1Faalogo mai ia, outou le fanau e, i le a‘oa‘o atu e le tamā, ma uai mai o outou taliga ina ia faaatamamaiina outou.
2Auā ou te avatu ia te outou le poto e lelei; aua ne‘i tou tuulafoai i la‘u upu e a‘oa‘o atu.
3Auā o a‘u nei, o le atalii o lo‘u tamā, o le pele toatasi a lo‘u tinā.
4Na ia a‘oa‘o mai ia te au, ma na fai mai ia te au, Ia taofi a‘u upu i lou loto, ia tausiusi i a‘u poloaiga e te ola ai.
5Ia maua le poto, ia maua le atamai; aua ne‘i galo ia te oe nei mea; aua foi ne‘i e liliu ese i upu a lo‘u gutu.
6Aua e te lafoai ia te ia, ona tausia lea o oe e ia; ia e alofa ia te ia, ona leoleoina lea o oe e ia.
7O le poto o le mea sili lea, ia maua le poto; o mea uma e te maua ia maua mai ai le atamai.
8Ia e vivii ia te ia, ona faaeaina lea o oe e ia; na te faamamaluina oe pe a e fusi ia te ia.
9Na te avatu le pale matagofie i lou ulu; o le palealii lalelei na te foaiina atu ia te oe.
10Faalogo mai, lo‘u atalii e, ma e talia a‘u upu, ona faateleina ai lea o tausaga o lou olaga.
11Ou te faasino ia te oe le ala o le poto; ou te ta‘ita‘iina oe i ala sa‘o.
12A ē savali e le faalavelaveina lau laasaga; a ē momo‘e e te le tausuai.
13Ia e taofi mau i upu e a‘oa‘oina, aua ne‘i tuuina atu; ia e leoleo i ai; auā o lou ola lava lea.
14Aua e te alu i le ala o e agasala; aua foi e te ui i le ala o e fai amio leaga.
15Ia e faamamao i ai, aua ne‘i ui atu i ai, ia e ‘alo ai, ma alu ese.
16Auā latou te le momoe, se‘i iloga ua latou faia se mea leaga; ua aveesea foi o latou moe, pe afai latou te lei faatausuaiina nisi.
17Auā ua latou aai le areto a le agasala; ua latou inu foi le uaina a le sauaga.
18A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.
19O le ala o e amio leaga e tusa lea ma le pogisa; latou te le iloa le mea latou te tausuai ai.
20Lo‘u atalii e, ia e faalogo mai i a‘u upu; ia uai mai ou taliga i mea ou te fai atu ai;
21aua ne‘i te‘a ese ia mea i ou mata; ia e tausi i ai i totonu o lou loto;
22auā o ia mea o le ola lea i e ua maua; ma le mea e malolo ai o latou tino uma.
23Ia sili ona leoleoina o lou loto i le leoleoina o mea uma; auā e tupu mai ai le amio.
24Tuu ese ia te oe le gutu faapiopio; ma laugutu faatu‘iese, ia mamao ia ia te oe.
25Ia vaai sa‘o ou mata i ou luma; ma ou laumata, ia faasagatonu ia i ou luma.
26Ia mafaufau i le ala o ou vae; ona faatumauina ai lea o ou ala uma.
27Aua ne‘i afe i le itu taumatau po o le itu tauagavale; ia ‘alo ese ou vae i le leaga.
Who We AreWhat We EelieveWhat We Do
2025 by iamachristian.org,Inc All rights reserved.
