1Ua taoto Iosefatu faatasi ma ona tamā, ua tanu foi o ia faatasi ma ona tamā i le aai a Tavita. Ona soloai ane ai lea o Ioramo lona atalii e fai ma tupu.
2Sa ia te ia ona uso, o atalii o Iosefatu, o Asaraia, ma Ieielu, ma Sakaria, ma Asaraio, ma Mekaeli, ma Sefatiao; o atalii uma ia o Iosefatu le tupu o Isaraelu.
3Na foaiina atu e lo latou tamā ia te i latou mea alofa e tele, o ario, ma auro, ma oloa tauā, atoa ma aai nofo ‘olo i Iuta; a o le malo na ia tuuina ia Ioramo, auā o ia o le ulumatua.
4Ua maua e Ioramo le malo o lona tamā, ona faamalosi ai lea, ma na fasioti i ona uso uma i le pelu, atoa ma nisi alii sili o Isaraelu.
5E tolu sefulu ma le lua o tausaga o Ioramo ina o fai o ia ma tupu; ua fai foi o ia ma tupu i Ierusalema i tausaga e valu.
6Ua ia savali i le ala o tupu o Isaraelu, e pei ona faia e le aiga o Aapo; auā ua fai mana avā le afafine o Aapo; ua fai amio leaga o ia i luma o Ieova.
7A e lei finagalo Ieova ona faaumatia le aiga o Tavita, ona o le feagaiga na osia ma Tavita, faapei ona fetalai mai o ia, e tuuina mai le lamepa ia te ia ma ana fanau i aso uma.
8O lana nofoaiga na foua ai Iuta e Etoma, ua latou faanofo foi so latou lava tupu.
9Ona o atu lea o Ioramo, ma alii sili ua ia te ia, atoa ma ana kariota uma faatasi ma ia; ona tulai lea o ia i le po, ma na fasi ia Etoma na sio ia te ia, atoa ma alii o kariota.
10A ua foua Iuta e Etoma, ua oo lava i ona po nei. O ia ona po na foua ai o ia e Lipena; auā na tuua e ia o Ieova le Atua o ona tamā.
11Ua faia foi e ia o mea maualuluga i mauga o Iuta, ma faatupu le faitaaga i e nonofo i Ierusalema, ma na tosina ai Iuta.
12Ua au mai le tusi ia te ia mai ia Elia le perofeta, ua faapea mai, O loo faapea ona fetalai mai o Ieova le Atua o Tavita lou tamā, Ua e le savali i ala o Iosefatu lou tamā, ma ala o Asa le tupu o Iuta,
13a ua e savali i le ala o tupu o Isaraelu, ma ua e faatupuina le faitaaga ia Iuta, ma e o nonofo i Ierusalema, e pei o faitaaga o le aiga o Aapo, ma ua e fasiotia foi ou uso o le aiga o lou tamā, o e ua sili ona lelei ia te oe;
14faauta, o le mea lea e faaoo ai e Ieova le malaia tele i lou nuu, ma lau fanau, ma au avā, ma au oloa uma;
15o oe foi e ia te oe le ma‘i tele, o le ma‘i e tupu i lou manava, seia paū i fafo lou gaau ona o le ma‘i i lea aso ma lea aso.
16Ua faaoso foi e Ieova ia Filisitia, ma Arapi, o e ua latalata ane i Kusa, e tau ma Ioramo.
17Ona latou o ae lea i Iuta, ma osofaiina ai, ma latou ave oloa uma na maua i le fale o le tupu, o ona atalii foi, ma ana avā, na le toe ia te ia se atalii, ua na o Ioasasa le aupito itiiti i ona atalii.
18Ua mavae ia mea uma, ona taia lea o ia e Ieova i le ma‘i i lona manava e le mafaamaloloina.
19Ua oo ina mavae o aso e tele, ua atoa tausaga e lua, ona paū lea i fafo o lona gaau ona o lona ma‘i; ona oti ai lea o ia i ma‘i leaga. Ua le muina le afi mo ia e lona nuu, e pei ona muina o afi mo ona tamā.
20E tolu sefulu ma le lua ona tausaga ina o fai o ia ma tupu, na fai foi o ia ma tupu i Ierusalema i tausaga e valu. Ua alu o ia e leai se tausaafi ia te ia. Ua tanu foi o ia i le aai a Tavita, a e le o i tuugamau o tupu.
Who We AreWhat We EelieveWhat We Do
2025 by iamachristian.org,Inc All rights reserved.
