II KORINITO, 6 - Samoan Old Version Bible

O LE MATAUPU VI.O le faamaoni o Paulo i le tala‘iga o le tala lelei.

1O lenei foi, o i matou o faigaluega faatasi ma ia, ua mato aioi atu ia te outou, ina ne‘i talia fua e outou le alofa tunoa o le Atua.

2(Auā ua faapea mai o ia, O le tausaga e talia ai na ou faalogo ai ia te oe, o le aso foi e faaolaina ai na ou fesoasoani ai ia te oe. Faauta, o lenei le tausaga e talileleia mai ai; faauta, o lenei le aso e faaolaina ai.)

3Ua matou le tuuina atu se mea e tasi e tausuai ai, ina ne‘i ta‘uleagaina le galuega;

4a o mea uma lava ua faailoa ai i matou o auauna a le Atua i matou, i le onosai tele, i puapuaga, i malaia, i atuatuvale

5i sasaina, i tuuina i fale puipui, i faaletaupulea, i galuega, i mataala, i anapopogi,

6i le amio mamā, i le poto, i le faapalepale, i le agamalu, i le Agaga Paia, i le alofa moni,

7i le upu moni, i le mana o le Atua, e le auupega o le amiotonu i le itu taumatau atoa ma le itu tauagavale,

8i le viia ma le faaleagaina, i le ta‘uleleia ma le ta‘uleagaina; peiseai o e faasese, a e faamaoni lava;

9peiseai ua le iloa, a ua lāu iloa; peiseai a oti, faauta foi, o loo ola i matou; peiseai ua aoaiina, a e le fasiotia;

10peiseai o faanoanoa, a o loo olioli pea; peiseai o matitiva, a ua matou faatamaoaigaina nisi e le toatele; peiseai e leai sina mea o ia te i matou, a o loo ia te i matou mea uma.

11Outou Korinito e, ua matou matuā tautala atu ia te outou, ua faateleina o matou loto ia te outou.

12E le o i matou ua outou atuatuvale ai, a o outou lava loto ua outou atuatuvale ai.

13(Ou te fai atu ia te outou pei o la‘u fanau,) ia faateleina mai foi o outou loto e taui mai ai.

14Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli?

15Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu?

16Pe faapefea foi ona loto faatasi o le malumalu o le Atua ma tupua? auā o outou le malumalu o le Atua soifua, pei ona fetalai mai o le Atua, Ou te nofo i totonu ia te i latou, ou te savali foi i totonu ia te i latou; e fai a‘u mo latou Atua, e fai foi i latou mo‘u tagata.

17O lea i o mai ai outou nai totonu ia te i latou, ma ia outou vavae mai, ua fetalai mai ai le Alii, aua foi tou te papai atu i se mea leaga; ona ou talia ai lea o outou, e fai foi a‘u mo outou Tamā,

18e fai foi outou mo‘u atalii ma o‘u afafine, ua fetalai mai ai le Alii e ona le malosi uma lava.