SALAMO, 45 - Samoan Old Version Bible

O LE SALAMO XLV.O le viiga i le Tupu.Ma le usu pese i le susana. Ma le fanauga a Koru. O le salāmo

e a‘oa‘o ai. O le pese i le alofa.

1Ua puna mai lo‘u loto i upu lelei; ou te tautala atu i mea ua ou faia i le Tupu; o lo‘u laulaufaiva o le peni lea a le tusiupu lima vave.

2Ua sili lava lou aulelei i atalii o tagata; ua masaa ifo i ou laufofoga upu alofa; o le mea lea e faamanuia ai oe e le Atua e faavavau.

3Ina fusi ia lau pelu i lou vae, o oe na le toa, o lou viiga ma lou mamalu.

4O lou mamalu foi ia e tietie ai i le manu ma le manuia, ona o le upu moni, ma le agamalu, ma le amiotonu; ia a‘oa‘oina foi oe e lou aao taumatau i mea e matautia ai.

5E maamaai au u fanafana; e pauu ai tagata ia te oe; e tuia ai loto o e faia le Tupu mo latou fili.

6Le Atua e, o lou nofoālii e faavavau faavavau lava lea; o le tootoo o lou malo, o le tootoo o le amiotonu lea.

7Ua e finagalo i le amiotonu, ma e ‘ino‘ino i le amio leaga; o le mea lea ua faauuina ai oe e le Atua, o lou Atua lava, i le suāuu o le fiafia, e sili lava i e tou te faatasi.

8Ou ofu uma lava ua ni muro, ma aloe, ma kesia, mai maota nifo o elefane ua latou faafiafia ai ia te oe.

9O loo faatasi o alo fafine o tupu ma e ua faapelepeleina e oe; ua tu mai le masiofo i lou itu taumatau ua ofu ia i le auro lelei mai Ofeira.

10Ina faafogafoga mai ia, le alo fafine e, ma silasila, ma liliu mai ou fofoga; ia e faagalogalo foi i lou nuu, ma le aiga o lou tamā.

11Ona naunau ai lea o le Tupu i lou lalelei; auā o ia lava lou Alii, ia e ifo ia te ia.

12E sau le tama fafine a Turo ma le mea alofa; e ole atu ia te oe o e tamaoaiga i le nuu.

13Ua matuā matagofie le alo fafine o le Tupu i totonu; ua teuteua lona ofu i le auro.

14E ta‘ita‘iina o ia i le Tupu ma ona ofu lanu eseese; o ana uo, o taupou o e mulimuli atu ia te ia, e aumaia i latou ia te oe.

15E ta‘ita‘iina i latou ma le fiafia ma le olioli; e ulufale atu i latou i le maota o le Tupu.

16E suia ou tamā i ou alo; e te tofia i latou e fai ma alii sili i le lalolagi uma.

17Ou te ta‘uta‘u atu lou suafa i augātupulaga uma lava; o le mea lea e vivii atu ai tagata ia te oe e faavavau faavavau lava.