1E lua sefulu ma le lima o tausaga o Amasia ina o fai o ia ma tupu, ua fai foi o ia ma tupu i Ierusalema i tausaga e lua sefulu ma le iva. O le igoa o lona tinā o Ioatana, o le ierusalema ia.
2Ua faia e ia le amiotonu i luma o Ieova, a ua le faia ma le loto atoatoa.
3Ua mau le malo ia te ia, ona ia fasiotia lea o ana auauna e na fasioti i lona tamā o le tupu.
4A ua le fasiotia a latou fanau, a ua faia e pei ona tusia i le tulafono i le tusi a Mose, na poloai mai ai Ieova, ua faapea mai, Aua ne‘i fasiotia tamā e sui a‘i le fanau, aua foi ne‘i fasiotia le fanau e sui a‘i o latou tamā, a ia taitasi le tagata ma fasiotia o ia ona o lana lava agasala.
5Ua faapotopotoina e Amasia o Iuta, ma na tofia i latou e fai ma alii o taitoaafe, ma alii o taitoaselau, i aiga o latou tamā, i Iuta uma ma Peniamina; ua ia faitauina i latou e afua i e na luafulu o latou tausaga ma e ua matutua ai, ma ua iloa o i latou e tolu selau o afe o tagata tau ua filifilia, e o atu i taua, o e ave tao ma tali pupuni.
6Ua faaoloatauaina foi e ia o toa malolosi e selau o afe mai Isaraelu i taleni ario e tasi le selau.
7A ua sau le tagata o le Atua ia te ia, ua faapea atu, Le tupu e, aua ne‘i o faatasi ma oe ‘au a Isaraelu; auā e le o i ai Ieova ia Isaraelu, o le fanauga uma ia a Efaraima.
8A e afai e te alu lava oe, ia faia o lea, ia faamalosi i le taua; e faatautevatevaina oe e le Atua i luma o e ita mai; auā o i ai le malosi i le Atua e fesoasoani ai, ma faatautevatevaina ai.
9Ona faapea mai lea a Amasia i le tagata o le Atua, A e faapefea ea taleni e selau ua ou avatu ai i ‘au a Isaraelu? Ona tali atu lea o le tagata o le Atua, E mafaia e Ieova ona foai mai ia te oe mea e sili i lena.
10Ona vavae atu lea o i latou e Amasia, o ‘au lava na o mai ia te ia mai Efaraima, ia o i lo latou nuu; ona matuā tupu tele ai lea o lo latou ita ia Iuta, ma ua latou toe foi i lo latou nuu ma le ita tele.
11A ua faamalosi Amasia, ma ua ta‘ita‘i atu lona nuu, ma ua o atu i le vanu masimā, ma fasiotia le fanauga a Seira e sefulu afe.
12A o afe e sefulu o e ola ua ave faatagataotaua e le fanauga a Iuta, ma ave ia te i latou i luga o le mato, ma lafo i lalo i latou ai luga o le mato, ona momomo ai lea o i latou uma.
13A o tagata o ‘au na toe faafoisia e Amasia, ina ne‘i latou o ma ia i le taua, na latou osofaia aai o Iuta, e gata mai i Samaria e gata atu i Peteorana, ma fasia o latou e tolu o afe, ma latou vetea le vete e tele.
14Ua toe foi mai Amasia nai le fasiga o tagata o Etoma, ona au mai lea e ia o atua o le fanauga a Seira, ma ua faatuina e fai mona atua, ma ifo atu i o latou luma, ma faamu mea manogi ia te i latou.
15Ona tupu lea o le toasa o Ieova ia Amasia, ua auina atu ai foi e ia o le perofeta ia te ia, ma ua faapea atu ia te ia, Se a le mea ua e sailiili ai i atua o le nuu ua le mafaia ona laveai lo latou nuu ai lou lima?
16O loo tautala atu o ia ia te ia, ona faapea mai lea o le tupu ia te ia, Ua tofia ea oe se tasi o le au faipule a le tupu? Soia o oe, se a le mea e fasia ai oe. Ona tuua ai lea e le perofeta, a ua faapea atu, Ua ou iloa ua finagalo le Atua ia fano oe, ina ua e faia lenei mea, ma ua e le faalogo i la‘u faatonuga.
17Ona filifili ai lea o Amasia le tupu o Iuta, ma na auina atu le sāvali ia Ioasa le atalii o Ioasasa, le atalii ia o Ieu le tupu o Isaraelu, ua faapea atu, Maliu mai ia, se‘i ta fesilafai.
18Ona tali mai lea o Ioasa le tupu o Isaraelu ia Amasia le tupu o Iuta, ua faapea mai, Na ave le feau a le laau talatala o i Lepanona i le arasi o i Lepanona, ua faapea atu, Au mai ia lou afafine e fai ma avā a lo‘u atalii; a ua ui ane le manu feai sa i Lepanona, ua soli i le laau talatala.
19Ua e faapea ane, faauta, ua fasia e oe o Etoma; ua faamaualugaina ai foi lou loto e mitamita ai; o lenei ina nofo ia oe i lou fale; e te faatupu le leaga i se a, ina ia malaia ai oe atoa ma Iuta faatasi ma oe?
20A ua le faalogo Amasia, auā mai le Atua lea mea ina ia tuuina atu i latou i le lima o e ita mai, ina ua latou sailiili atu i atua o Etoma.
21Ona alu ae lea o Ioasa le tupu o Isaraelu; ma ua la feiloai o ia ma Amasia le tupu o Iuta i Petesemesa ua ia Iuta.
22Ona fasia lea o Iuta i luma o Isaraelu, ma ua latou taitasi ma sola i o latou fale ie.
23Ua pue e Ioasa le tupu o Isaraelu ia Amasia le tupu o iuta o le atalii o Ioasa, o le atalii lea o Ioasasa, i Petesemesa, ua aumaia o ia i Ierusalema, ona lepeti ai lea e ia o le pa o Ierusalema, e amata i le faitotoa o Efaraima e oo atu i le faitotoa o le tulimanu, o kupita e fa selau.
24Ua na ave foi o auro ma ario uma, ma ipu uma, ua maua i le fale o le Atua sa ia Opeteetoma, ma le oloa o le fale o le tupu, atoa ma ni alii e fai ma faafoi ita, ona foi atu ai lea o ia i Samaria.
25E sefulu ma le lima o tausaga na ola ai Amasia le atalii o Ioasa le tupu o Iuta, talu ona mavae ona oti o Ioasa le atalii o Ioasasa le tupu o Isaraelu.
26O toe o mea na faia e Amasia, o mea muamua ma mea mulimuli, faauta e lei tusia ea i le tusi i tupu o Iuta ma Isaraelu?
27O ia ona po na liliu ese ai o Amasia i lona mulimuli ia Ieova, ua latou foua ai foi o ia i Ierusalema; ona sola lea o ia i Lakisa; a ua aauina atu nisi e tuliloa ia te ia i Lakisa, ma ua latou fasioti ia te ia i lea mea.
28Ona latou au mai lea ia te ia i luga o solofanua, ma ua latou tanumia o ia faatasi ma ona tamā i le aai o Iuta.
Who We AreWhat We EelieveWhat We Do
2025 by iamachristian.org,Inc All rights reserved.
