1O lona tausaga e tasi le sefulu ma le lua, o lona masina e tasi le sefulu ma le lua, o le aso muamua o le masina, na oo mai ai le afioga a Ieova ia te au, ua faapea mai,
2Le atalii e o le tagata, ia e sauni atu se pese e aualofa a‘i ia Farao le tupu o Aikupito, ma ia e faapea atu ia te ia, Ua tusa oe ma se tamai leona i nuu, ua e tusa foi ma le tanimo i le vai; ua e oso ae i ou vaitafe, ma faagaepuina le vai i ou vae, ma solia o latou vaitafe.
3Ua faapea ona fetalai mai o le Alii o Ieova, O le mea lea ou te folasia ai la‘u upega i luga ia te oe, o i ai le aofia o nuu e tele, latou te aveina ae oe i la‘u upega.
4Ona ou tuua lea o oe i le nuu, ou te lafoaiina oe i le fogaeleele, ou te faanonofoina manu felelei uma ia te oe, ma ou fafaga ia maoona ia te oe manu tataa o le lalolagi uma.
5Ou te tuuina lou tino i luga o mauga, ma ou faatumuina vanu i lou maualuga.
6Ou te faasūsūina i lou toto le nuu ua e aau ai, e oo lava i mauga; e tutumu foi vaitafe ia te oe.
7Ou te ufiufitia le lagi pe a ou tineia oe, ou te faapogisaina foi ona fetu; ou te ufitia le la i le ao, e le susulu mai foi le masina.
8O malamalama pupula uma o le lagi, ou te faapouliuligia ia i luga ia te oe, ou te tuuina atu foi le pouliuli i lou nuu, o loo fetalai mai ai le Alii o Ieova.
9Ou te faatigaina foi loto o nuu e tele pe a ou faaooina atu lou malaia i nuu ese, o nuu eseese foi ua e le iloa.
10Ou te faafememeaiina nuu e tele ona o oe, e matuā fefefe lava o latou tupu ona o oe, pe a ou feliuliuai la‘u pelu i o latou luma; e taitasi i latou ma saga gatete pea ona o lona lava ola, i le aso o lou paū.
11Auā ua faapea ona fetalai mai o le Alii o Ieova, E oo atu le pelu a le tupu o Papelonia ia te oe.
12Ou te fasiotia le vao tagata ua ia te oe i pelu a e malolosi, o e ua matautia i nuu, o i latou uma; latou te faaumatia le mamalu o Aikupito; e fano foi lona vao tagata.
13Ou te faaumatia foi ana manu uma ai tafatafa o vai tetele; e le toe faagaepuina lava e vae o tagata, e le faagaepuina foi e atigivae o manu.
14Ona ou faatoaina ai lea o latou vai ia manino, ma ou faatafeina o latou vaitafe faapei o le suāuu, o loo fetalai mai ai le Alii o Ieova.
15A ou faatafunaina le nuu o Aikupito, ma ua aunoa le nuu ma mea sa tumu ai, a ou fasiotia i latou uma ua nonofo ai, ona latou iloa ai lea o a‘u lava o Ieova.
16O le pese a aualofa a‘i lea latou te pepese ai ona o ia; o tama fafine a nuu ese latou te lagi le pese e aualofa a‘i ona o ia; latou te lagi le pese e aualofa a‘i ona o ia, ona o Aikupito, ma lona vao tagata uma, o loo fetalai mai ai le Alii o Ieova.
17O lona tausaga e tasi le sefulu ma le lua, o lona aso e tasi le sefulu ma le lima o le masina, na oo mai ai le afioga a Ieova ia te au, ua faapea mai,
18Le atalii e o le tagata, ia e aue ona o le vao tagata o Aikupito, ma lafo ia te i latou o ia atoa ma tama fafine o nuu malolosi i mea maulalo o le lalolagi, faatasi ma ē ō ifo i le lua.
19Ua sili ea oe ia te ai i le matagofie? Alu ifo ia; ia e taatia faatasi ma e ua le peritomeina.
20Latou te pauu faatasi ma e ua fasia i le pelu; ua tuuina atu o ia i le pelu; ina tosoina atu o ia atoa ma lona vao tagata uma.
21O e ua sili ona malolosi i le au malolosi latou te tautala mai totonu o seoli ia te ia, atoa ma e fesoasoani ia te ia; ua o ifo i latou, ua taatia ua le peritomeina, ua fasia i le pelu.
22O i ai Asuria ma ona tagata uma; ua vagavagai ona tuugamau ia te ia; ua fasia uma i latou, ua oti i le pelu.
23O loo i ai ona tuugamau i itu o le lua, o loo vagavagai foi ona tagata i lona tuugamau; ua fasia i latou uma, ua oti i le pelu, o e na faatupuina le mata‘u i le nuu o tagata ola.
24O i ai Elama ma lona vao tagata uma o loo vagavagai i lona tuugamau, ua fasia uma i latou, ua oti i le pelu, o e ua o ifo ua le peritomeina i mea maulalo i le eleele; o e na faatupuina lo latou matautia i le nuu o tagata ola; a ua oo ia te i latou lo latou mā e faatasi ma e ua o ifo i le lua.
25Ua fai e i latou lona moega faatasi ma e ua fasia, atoa ma lona vao tagata uma; ua vagavagai ona tuugamau ia te ia; o i latou uma e le peritomeina, ua fasia i le pelu; auā sa i ai lo latou matautia i le nuu o tagata ola; ua oo foi ia te i latou lo latou mā e faatasi ma ē ō ifo i le lua; ua tuuina atu o ia faatasi ma e ua fasia.
26O i ai Meseko, ma Tupalu, ma lona vao tagata uma; o loo vagavagai o latou tuugamau ia te ia; o i latou uma e le peritomeina, ua fasia i le pelu; auā sa i ai lo latou matautia i le nuu o tagata ola.
27Latou te le taatitia ea faatasi ma e malolosi e ua pauu ua le peritomeina, o e ua o ifo i seoli ma a latou auupega? ua avane a latou pelu e aluga a‘i, a ua i ai a latou agasala i luga o latou ivi; auā sa i ai lo latou matautia i e malolosi i le nuu o tagata ola.
28E gāugau lava oe e faatasi ma e ua le peritomeina, e te taatia faatasi ma e ua fasia i le pelu.
29E i ai Etoma, ma ona tupu, ma ona alii sili uma o e ua tuuina ma lo latou malosi faatasi ma e ua fasia i le pelu; latou te taatitia faatasi ma e ua le peritomeina, atoa ma i latou o e ō ifo i le lua.
30O i ai foi alii o le itu i matu, o i latou uma, atoa ma Saitonu uma, o e ua o ifo faatasi ma e ua fasia; o lo latou matautia ona o lo latou malosi ua latou masiasi ai; ua latou taatitia foi ua le peritomeina, faatasi ma e ua fasia i le pelu, ua oo foi ia te i latou lo latou mā faatasi ma e ua o ifo i le lua.
31E iloa i latou e Farao, ona faamafanafanaina ai lea o ia i lona vao tagata uma o e ua fasia i le pelu, o Farao ma lana itu taua uma, o loo fetalai mai ai le Alii o Ieova.
32Auā ua ou faaooina atu lo‘u matautia i le nuu o tagata ola; e faataatiaina o ia faatasi ma e ua le peritomeina, e faatasi ma e ua fasia i le pelu, o Farao atoa ma lona vao tagata uma, ua fetalai mai ai le Alii o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
