1Ua fetalai mai foi Ieova ia Mose, ua faapea mai,
2Fai atu ia i le fanauga a Isaraelu, ia faapea atu ia i latou, O tausamiga ia Ieova tou te tala‘i ai, o faapotopotoga paia, o tausamiga lava ia ia te au.
3E ono aso e fai ai galuega; a o le aso fitu, o le sapati lea e malolo ai, e fai ai le faapotopotoga paia, aua tou te fai ai se galuega e tasi; o le sapati lea ia Ieova i mea uma tou te nonofo ai.
4O tausamiga ia ia Ieova, o faapotopotoga paia, ia outou tala‘i ai i o latou aso ua atofaina.
5O le masina muamua, o le aso e tasi le sefulu ma le fa o le masina, o le afiafi, o le paseka lea ia Ieova.
6O le aso e tasi le sefulu ma le lima o lea lava masina, o le tausamiga lea ia Ieova o le areto e le faafefeteina; o aso lava e fitu tou te aai ai le areto e le faafefeteina.
7O le aso muamua tou te fai ai se faapotopotoga paia, aua tou te fai ai se galuega mamafa.
8A ia outou avatua taulaga e fai i le afi ia Ieova i aso e fitu; o le aso fitu o le faapotopotoga paia lea; aua lava tou te fai ai se galuega mamafa.
9Ua fetalai mai foi Ieova ia Mose, ua faapea mai,
10Fai atu ia i le fanauga a Isaraelu, ia faapea atu ia i latou, A outou oo i le nuu ou te avatua mo outou, ma outou fai ai le seleselegāsaito, ona outou au mai ai lea o le fusi saito o mea ua faapolopoloina o lo outou seleselega i le faitaulaga.
11E luluina foi e ia o le fusi saito i luma o Ieova, ina ia talia mo outou; o le aso e aupito mai i le sapati e luluina ai e le faitaulaga.
12O le aso foi tou te luluina ai le fusi saito, tou te avatua ai se mamoe poa e sao ona lelei, e tasi lona tausaga, e fai ma taulaga mu ia Ieova.
13O le taulaga foi i mea e ‘ai e tatau i ai, e lua omera o le falaoa lelei ua palua ma le uu, o le taulaga e fai i le afi ia Ieova, o le mea manogi lelei; ma le taulaga i le mea e inu e tatau i ai, o lona vaega e fa o le sinu o uaina.
14Aua tou te aai foi sina areto, po o saito tunua, po o saito mata seia oo i lea lava aso ua au mai ai se taulaga i lo outou Atua; o le tulafono lea e faavavau i o outou tupulaga amuli i mea uma tou te nonofo ai.
15Ia outou faitaulia e amata i le aso e aupito mai i le sapati, o le aso lava na outou au mai ai le fusi saito o le taulaga lulu; ia atoatoa o sapati e fitu.
16E oo lava i le aso e aupito mai i le sapati e fitu tou te faitau ai o aso e limagafulu; ona fai taulaga ai lea i le taulaga i mea e ‘ai fou ia Ieova.
17Tou te au mai nai o outou fale o areto lulu e lua fua, e tailua omera, e fai i le falaoa lelei, ia tao ma le mea e faafefete a‘i, o mea faapolopolo ia ia Ieova.
18Ia outou avatua faatasi ma areto o tamai mamoe e fitu, e tasi lo latou tausaga e sao ona lelei, atoa ma le tamai povi poa e tasi, ma mamoe poa e lua, e fai ia ma taulaga mu ia Ieova, atoa ma taulaga i mea e ‘ai e tatau i ai, ma taulaga i le mea e inu e tatau i ai, o le taulaga lava e fai i le afi, o le mea manogi lelei ia Ieova.
19Ona fai taulaga ai lea outou i se ‘oti poa e tasi e fai ma taulaga mo le agasala, atoa ma tamai mamoe e lua e tasi lo la tausaga, e fai ma taulaga faafetai.
20Ona luluina ai lea o ia mea e le faitaulaga atoa ma le areto o mea faapolopoloina, e fai ma taulaga lulu i luma o Ieova, atoa ma tamai mamoe e lua; e paia ia mea ia Ieova mā le faitaulaga.
21Ia outou tala‘i i lea lava aso e fai ai se faapotopotoga paia e outou; tou te le fai ai se galuega mamafa e tasi; o le tulafono lea e faavavau i mea uma tou te nonofo ai i o outou tupulaga amuli.
22A outou selesele foi le seleselegāsaito i o outou fanua, aua le faauma ou pito fanua pe a e selesele i ai; aua foi e te ao ni fua ua pauu i lau seleselega, a ia tuu mo e matitiva ma le tagata ese; o a‘u o Ieova lo outou Atua.
23Ua fetalai mai foi Ieova ia Mose, ua faapea mai,
24Fai atu ia i le fanauga a Isaraelu, ia faapea atu, O le fituga masina, o le aso muamua o le masina, ia outou fai ai se sapati, o le faamanatuga i le iligāpu, o le faapotopotoga paia.
25Aua tou te fai ai se galuega mamafa e tasi, a ia outou avatu se taulaga e fai i le afi ia Ieova.
26Ua fetalai mai Ieova ia Mose, ua faapea mai,
27O le aso sefulu o lea lava fituga masina, o le aso o le togiola lea; o le faapotopotoga paia lea ia te outou; ia puapuagatia ai outou e outou, ma avatu ai se taulaga e fai i le afi ia Ieova.
28Aua tou te faia se galuega e tasi i lea lava aso; auā o le aso lea o le togiola, e fai ai se togiola mo outou i luma o Ieova lo outou Atua.
29Ai se tagata e le puapuagatia o ia e ia i lea lava aso, e vavaeeseina o ia i lona nuu.
30Ai se tagata foi na te faia se galuega e tasi i lea lava aso, e fano ia te au o lea tagata ai lona lava nuu.
31Aua tou te fai ai se galuega e tasi; o le tulafono lea e faavavau i o outou tupulaga amuli, i mea uma tou te nonofo ai.
32E fai lea ma sapati e malolo ai outou, e puapuagatia ai outou e outou; o le afiafi o le aso iva o le masina, e amata mai i le afiafi e oo lava i le tasi afiafi, tou te fai ai ma sapati e malolo ai.
33Ua fetalai mai foi Ieova ia Mose, ua faapea mai,
34Fai atu ia i le fanauga a Isaraelu, ia faapea atu, O le aso sefulu ma le lima o lea lava fituga masina, o le tausamiga o fale apitaga lea, e faia i aso e fitu ia Ieova.
35O le aso muamua, o le faapotopotoga paia lea; aua tou te fai ai se galuega mamafa e tasi.
36O aso e fitu ia outou avatu ai taulaga e fai i le afi ia Ieova; o le aso valu e fai ai le faapotopotoga paia e outou; ia outou avatu ai se taulaga e fai i le afi ia Ieova; o le faapotopotoga lea; aua tou te fai ai se galuega mamafa e tasi.
37O tausamiga ia ia Ieova tou te tala‘i ai, o faapotopotoga paia, e avatu ai se taulaga e fai i le afi ia Ieova, o le taulaga mu, ma le taulaga i mea e ‘ai, o le taulaga i mea ua fasia, ma le taulaga i mea e inu, o le aso ma ana mea; atoa ma sapati o Ieova,
38atoa foi ma a outou mea foai fua, atoa foi ma mea uma ua outou tauto ai, atoa foi ma taulaga ua outou loto fua ina fai, tou te aumaia ia Ieova.
39O le aso sefulu ma le lima o le fituga masina, pe a uma ona faaputuina e outou le fua o le fanua, ia outou faia lava se tausamiga ia Ieova i aso e fitu; o le aso muamua e fai ma sapati lea, i le ma le aso valu e fai ma sapati foi lea.
40O le aso muamua foi tou te ave ai fua o laau matagofie, o lau pama, ma la o laaufefele, ma garava mai le alia; ma ia outou olioli i luma o Ieova lo outou Atua i aso e fitu;
41ma ia outou fai ai le tausamiga ia Ieova i aso e fitu i lea tausaga ma lea tausaga; o le tulafono e faavavau i o outou tupulaga amuli; ia outou faia le tausamiga i le fituga masina.
42Tou te nonofo i fale apitaga i aso e fitu, o tama a le eleele uma i Isaraelu latou te nonofo i fale apitaga;
43ina ia iloa e o outou tupulaga amuli na ou faanofo ai le fanauga a Isaraelu i fale apitaga, ina ua ou au mai ia i latou ai le nuu o Aikupito; o a‘u o Ieova lo outou Atua.
44Ona ta‘u atu lea e Mose i le fanauga a Isaraelu o tausamiga ia Ieova.
Who We AreWhat We EelieveWhat We Do
2025 by iamachristian.org,Inc All rights reserved.
