1Ua alu atu foi Mose, ma fai atu i upu nei ia Isaraelu uma.
2Ua faapea atu ia te i latou, O o‘u tausaga ua selau ma le luafulu ia i le aso nei; ou te le toe lavā ona ou alu atu ma toe sau; ua fetalai mai foi Ieova ia te au, E te le sopoia atu lenei Ioritana.
3O Ieova lou Atua, o ia na te sopoia atu i ou luma, o ia na te faaumatia ia nuu i ou luma, a e fai ai mou; o Iosua, o ia na te sopoia atu i ou luma, e pei ona fetalai mai ai o Ieova.
4E faia foi o Ieova ia te i latou e pei ona faia e ia ia Sekono ma Oko, o tupu o sa Amorī, ma o laua laueleele, sa faaumatia i laua e ia.
5E tuuina mai foi i latou e Ieova i o outou luma ina ia outou faia ia te i latou e tusa ma poloaiga uma ua ou poloai atu ai ia te outou.
6Ia outou faamalolosi, ma outou loto tetele; aua tou te fefefe, aua foi ne‘i matatau i o latou luma; auā o Ieova lou Atua, lua te o faatasi ma ia; na te le tuuna oe, na te le lafoai ia te oe.
7Ua valaau atu foi Mose ia Iosua, ua na fai atu foi ia te ia i luma o Isaraelu uma, Ia e faamalosi, ma ia e loto tele; auā tou te o ma le nuu nei i le nuu sa tauto ai Ieova i o latou tamā na te foaiina atu ia te i latou; e te tofitofia foi mo i latou.
8O Ieova foi, o ia na te savali i ou luma; lua te faatasi ma ia, na te le tuuna oe, na te le lafoai ia te oe; aua e te fefe, aua foi e te mata‘u.
9Ua tusia foi e Mose lenei tulafono, ona avatu ai lea i le au faitaulaga o le fanauga a Levi, o e tauave le atolaau o le feagaiga a Ieova, atoa foi ma toeaina uma o Isaraelu.
10Ua fai atu foi Mose ia te i latou, ua faapea atu, A uma tausaga e fitu, pe a oo i le faapotopotoga i le tausaga o le faasaolotoga, i le tausamiga o fale apitaga,
11pe a o atu Isaraelu uma ia iloa i latou i luma o Ieova lou Atua i le mea e filifilia e ia, ia e faitau atu ai lenei tulafono i luma o Isaraelu uma lava ia latou faalogo ai.
12Ia e faapotopotoina le nuu, o tane, ma fafine, ma tama iti, atoa ma le tagata ese e ia te oe i au aai, ina ia latou faalogologo ai, ma ia a‘oa‘oina i latou, ma ia latou matatau ia Ieova lo outou Atua, ma latou anaana e fai o upu uma lava o lenei tulafono.
13O a latou fanau foi, e na le iloa, ia latou faalogologo, ma ia a‘oa‘oina i latou ia matatau ia Ieova lo outou Atua, i aso uma lava tou te ola ai i le laueleele tou te sopoia atu ai Ioritana e fai mo outou.
14Ua fetalai mai Ieova ia Mose, Faauta, ua lata mai lou aso e te oti ai; ia e valaau ia Iosua, ma ia oulua tutū mai i le fale fetafai o le faapotopotoga, ina ia ou poloai atu ia te ia. Ona o ai lea o Mose ma Iosua, ua la tutū mai i le fale fetafai o le faapotopotoga.
15Ona faaali mai lea o Ieova i le fale fetafai i le ao faaniutu; ua tu foi le ao faaniutu i le faitotoa o le fale fetafai.
16Ona fetalai mai lea o Ieova ia Mose, Faauta, o le a e taoto faatasi ma ou tamā; ona tutū lea o lenei nuu, ma latou mulilulua i atua o tagata ese o le nuu latou te o i ai, e faatasi ai ma i latou, latou te lafoai mai foi ia te au, ma latou soli i la‘u feagaiga na ou osia ma i latou.
17Ona tupu ai lea o lo‘u ita ia te i latou i lea aso, ona ou lafoai lea ia te i latou, ma ‘alo o‘u mata ia te i latou, e faaumatia foi i latou, e oo ia te i latou o mea leaga o tele ma mea e tiga ai; ona fai ane lea o i latou i lea aso, E le ua oo ea nei mea leaga ia te i tatou ina ua le o ia te i tatou lo tatou Atua?
18E matuā ‘alo o‘u mata i lea aso ona o mea leaga uma ua latou faia, ina ua latou faasaga i atua ese.
19O lenei, ia outou tusia lenei pese mā outou, ma a‘oa‘o ai i le fanauga a Isaraelu; ia le te‘a i o latou gutu, ina ia avea lenei pese ma molimau ia te au i le fanauga a Isaraelu.
20Auā pe a ou faaoo atu ia te i latou i le laueleele sa ou tauto ai i o latou tamā, o tafe ai le suāsusu ma le meli; pe a uma foi ona latou aai, ma latou maoona, ma puputa ai i latou; ona faasaga lea o i latou i atua ese, ma auauna atu i ai, ma ‘ino‘ino mai ia te au, ma soli i la u feagaiga.
21A oo foi ia te i latou o mea leaga e tele, ma mea e tiga ai, ona fai lea o lenei pese ma molimau ia te i latou; auā e le galo ai i gutu o a latou fanau; auā ua ou iloa o latou manatu ua latou faia i le aso nei, a o lei faaooina e a‘u o i latou i le nuu na ou tauto ai.
22Ua tusi foi e Mose lenei pese i lea lava aso, ua na a‘oa‘o atu ai foi i le fanauga a Isaraelu.
23Ua poloai atu foi o ia ia Iosua le atalii o Nuno, ua faapea atu, Ia e faamalosi, ma ia e loto tele; auā e te faaooina atu le fanauga a Isaraelu i le nuu sa ou tauto ai ia e i latou; ou te i ai foi ia te oe.
24Ua uma foi ona tusia e Mose o upu o lenei tulafono i le tusi, ua oo ina atoa,
25ona fai atu lea o Mose i sa Levī, o e sa tauave le atolaau o le feagaiga a Ieova, ua faapea atu,
26Ia outou ave le tusi o lenei tulafono, ma tuu ai i le itu o le atolaau o le feagaiga a Ieova lo outou Atua, ina ia i ai e fai ma molimau ia te oe.
27Auā ua ou iloa lou fouvale, ma lou ua maaa; faauta, o loo fouvale outou ia Ieova, o loo o tatou ola faatasi i le aso nei; e le atili ai ea pe a ou oti?
28Ia outou faapotopoto mai ia te au o teoaina uma o outou itu aiga, ma o outou faipule, ina ia ou fai atu nei upu ia latou faalogo ai, ou te valaau foi i le lagi ma le lalolagi e fai ma molimau ia te i latou.
29Auā ua ou iloa pe a mavae lo‘u oti, ona matuā leaga lea o outou, ma outou o ese i le ala ua ou poloai atu ai ia te outou; e oo foi ia te outou mea leaga i aso amuli; auā e faia e outou mea leaga i luma o Ieova, i lo outou faaonoono ia te ia i le galuega a o outou lima.
30Ua fai atu foi Mose a o faalogologo mai le faapotopotoga uma o Isaraelu o upu o lenei pese, ua oo ina atoa
Who We AreWhat We EelieveWhat We Do
2025 by iamachristian.org,Inc All rights reserved.
