1O i talofa i e pule i pulega leaga, o e tusi foi i tusi faasaua; ina ia liliu ese le finauga a e ua matitiva,
2ma ia faoa le faamasinoga o e matitiva i lo‘u nuu; ina ia fai mā latou vete mea a fafine ua oti a latou tane, ma latou faoa mea a e ua aumatuā.
3Se a foi se mea tou te faia i le aso e faaoo ai le sala, ma le malaia e oo mai i le mea mamao? Tou te sosola ea ia te ai e maua ai se fesoasoani? O ifea foi tou te tuu ai lo outou mamalu?
4Ina ia le punonou faatasi i latou ma le tafeaga, ma pauu faatasi ma e ua fāsia. E ui lava i ia mea uma, e le liliu ese lona toasa, a e faaloaloa pea lona aao.
5Oi talofa ia Asuria, o le tootoo o lo‘u ita; o le sasa foi i o latou lima, o lo‘u ita tele lea.
6Ou te auina o ia i le nuu faalematau, ou te tuu atu se poloaiga ia te ia i le nuu o loo i ai lo‘u ita; ina ia avea ai le vete, ia avea foi mea e faoa, ma ia fai ai ma mea e solia, e pei o le palapala i le ala.
7A o ia e le faapea lona manatu, e le faapea foi le taofi o lona loto; auā o lona loto ia fasiotia, ma ia faaumatia o nuu e tele.
8Auā e faapea ane o ia, E le ua fai ma tupu ea o alii uma ua ia te au?
9e le tutusa ea Kaleno ma Karekimisa? e le tutusa ea Amato ma Arepa? e le tutusa ea Samaria ma Tamaseko?
10E pei ona maua e lo‘u lima o malo o tupua, o latou tupua ua ta, e sili ia i tupua o Ierusalema ma Samaria;
11e pei ona ou faia i Samaria ma ona tupua, e le faapea ea ona ou faia i Ierusalema ma ona tupua?
12A faauma e le Alii lana galuega uma i le mauga o Siona ma Ierusalema, ona ou faasala lea i le fua o le loto faamaualuga o le tupu o Asuria, ma le faalialia o ona mata faasiasia.
13Auā o loo faapea ane o ia, O le malosi o lo‘u lima ma lo‘u poto ua ou fai ai ia mea; auā ua ou faautauta lava; ua ou sii tuaoi o nuu, ua ou vetea foi o latou oloa, pei o se toa foi ua ou faatoilaloina e o nonofo ai.
14Ua maua e lo‘u lima oloa o nuu pei o se ofaga, pei o sē faaputu foi i fua o manu ua tuulafoaiina, ua ou faaputuina e a‘u le lalolagi uma; e leai foi se tasi ua sii lona apaau, pe faamaga lona gutu, pe iī.
15E mitamita ea le mătau i le na te taia a‘i? pe faamaualuga atu ea le ‘ili i le na te ilia a‘i? Peiseai e luluina e le tootoo le na te siitia; peiseai e siitia e le sasa o ia ua le se laau.
16O le mea lea e tuuina atu ai e le Alii, o le Alii o ‘au, le tino vale i ona tagata puputa; na te faamuina le mu i lalo o lona matagofie, e pei o le mumū o le afi.
17E avea lava ma afi le Malamalama o Isaraelu, e avea foi ma afi mumū lona Alii Paia; e susunu ai, ma faaumatia ai ona laau talatala ma ona laau tuitui i le aso e tasi.
18E faaumatia ai foi le matagofie o lona vao ma lona fanua lafulemu, o le agaga atoa ma le tino; e vaivai foi o ia pei o le tagata ma‘i.
19O nai laau o lona vao ua totoe e itiiti ia, e mafaia e se tama ona faitauina.
20O lea aso e le toe faalagolago ai e ua totoe o Isaraelu, ma e ua sao o le aiga o Iakopo i le na te taia i latou; a e latou te faalagolago faamaoni ia Ieova le Paia o Isaraelu.
21E toe foi mai e ua totoe, o e ua totoe o Iakopo, i le Atua malosi.
22Auā e ui lava ina tutusa o lou nuu o Isaraelu ma le oneone i le sami, a e foi mai ia te ia o e ua totoe. O le faaumatia o i latou ua ia pule ai, e lofia lea i le amiotonu.
23Auā o le faaumatia ua pulea, e faia e le Alii o Ieova o ‘au i totonu o le nuu uma.
24O le mea lea o loo faapea ona fetalai mai ai o le Alii o Ieova o ‘au, Lo‘u nuu e, o lē nofo i Siona, aua e te fefe ia Asuria; na te taia oe i le tootoo, e sii foi lana sasa ia te oe, e faapei o Aikupito.
25Auā e toe itiiti lava ona uma ai lea o le ita tele, o lo‘u ita foi e uma pe a faaumatia i latou.
26E sii e Ieova o ‘au le sasa i luga ia te ia, pei o le fasiga o Mitiana i le papa o Oreva; e i ai foi lana sasa i le sami, na te siitia e faapei o Aikupito.
27O lea aso foi e aveeseina ai lana avega i lou fuataua, ma lona amo foi i lou ua; e gausia foi le amo ona o le faauuina.
28Ua oo o ia i Aiata, ua ui ane i Mekerona, ua tuu ana mea i Mekemase.
29Ua latou ui atu i le ala, ua fai Kapa mā latou api; ua gatete Rama; ua sola Kipea o Saulo.
30Ina alaga ia oe le tama fafine a Kali, ia faalogo atu ai o Laisa, Anatota le ua puapuagatia e.
31Ua sola Matemena; ua sosola lava e sa nonofo i Kipima.
32E toe tasi le aso e nofo ai i Nove, ona lui tau atu lea o lona lima i le mauga o le tama fafine a Siona, o le mauga foi o i ai Ierusalema.
33Faauta, o le Alii o Ieova o ‘au, na te vavaeeseina la laau i le malosi tele lava; e tatuuina foi e ua maualuluga ona tutupu, e faamaulaloina foi e ua faamaualuluga.
34Na te tatuuina foi le vao filifili i le uamea, e faapaūina foi Lepanona i le malosi.
Who We AreWhat We EelieveWhat We Do
2025 by iamachristian.org,Inc All rights reserved.
