1Na ta‘uina atu ia Tavita, ua faapea, Faauta, o loo tau Filisitia ma Kaila, o loo latou vete foi i mea e sasa ai saito.
2Ona fesili lea o Tavita ia Ieova, ua faapea, Ou te alu ea, ma ou fasi i nā Filisitia? Ona fetalai mai lea o Ieova ia Tavita Alu ia, ma e fasi ia Filisitia, ma e faaola ia Kaila.
3Ona fai mai lea o tagata o Tavita ia te ia, Faauta, ua tatou fefefe iinei i Iuta; a e atili ai pe a tatou o atu i Kaila i le itu taua a Filisitia.
4Ona toe fesili lava lea o Tavita ia Ieova; ona tali mai lea o Ieova ia te ia, ua faapea mai, Tulai ia, ina alu ifo i Kaila, auā ou te tuuina atu Filisitia i lou lima.
5Ona alu atu ai lea o Tavita ma ona tagata i Kaila; ua latou tau ma Filisitia, ua fao a latou mea, ma fasi ia te i latou i le fasi tele; ua faaola foi e Tavita i e na nonofo i Kaila.
6Na sola mai Aviata le atalii o Aimeleka ia Tavita i Kaila, ua alu ifo ai o ia ma le efota i lona lima.
7Ua ta‘uina atu ia Saulo, ua alu atu Tavita i Kaila; ona fai ane lea o Saulo, Ua tuulafoai mai e le Atua ia te ia i o‘u lima, auā ua punitia o ia ina ua alu atu i le aai ua fai puipui ma faamaufaalava.
8Ona alu ai lea o le faalaei ‘au a Saulo i le nuu uma e o mai i le taua, ia o ifo i Kaila, e siosio atu ia Tavita ma ona tagata.
9Ua iloa e Tavita, ua fai togafiti leaga Saulo ia te ia, ona fai atu lea o ia ia Aviata le faitaulaga, Au mai ia le efota.
10Ona fai atu lea o Tavita, Ieova e, le Atua o Isaraelu, ua matuā faalogo lava e lau auauna o loo fou mai Saulo e sau i Kaila e faatafuna i le aai ona o a‘u.
11E tuuina atu ea a‘u e tagata o Kaila i lona lima? E alu ifo ea Saulo, pei ona faalogo ai e lau auauna? Ieova e, le Atua o Isaraelu, ia e fetalai mai i lau auauna. Ona fetalai mai lea o Ieova, E alu ifo ai lava o ia.
12Ona fai atu lea o Tavita, E tuuina atu ea a‘u ma o‘u tagata e tagata o Kaila i lima o Saulo? Ua fetalai mai ai Ieova, Latou te tuuina atu ai lava outou.
13Ona tulai lea o Tavita ma ona tagata, pe atoa se toaono galau, ua latou o ese nai Kaila, ua soona o lava. Ua ta‘uina atu ia Saulo, ua sola Tavita nai Kaila; ona tuu ai lea e ia, ua le toe alu atu.
14Ua nofo Tavita i le vao i ‘olo mauga, ua nofo i le mauga i le vao o Sifi; ua saili e Saulo ia te ia i aso uma, a e lei tuuina o ia e le Atua i lona lima.
15Ua iloa e Tavita, ua alu atu Saulo e saili ia oti o ia; sa i ai Tavita i le vao o Sifi i le vao matua.
16Ona tulai lea o Ionatana le atalii o Saulo, ua alu atu ia Tavita i le vao matua, ua faamalosi ia te ia i la le Atua;
17ua fai mai foi ia te ia, Aua le fefe, auā e le maua oe e le lima o Saulo lo‘u tamā; a e fai oe ma tupu o Isaraelu, o a‘u foi ou te aupito atu ia te oe; ua iloa lava e lo‘u tamā o Saulo e faapea lava.
18Ona fai lea o la la mavaega i luma o Ieova; ua nofo Tavita i le vao matua, a e alu atu Ionatana i lona fale.
19Ua o ae tagata o Sifi ia Saulo i Kipea, ua faapea, E le ua lafi ea Tavita ia te i matou i ‘olo mauga i le vao matua i le mauga o Hakila, o loo i le itu i toga o Iesimoni?
20O lenei, le tupu e, ia e maliu ifo i mea uma ua naunau i ai lou finagalo e maliu ifo ai; a e a matou e tuuina atu o ia i le lima o le tupu.
21Ona fai mai lea o Saulo, Ia faamanuia outou e Ieova, auā ua outou alolofa mai ia te au.
22Ina o ia outou, toe sauniuni lelei, ma iloa, ma vaai i le mea e masani ai o ia; po o ai ua iloa ai o ia; auā fai mai ua matuā togafiti poto o ia.
23Ia outou vaavaai foi, ma ia iloa ona lafitaga uma e lafi ai o ia; ona outou foi mai lea ia te au ma le tonu, ona tatou o lea ma outou; a e afai e i ai o ia i le nuu, ou te saili ia te ia i afe uma o Iuta.
24Ona tulai lea o i latou, ua o i Sifi, ua muamua ia Saulo; a o Tavita ma ona tagata sa i le vao o Meona i latou, i le eleele laugatasi i le itu i toga o Iesimoni.
25Ua alu atu foi Saulo ma ona tagata e saili ia te ia; ua ta‘uina atu ai ia Tavita, ona alu ifo lea o ia i le papa, ua nofo i le vao o Meona. Ua faalogo ai Saulo, ona tuliloa lea o ia ia Tavita i le vao o Meona.
26Ua alu atu Saulo i le tasi itu o le mauga, a o Tavita ma ona tagata sa i le tasi itu o le mauga i latou. Ua faataalise ona alu ese o Tavita ia Saulo, a o Saulo ma ona tagata, ua latou siosio ia Tavita ma ona tagata e pupue ia te i latou.
27Ona suu ai lea o le feau ia Saulo, ua faapea, Ia vave ona maliu atu, auā ua osofia le nuu e Filisitia.
28Ona foi lea o Saulo ai le tuliloaga o Tavita, ua alu e tau ma Filisitia; o le mea lea na latou faaigoa ai lea mea, le Papa o le faasaoina.
29Ua alu ae Tavita nai lea mea, ua nofo i ‘olo mauga i Enokati.
Who We AreWhat We EelieveWhat We Do
2025 by iamachristian.org,Inc All rights reserved.
