1Ieova e, ia e laveai mai ia te au ai le tagata amio leaga; leoleo mai ia ia te au ai le tagata faasaua;
2o e mafaufau i mea leaga i o latou loto, ma faatutupu taua i aso uma lava.
3Latou te faamaai i o latou laulaufaiva, e pei o le gata; o i lalo foi o latou laugutu le mea oona a le asipi. Selā.
4Ieova e, ia e tausi mai ia te au ne‘i oo mai lima o le tagata amio leaga; leoleo mai ia ia te au i tagata faasaua o e fia tulei tele mai i o‘u vae.
5O e faamaualuga ua latou natia le mailei mo a‘u, atoa ma matāsele; ua latou fofola le upega i le auala; ua tuu ai mea e mailei a‘i a‘u. Selā.
6Na ou fai atu ia Ieova, O oe lava lo‘u Atua; Ieova e, ia e faafofoga mai i le leo o la‘u aioi atu.
7Ieova e, le Alii, o lo‘u faaolataga malosi, ua fai oe ma talipupuni o lo‘u ulu i le aso e tau ai le taua.
8Ieova e, aua e te avatu mea e manao i ai le tagata amio leaga; aua ne‘i oo lana togafiti, nei faamaualuga i latou. Selā.
9O ulu o e siosioina mai a‘u, e ufitia i latou i le leaga mai o latou lava gutu.
10E pauu malala ola i luga ia i latou; e lafo i latou i le afi, i to maulalo, ina ia le toe tutū mai i latou.
11E le mau i le nuu le tagata fai upu leaga; o le tagata faasaua, e tuliloaina ia e le leaga seia fano.
12Ua ou iloa e faia e Ieova le finauga mo e ua puapuagatia, o le faamasinoga o e ua matitiva.
13E moni, o e maiotonu, e vivii atu i latou i lou suafa; e nonofo i ou luma o e ua sa‘o a latou amio.
Who We AreWhat We EelieveWhat We Do
2025 by iamachristian.org,Inc All rights reserved.
