1Ona tofia lea e fai ma tupu e i latou e na nonofo i Ierusalema o Aasaia lona atalii aupito itiiti e sui a‘i o ia; auā na fasiotia o e matutua uma e ‘au na o mai ma tagata Arapi i le toagālauapi. O lea na fai ai ma tupu o Aasaia le atalii o Ioramo le tupu o Iuta.
2E fa sefulu ma le lua o tausaga o Aasaia ina o fai o ia ma tupu; na fai o ia ma tupu i Ierusalema i le tausaga e tasi. O le igoa o lona tinā o Atalia le afafine o Omeri.
3O ia foi ua savali i ala o le aiga o Aapo; auā na taulalo ese lona tinā ia te ia ina ia amio leaga.
4Ua amio leaga o ia i luma o Ieova e faapei o le aiga o Aapo; auā na latou taulalo ese ia te ia, ina ua oti lona tamā, e oo ai lona malaia.
5Ua savali o ia e tusa ma lo latou taulalo ese, ua la o foi ma Ioramo le atalii o Aapo le tupu o Isaraelu e tau ma Asaeli le tupu o Suria i Ramota-Kiliata; ua manua foi Ioramo i tagata o Suria.
6Ua toe foi o ia i Isereelu e fofo ai ona manua na manua ai o ia i Rama ina o tau ma Asaeli le tupu o Suria. Na alu ifo foi Asaria le atalii o Ioramo le tupu o Iuta e asiasi ia Ioramo le atalii o Aapo i Isereelu, auā ua manua o ia.
7O le malaia o Aasaia mai le Atua lea, ina ua sau o ia ia Ioramo; auā na oo i ai, ona la o atu lea ma Ioramo ia Ieu le atalii o Nimesi, o le na faauuina e Ieova ia faaumatia le aiga o Aapo.
8Na maua foi e Ieu o alii sili o Iuta, ma atalii o uso o Aasaia, o e na auauna ia Aasaia, ina o faaoo e ia le sala i le aiga o Aapo, ona fasiotia lea e ia o i latou.
9Na sailiili e ia o Aasaia, na latou pue ia te ia, auā na lafi o ia i Samaria, ona latou aumaia lea o ia ia Ieu; ua latou fasioti foi ia te ia, ona latou tanumia lea o ia; auā ua faapea a latou, o ia o le atalii o Iosefatu, o le na saili ia Ieova ma lona loto atoa. Ua leai foi se toe malosi i le aiga o Aasaia e taofi i le malo.
10Ua iloa e Atalia le tinā o Aasaia ua oti lana tama tane, ona tulai lea o ia, ma faaumatia le fanau uma a le tupu o le aiga o Iuta.
11A o Iosapa le afafine o le tupu, ua ia ave ia Ioasa le atalii o Aasaia, ua āisola ia te ia ai atalii o le tupu e na fasiotia, ma ua tuu o ia ma le na tausi ia te ia i le potu moe. O Iosapa le afafine o le tupu o Ioramo le avā a Ieoiata le faitaulaga, (auā o ia o le tuafafine o Aasaia,) ua natia ai o ia ia le iloa ai e Atalia, ona ia le fasiotia ai lea o ia.
12Sa i ai foi o ia ia te i latou, ua natia i le fale o le Atua i tausaga e ono. Ua fai foi Atalia ma tupu i le nuu.
Who We AreWhat We EelieveWhat We Do
2025 by iamachristian.org,Inc All rights reserved.
