1Ua oo mai foi le afioga a Ieova ia te au, ua faapea mai,
2Le atalii e o le tagata, ia e vavalo atu i leoleo mamoe o Isaraelu, ina vavalo atu ia, ma e fai atu ia te i latou, o leoleo mamoe lava, Ua faapea ona fetalai mai o le Alii o Ieova, Oi talofa i leoleo mamoe o Isaraelu o e fafaga ia te i latou lava! E le tatau ea i leoleo mamoe ona fagaina o le lafu?
3Ua outou aai le ga‘o, ma oofu i le fulufulu, ua outou fasia e ua pepeti, a ua outou le fafaga i le lafu.
4Ua outou le faamalosia e ua vaivai; ua outou le faamalolo i le ua ma‘i; ua outou le fusia foi le ua gau; o le ua tulia ua outou le toe aumaia, o le ua sē ua outou le sailia; a ua outou pule faamalosi ma faasaua ia te i latou.
5Na faataapeapeina foi i latou ina ua leai se leoleo mamoe; na fai foi i latou ma mea e ‘ai ma manu feai uma o le vao, ina ua faataapeapeina i latou.
6Na sē la‘u lafu i mauga uma, ma mea maualuluga uma; na faataapeapeina foi la‘u lafu i le fogāeleele uma, a e leai se na suesue i ai, e leai foi se na sailia.
7O le mea lea, leoleo mamoe e, ia outou faalogo mai ai i le afioga a Ieova;
8ua fetalai mai le Alii o Ieova, Ou te ola a‘u, na avea lava la‘u lafu ma mea e saeia, na avea foi la‘u lafu ma mea e ‘ai a manu feai uma o le vao, ina ua leai se leoleo mamoe, ua le sueina foi e a‘u leoleo mamoe la‘u lafu, a o leoleo mamoe ua fafaga i latou ia te i latou lava, a e lei fagaina e i latou la‘u lafu;
9o le mea lea, leoleo mamoe e, ia outou faalogo mai ai i le afioga a Ieova;
10ua faapea ona fetalai mai o le Alii o Ieova, Faauta, ou te faia ia leoleo mamoe mo‘u fili; ou te sueina atu foi la‘u lafu ia te i latou, ou te faate‘aina i latou ia le toe fafaga le lafu; o leoleo mamoe foi latou te le toe fafaga lava ia te i latou; auā ou te laveaiina la‘u lafu i o latou gutu, ina ia le fai i latou ma mea e ‘ai mā latou.
11Auā ua faapea ona fetalai mai o le Alii o Ieova, Faauta, o a‘u, o a‘u lava, ou te sueina la‘u lafu, ou te matuā suesue lava i ai.
12E pei o le leoleo mamoe ona sueina o lana lafu i le aso o i ai o ia i lana lafu ua taapeape; e faapea ona ou sueina la‘u lafu, ma ou laveaiina i latou ai mea uma ua salalau ai i latou i le aso faamalumalu ma le pogisa.
13Ou te aumaia foi i latou nai nuu, ma ou faapotopotoina i latou mai nuu eseese; ou te aumaia i latou i lo latou lava laueleele, ma fagaina i latou i mauga o Isaraelu, i tafatafa o vaitafe, ma mea uma e āina o le nuu.
14Ou te fafaga ia te i latou i le taaga lelei, e i ai o latou lotoā i mauga maualuluga o Isaraelu; latou te taooto ai i le lotoā lelei, o le taaga lelei foi e aai ai i latou i mauga o Isaraelu.
15Ou te fagaina la‘u lafu, o a‘u foi e taooto ai i latou, o loo fetalai mai ai le Alii o Ieova.
16Ou te sailia foi le ua sē, ou te aumaia le ua tulia, ou te fusia le ua gau, ou te faamalosia le ua vaivai; a o le ua peti ma le ua malosi ou te faaumatia ia, ou te fagaina i latou i le faamasinoga.
17Ua faapea ona fetalai mai o le Alii o Ieova, O outou o la‘u lafu e, faauta, ou te faamasino i manu ma manu, o mamoe poa ma ‘oti poa.
18O le mea māmā ea ia te outou ina ua le na ona outou aai i taaga lelei, a ua outou solia i o outou vae o mea ua totoe i taaga; ua le na ona outou inu foi i vai manino, a ua outou faagaepu i o outou vae o vai ua totoe?
19O la‘u lafu foi ua latou aai mea ua solia i o outou vae; ma latou inu le vai ua faagaepuina i o outou vae.
20O le mea lea ua faapea ona fetalai mai ai o le Alii o Ieova ia te i latou, Faauta, o a‘u, o a‘u lava, ou te faamasino i manu pepeti ma manu paeee.
21Ua outou tūlei i o outou itu, ma outou alagalima, ma ua outou suatia e ua vaivai uma i o outou nifo, ua oo ina outou faataapeapeina i latou i tuāpa.
22O le mea lea ou te faaolaina ai la‘u lafu, e le toe fai lava i latou ma mea e saeia; ou te faamasino foi i lea manu ma lea manu.
23Ou te faatuina foi le leoleo mamoe e tasi ia te i latou, na te fagaina i latou, o la‘u auauna o Tavita; o ia na te fagaina i latou, e fai foi o ia ma leoleo mamoe ia te i latou;
24o a‘u nei foi o Ieova e fai a‘u mo latou Atua, o la‘u auauna foi o Tavita e fai o ia ma alii sili ia te i latou; o a‘u o Ieova ua ou fai atu ai.
25Ou te osia foi ma i latou le feagaiga e manuia ai, ou te faaumatia manu feai i le nuu; latou te nonofo fifilemu ai i le vao, ma momoe i le vao matua.
26O i latou ma mea o vagavagai lo‘u mauga ou te avea ia ma mea o manuia ai; ou te faatotō ifo le ua i ona lava po; e i ai uaga e manuia ai.
27E fua mai le laau o le fanua lona fua; e fua mai foi le laueleele lona fua; latou te nonofo filemu foi i lo latou nuu; ona latou iloa ai lea o a‘u lava o Ieova pe a ou gagauina a latou amo, ma ou laveaiina i latou ai lima o e na faapologaina i latou.
28E le toe fai lava i latou ma mea e saeia i nuu ese, e le ‘aina foi i latou e manu feai e tataa; a e latou te nonofo fifilemu, e leai foi se na te faamatau ia te i latou.
29Ou te faatupuina foi mo i latou le faatoaga e ta‘ua, e le toe faaumatia i latou i le fia ‘ai i le nuu, e le toe oo lava ia te i latou le faamasiasiga o nuu ese.
30Ona latou iloa ai lea o a‘u lava o Ieova lo latou Atua, ou te ia te i latou; o i latou foi le aiga o Isaraelu o lo‘u nuu lava i latou, o loo fetalai mai ai le Alii o Ieova.
31O outou foi la‘u lafu, o le lafu o la‘u taaga, o tagata lava outou; o a‘u foi o lo outou Atua, o loo fetalai mai ai le Alii o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
