1Na tautala Efaraima ona tupu ai lea o le tetemu, sa mamalu o ia i Isaraelu; a ua oo ina agasala o ia i Paala, ona oti ai lea.
2A o nei ona po ua latou saga agasala pea, ua latou faia mo i latou o tupua uamea, o tupua ua faia i o latou ario, e tusa ma lo latou manatu; o le galuega a tufuga na mea uma; ua faapea la latou upu i ai, Ia feasogi ma tamai povi tagata o e fai taulaga.
3O le mea lea e avea ai i latou e pei o le puao i le taeao, e pei o le sau foi i le vave ao ona mavae atu; e pei o le aputi ua lelea i le matagi i le mea e sasa ai saito, e pei o le asu foi ai le alaasu.
4A o a‘u o Ieova, o lou Atua talu mai le nuu o Aikupito, e te le iloa se tasi Atua na o a‘u; e leai foi se isi faaola, na o a‘u.
5Na ou iloa oe i le vao, o le nuu naumati.
6E pei ona fagaina o i latou, sa faapea ona maoona o i latou; sa maoona i latou, ona faamaualulugaina lea o latou loto; o le mea lea na latou faagalogalo ai ia te au.
7O lea ua avea ai a‘u ia te i latou e pei o se leona; ou te lamalama e pei o se nameri i le auala.
8Ou te oso atu ia te i latou e pei o se urosa ua avea ana tama, ou te saeia mea e ufitai o latou fatu; ou te ‘aina i latou i lea mea e pei o se leona; e saeia i latou e le manu feai.
9Isaraelu e, ua malaia oe ia te oe; a ua ia te au lou fesoasoani.
10O ifea o i ai nei lou tupu le na te faaolaina oe i o outou aai uma? o ifea ou faamasino foi na e fai mai ai, Au mai ia te au se tupu atoa ma ni alii?
11Na ou avatu ia te oe le tupu i lo‘u tiga; na ou aveeseina foi o ia i lo‘u ita.
12Ua fusifusi faatasi le leaga o Efaraima; ua teua lana agasala.
13E oo ia te ia le faatiga o le fafine o le a fanau mai; o ia o le tama faalemafaufau, aua e le tatau ona tuai mai o ia nai le mea e o ifo ai tama.
14Ou te laveai ia te i latou ai le malosi o le tuugamau; ou te faaola ia te i latou ai le oti. Le oti e, o fea o i ai le malaia mai ia te oe? Le tuugamau e, o fea o i ai se mea e fano ai mai ia te oe? e lilo ia te au le salamo.
15E ui ina faauluolaina o ia i luma o ona uso, e agi mai le matagi mai sasae, o le matagi o Ieova e oso atu ia ai le vao, e pe lona vaieli, e mate foi lona punavai; na te faaumatia le oa o mea uma e manaomia.
16E faasalaina Samaria, auā ua ia fouvale i lona Atua; o le pelu latou te pauu ai; e palasi a latou tama meamea, e faatiauina o latou fafine ua totō.
Who We AreWhat We EelieveWhat We Do
2025 by iamachristian.org,Inc All rights reserved.
