‘ino i se Aikupito, auā sa fai oe ma tagata ese i lona nuu.

8O atalii e fanau mai ia te i latou i lona tolu o tupulaga e ō i latou i le faapotopotoga a Ieova.

9Pe a o atu ‘au e tau le taua ma e ita mai ia te oe, ia oe, ne‘i e faia se mea leaga.

10Afai o ia te outou se tagata e oo ia te ia le leaga i le po, ia alu ia i tua o le toagālauapi, aua ne‘i toe foi mai o ia i le toagālauapi;

11a oo i le afiafi, ona taele ai lea o ia i le vai; a goto foi le la, ia toe foi mai o ia i le toagālauapi.

12Ia ia te oe foi se mea i tua o le toagālauapi, e te alu atu foi i ai;

13ia ia ie te oe foi sina suo i lau auupega; a ē ui foi i le vao, ia e eli a‘i, ona e liliu lea, ma tanu lou otaota;

14auā o loo savali Ieova lou Atua i totonu o lau toagālauapi, e laveai ia te oe, ma tuuina mai e ua ita ia te oe i ou luma; o le mea lea e faapaiaina ai lau toagālauapi; ne‘i silasila o ia i se mea leaga o ia te oe, ma liliu ese o ia ia te oe.

15Aua e te tuuina atu i lona matai le auauna ua sola mai ia te oe i lona matai;

16e mau o ia ia te oe, i lou nuu, i le mea e filifilia e ia i se tasi o au aai, e lelei ia te ia; aua ne‘i e faasaua ia te ia.

17Aua ne‘i ai se fafine talitane o afafine o Isaraelu; aua foi ne‘i ai se tane faasotoma o atalii o Isaraelu,

18Aua ne‘i e avatu i le fale o Ieova lou Atua le totogi o le fafine talitane, po o le tau o se ulī, e fai ma mea na tauto ai; auā e inosia nei mea e lua e Ieova lou Atua.

19Aua ne‘i e avatu i lou uso se mea e totogi faasili mai ai; o le totogi faasili mai i ario, po o le totogi faasili mai i mea e ‘ai, po o le totogi faasili mai i nisi mea uma e totogi faasili mai ai;

20e te avatu mea e totogi faasili mai ai i le tagata ese; a o lou uso, aua e te avatu i ai ni mea e totogi faasili mai ai; ina ia faamanuia mai ai Ieova lou Atua ia te oe i mea uma lava e te faia i ou lima, i le nuu e te alu i ai e fai mou.

21Afai e te tauto i se tautoga ia Ieova lou Atua, aua ne‘i e faatuai ona avatu ai; auā e matuā sueina atu ai ia te oe e Ieova lou Atua; e fai lea ma agasala ia te oe.

22A e afai e te le tauto lava, e le se agasala lea ia te oe.

23O le upu ua mavae atu i lou gutu ia e anaana i ai ma e faia, o le taulaga e loto ina fai, e tusa ma lau tautoga ia Ieova lou Atua, ua folafolaina e oe.

24Pe a e alu i le tovine o lē lua te tuaoi, e te ‘ai vine faitalia oe seia e ma‘ona; a e aua e te fafao nisi i lau ato.

25Pe a e alu i le saito o loo tu o lē lua te tuaoi, e te tau mai ona fua i lou lima; a e aua e te selesele i lau selesaito le saito o loo tu o lē lua te tuaoi.