1O lenei ia e alofa atu ia Ieova lou Atua ma ia e tausiusi i ana sauniga ma ana tulafono ma ana faamasinoga ma ana poloaiga i aso uma lava.
2Ia outou iloa foi i le aso nei, auā ou te le fai atu i a outou fanau o e na le iloa, ma ua le vaai atu i le aoaiga a Ieova lo outou Atua o lona silisili, ma lona aao malosi,
3ma lona aao faaloaloa, ma ona vavega ma ana galuega na ia faia i Aikupito ia Farao le tupu o Aikupito, atoa ma lona nuu uma;
4ma mea na faia e ia i le itu taua a Aikupito, i a latou solofanua ma o latou kariota, na ia faalofia ifo i latou i le suāsami o le sami Ulaula ina o latou tuliloa ia te outou; ua faaumatia foi i latou e Ieova na oo mai i nei ona po;
5ma mea na ia faia ia te outou i le vao ua oo i lo outou o mai i le mea nei;
6atoa ma mea na ia faia ia Tatano ma Apiramo o atalii o Eliapo, o le atalii o Reupena, ina ua faamaga le gutu o le eleele, ma folo ifo ia te i latou, ma o latou aiga, ma o latou fale ie, atoa ma a latou mea uma i luma o Isaraelu uma lava;
7a ua vaai atu o outou lava mata i mea tetele uma ua faia e Ieova.
8Lenei la, ia outou tausiusi i poloaiga uma lava ou te fai atu ai ia te outou i le aso nei, ina ia outou malolosi ai, tou te oo atu ai, ma fai mo outou le nuu o le a outou o atu i ai e fai mo outou;
9ina ia outou nofo tulu‘i i le laueleele na tauto ai Ieova i o outou tamā e foaiina atu ia te i latou ma a latou fanau, o le nuu o tafe ai le suāsusu ma le meli.
10Auā o le nuu a ē alu i ai e fai mo oe, e le pei o le nuu o Aikupito na outou o mai ai, na e luluina ai lau saito, ma faasūsūina ai i lou vae, pei o se fanua a laau iti e ‘aina;
11a o le nuu a outou o atu i ai e fai mo outou, o le nuu lea o mauga ma vanu e inu lava i le suāua mai le lagi.
12O le nuu e tausia e Ieova lou Atua e le aunoa ona silasila i ai o Ieova lou Atua, e afua mai i le amataga o le tausaga e oo atu lava i le gataaga o le tausaga.
13Afai foi tou te matuā faalogo i a‘u poloaiga ou te fai atu ai ia te outou i le aso nei, ia outou alofa atu ia Ieova lo outou Atua, ma auauna ia te ia ma o outou loto atoa ma o outou agaga atoa,
14ona ou foaiina atu lea o le ua i lo outou nuu i ona tausaga, o le uaga muamua ma le uaga mulimuli, e te faapotopoto ai foi lau saito, ma lau uaina, ma lau suāuu.
15Ou te tuuina atu foi laau iti i lou laueleele mā au manu; e te ‘ai foi, ma e ma‘ona ai.
16Ia outou, ne‘i pelogia o outou loto, tou te o ese ai ma auauna i atua ese, ma ifo i ai;
17ona tupu ai lea o le toasa o Ieova ia te outou, ona pupuni ai lea e ia o le lagi, ina ia leai ni ua, ia le fua mai foi le laueleele ni ona fua; ona outou vave fano ai lea ma te‘a i le nuu lelei o le a foai mai e Ieova ia te outou.
18O lenei ia outou tuu nei upu i o outou loto ma o outou manatu, ia fusi foi e fai ma faailoga i o outou lima, e avea foi ma pale i le va o outou mata.
19Ia outou a‘oa‘o atu ai i a outou fanau, ma tautalatala a‘i pe a e nofo i lou fale, pe a e savali foi i le ala, pe a e taoto, pe a e tulai foi.
20Ia e tusi ai foi i pou o lou fale atoa ma puipui;
21ina ia faateleina ai o outou aso ma aso o a outou fanau i le laueleele na tauto ai Ieova i o outou tamā, e avatu ia te i latou, ia pei o aso e i ai le lagi i luga o le lalolagi.
22Auā afai tou te matuā tausiusi i nei poloaiga uma lava ou te fai atu ai ia te outou ia faia, ia outou alofa atu ia Ieova lo outou Atua, ia savavali i ona ala uma lava, ma ia pipii atu ia te ia;
23ona tulia lea e Ieova o ia nuu uma lava ai o outou luma, tou te fai ai foi mo outou o nuu e sili ona toatele ma le malolosi ia te outou.
24E fai mo outou o mea uma lava e solia e o outou alofivae; e gata mai i le vao e oo i Lepanona, ‘e gata mai foi i le vaitafe o le vaitafe o Eufirate e oo atu i le sami tupito, a avea ia ma o outou tuaoi.
25E le tu mai se tagata e tetee ia te outou, o Ieova lo outou Atua na te tuuina atu le mata‘u ma le fefe ona o outou i le nuu uma lava o le a savavali i ai outou, faapei ona fetalai mai o ia ia te outou.
26Faauta mai, ou te tuuina atu i o outou luma i le aso nei le manuia ma le malaia;
27o le manuia pe afai tou te faalogo i poloaiga a Ieova lo outou Atua, ou te fai atu ai ia te outou i le aso nei;
28a o le malaia pe afai tou te le faalogo i poloaiga a Ieova lo outou Atua, a e o ese i le ala ou te fai atu ai ia te outou i le aso nei, tou te mulimuli ai i atua ese ua outou le iloa.
29A iu ina faaooina atu oo e Ieova lou Atua i le nuu o le a e alu i ai e fai mo oe, ona e tuuina lea o le manuia i le mauga o Keresema, ma le malaia i le mauga o Evalu.
30E le o i ai ea ia mauga i tala atu o Ioritana i le itu e alu ifo ai le la, i le nuu o sa Kananā e o nonofo i le eleele laugatasi e fesagai ma Kilikala, e latalata ane i aluna o Morē?
31Auā a outou sopoia atu Ioritana e oo atu e fai mo outou le nuu o le a foai mai ia te outou e Ieova lo outou Atua, e faia foi mo outou, ma outou nonofo ai,
32ia outou tausiusi ia faia o tulafono uma, ma faamasinoga ou te tuuina atu i o outou luma i le aso nei.
Who We AreWhat We EelieveWhat We Do
2025 by iamachristian.org,Inc All rights reserved.
