1Ona ia toe faafoi mai lea ia te au i le ala o le faitotoa o le mea paia aupito i tua, e faasaga i sasae; a ua punitia ia.
2Ona fetalai mai lea a Ieova ia te au, E punitia lenei faitotoa, e le tatalaina lava, e le ulu atu i ai se tagata; auā ua ulufale mai ai Ieova le Atua o Isaraelu o le mea lea e punitia ai ia.
3Mo le alii sili lea; o le alii sili e nofo ai o ia e ‘ai ai mea e ‘ai i luma o Ieova; na te ulu ane i le ala o le faapaologa o lea faitotoa, na te ulufafo foi i lea lava ala.
4Ua ia au mai foi ia te au i le ala o le faitotoa i le itu i matu i lumāfale; ona ou vaai lea, faauta foi, ua tumu le fale o Ieova i le pupula o Ieova, ona ou faapaūfao ai lea.
5Ona fetalai mai lea o Ieova ia te au, Le atalii e o le tagata, ia e tuu i lou loto, ma ia vaavaai ou mata, ia faalogologo foi ou taliga i mea uma ou te fai atu ai ia te oe i sauniga uma o le fale o Ieova, ma ana tulafono uma; ia e manatunatu i mea e ulufale mai ai i le fale, atoa ma mea e ulufafo ai i le malumalu.
6E te fai atu foi i e fouvale, o le aiga lea o Isaraelu, Ua faapea ona fetalai mai o le Alii o Ieova, Le aiga o Isaraelu e, soia, ina tuu ia a outou mea e inosia uma,
7ona ua outou aumaia o tagata ese, o e le peritomeina loto, e le peritomeina foi tino, ia i ai i lo‘u malumalu, ia faaleagaina ai lo‘u lava fale, ina ua outou aumaia o a‘u mea e ‘ai, o le ga‘o ma le toto, ua outou solia foi la‘u feagaiga i a outou mea uma e inosia.
8Ua outou le anaana foi i le tausiga o a‘u mea paia; a ua outou tofia mo outou lava o e tausia a‘u mea e tausia i lo‘u malumalu.
9Ua faapea ona fetalai mai o le Alii o Ieova, E le ulufale mai i lo‘u malumalu se tagata ese, e le peritomeina le loto, e le peritomeina foi le tino, o tagata ese uma, o e o i ai i le fanauga a Isaraelu.
10O sa Levī foi o e ua o mamao ia te au ina ua o ese o Isaraelu, o i latou na o ese ia te au e mulimuli atu i a latou tupua; e oo lava ia te i latou le taui o a latou agasala.
11A e fai i latou ma auauna i lo‘u malumalu, e leoleo i puipui o le fale, ma auauna i le fale; latou te fasia le taulaga mu, ma le taulaga mo le nuu, latou te tutū foi i o latou luma e auauna ia te i latou.
12Auā na latou auauna ia te i latou i luma o a latou tupua, o i latou foi na agasala ai le aiga o Isaraelu; o le mea lea ua ou sii ai i luga lo‘u lima ia te i latou, o loo o fetalai mai ai le Alii o Ieova, e oo ia te i latou le taui o a latou agasala.
13Latou te le faalatalata mai foi ia te au e fai le faiva o le ositaulaga ia te au, e le faalatalata foi i latou i se tasi o a‘u mea paia i le mea e sili ona paia; a e i ai ia te i latou lo latou mā, ma a latou mea e inosia ua latou faia.
14A e ou te fai i latou ma e tausi i a‘u mea e tausia i lo‘u fale i galuega uma o i ai, atoa ma mea uma e fai.
15A o le au ositaulaga o sa Levī, o le fanauga a Satoka, o e na anaana i le tausiga o lo‘u malumalu, ina ua o ese le fanauga a Isaraelu ia te au, latou te faalatalata mai ia te au e auauna ia te au, e tutū foi i latou i o‘u luma e au mai ai ia te au le ga‘o ma le toto, o loo o fetalai mai ai le Alii o Ieova.
16O i latou ia e ulufale i lo‘u malumalu, o i latou foi e faalatalata mai i la‘u laulau e auauna mai ai ia te au, latou te tausi foi i a‘u mea e tausia.
17A latou ulufale mai i faitotoa o le lotoā tuloto, e oofu i latou i ofu lino; e le oofu lava i latou i se ofu fulufulu mamoe pe a latou auauna i totonu o faitotoa o le lotoā tuloto, ma totonu o le fale.
18E pulou i latou i pulou lino, e oofu foi i ofuvae lino; e le fusi i latou i se mea e tupu ai le afu.
19A latou o atu i le nuu i le lotoā aupito i tua, o le lotoā lava e aupito i tua, latou te to ese o latou ofu na latou auauna a‘i, ma tuu ai i potu sa, a e latou oofu i nisi ofu; latou te le faapaiaina foi le nuu i o latou ofu.
20Latou te le tafi foi o latou ulu, e le tuu foi o latou fuafuati lauulu ia uumi, latou te sele o latou lauulu.
21E le inu uaina foi se tasi ositaulaga lava pe a latou ulufale mai i le lotoā tuloto.
22Latou te le fai avā foi i se fafine ua oti lana tane, po o se fafine ua aleia; a e latou te fai avā i taupou o le fanau a le aiga o Isaraelu, po o se fafine ua oti lana tane sa nofo i se ositaulaga.
23Latou te a‘oa‘o foi i lo‘u nuu ia masino mea paia ma mea e le paia, ina ia latou iloa le mea e le mamā ma le mea e mamā.
24O finauga foi latou te tutū ai e fai le faamasinoga; latou te faamasino i ai e tusa ma a‘u faamasinoga; latou te tausia a‘u tulafono, ma a‘u sauniga i tausamiga uma e fai ia te au; latou te faapaiaina foi o‘u sapati.
25Latou te le papai ane i se tagata oti, e leaga ai i latou; a e le sa ona leaga i latou ona o le tamā, po o le tinā, po o se atalii, po o se afafine, po o se uso, po o se tuafafine e lei nofo tane.
26A uma ona faamamāina o ia, ona latou faitauina lea ia te ia o aso e fitu.
27O le aso foi na te ulufale ai i le malumalu, i le lotoā tuloto, e auauna i le malumalu, na te aumaia lana taulaga mo le agasala, o loo o fetalai mai ai le Alii o Ieova.
28E fai foi lea ma tofi mo i latou; o a‘u o lo latou tofi; tou te le avatu se tofi ia te i latou i Isaraelu; o a‘u lava o lo latou tofi.
29Latou te aai le taulaga i mea e ‘ai, ma le taulaga mo le agasala, ma le taulaga mo le sese; o mea uma foi e faatoina i Isaraelu e fai ia mā latou.
30O le faapolopolo o le uluai fua uma i mea uma, ma taulaga uma i mea uma i a outou taulaga uma, e fai ia mā ositaulaga; tou te avatu foi a outou uluai palugāfalaoa i le ositaulaga, ina ia faatumauina e ia le manuia i lou aiga.
31E le aai foi le au ositaulaga se mea e tasi ua mate fua, po o se mea ua saeia, o se manu lele, po o se manu vaefa.
Who We AreWhat We EelieveWhat We Do
2025 by iamachristian.org,Inc All rights reserved.
