I. TIMOTEO, 3 - Samoan Old Version Bible

O LE MATAUPU III.O le galuega ma le amioga a epikopo ma tiakono.

1O le upu moni lenei, afai e naunau se tasi i le faiva o le epikopo, e manao o ia i le galuega lelei.

2O lenei, e tatau i le epikopo ia le mata‘uleagaina, o lē faiavā i le fafine e toatasi, o lē mataala, o lē faautauta, o lē amio lelei, o lē alofa i tagata ese, o le na te mafaia ona a‘oa‘o atu.

3E le se inu tele i uaina, e le se fasi tagata, e le manumanu i oloa; a e agamalu, e le se fai finauga, e le se matapeapea i tupe;

4o lē pule lelei i lona lava aiga, o loo ua usiusitai mai ia te ia o lana fanau ma le fifilemu lava.

5(Auā afai e le iloa e se tasi ona pule i lona lava aiga, pe faapefea ona tausia e ia le ekalesia a le Atua?)

6E le se faatoa lotu, ne‘i faafefeteina lona loto, ona paū lea o ia i le faasala a le tiapolo.

7E tatau ona ia logoleleia o ia e i latou o i tuā, ne‘i upuleagaina o ia ma paū i le mailei a le tiapolo.

8O tiakono foi, ia faapea ona faatoeaina i latou, e le faagutugutulua, e le fia inu uaina e tele, e le manumanu i oloa;

9o loo latou taofi i le upu o le faatuatua sa lilo, i le loto fuatia ifo ua mamā.

10A o i latou foi ia muamua ona tofotofoina o i latou, ona latou faia ai lea o le faiva o le tiakono, ina ua le mata‘uleagaina.

11O fafine foi, ia faapea lava ona faamatuāfafine i latou, e le ni faatuaupua, a ia mataala, ia faamaoni i mea uma lava.

12O tiakono, ia taitasi ma lana avā e toatasi, ia pule lelei i la latou fanau ma o latou lava aiga.

13Auā o e ua lelei ona fai o le faiva o le tiakono e fai mo i latou lava le mamalu lelei, ma le faamalosi tele i le faatuatua o loo ia Keriso Iesu.

14Ou te tusi atu ia mea ia te oe, o loo faamoemoe a‘u ou te vave alu atu ia te oe;

15a e afai ou te tuai atu, ia e iloa ai lau amio e tatau i le fale o le Atua, o le ekalesia lea a le Atua soifua, o le pou tu foi lea ma le lagolago o le upu moni.

16Ua leai foi se taofi ese, e sili lava lenei upu lilo i la le amio Atua, Ua faaali mai le Atua i le tino tagata, ua faaalia lana amiotonu e le Agaga, ua vaaia e agelu, ua tala‘iina atu i nuu ese, ua faatuatua i ai o e o i le lalolagi, ua aveina ae i le manuia.