1Ua mavae atu ia mea, ona alu atu ai lea o Paulo nai Atenai, ua oo i Korinito;
2ua na iloa foi le tasi tagata Iutaia, o Akula le igoa, na fanau i Pono, na se‘i sau mai Italia, ma lana avā o Pisila; (auā na poloai mai e Kalaotio ia o ese atu i Roma tagata Iutaia uma lava;) ua alu atu o ia ia te i laua;
3ona ua tasi foi lo latou faiva, ua nofo o ia ia te i laua, ma galue; auā o lo latou faiva le fai fale ie.
4Ua lauga foi o ia i le sunako i lea sapati ma lea sapati, ma pulunaunau atu ia Iutaia atoa ma Eleni.
5A ua o mai Sila ma Timoteo mai Maketonia, ona tinoū lea o le loto o Paulo, ua ta‘utino atu i tagata Iutaia o Iesu o le Keriso lea.
6Ua faatu‘iese mai i latou ma upu leaga, ona lulu atu lea e ia o ona ofu, ua fai atu ia te i latou, O lo outou na toto e i luga o outou ulu lea; ou te mamā; e afua i le aso nei ona ou alu i nuu ese.
7Ona alu atu ai lea o ia, ua ulu atu i le fale o le tasi tagata mata‘u i le Atua o Iuso le igoa, ua soo ane i le sunako lona fale.
8O Kiripo foi le pule i le sunako, ua faatuatua i le Alii o ia ma lona aiga uma; e toatele foi tagata Korinito o e na faalogo ua faatuatua i latou, ma ua papatisoina.
9Ona fetalai mai lea o le Alii ia Paulo i le faaaliga i le po, Aua e te fefe, a ia e tautala atu, aua le faalologo;
10auā ou te ia te oe, e leai foi se tasi e oso mai ia te oe e faasaua ia te oe; auā e toatele o‘u tagata o i lenei aai.
11Ua ia nofo atu ai pea o le tausaga atoa ma masina e ono, ua a‘oa‘o atu ia te i latou i le afioga a le Atua.
12Ua fai Kaliona ma suikonesula i Akaia, ona feosofi mai lea o Iutaia ia Paulo ma le loto gatasi, ua ta‘ita‘i i latou ia te ia i le nofoa faamasino, ua faapea ane,
13Ua ole lenei tamaloa i tagata ia tapuai i le Atua ma le le tusa i le tulafono.
14O le a oo atu le lauga a Paulo, a ua fai mai Kaliona i tagata Iutaia, Iutaia e, afai o se saua, po o se ulavale leaga, e tatau ona ou usiusitai ia te outou;
15peitai afai o se suega i se mataupu, ma igoa, ma la outou tulafono, faitalia lava outou; auā ou te le mafai ona fai a‘u ma faamasino i na mea.
16Ona tuli atu lea e ia ia te i latou i le nofoa faamasino.
17Ona pue lea e Eleni uma lava ia Sosene lē pule i le sunako, ua fasi ia te ia i luma o le nofoa faamasino. A ua le manatu e Kaliona i se tasi mea o ia mea.
18Ua nofo pea Paulo i aso e tele, ona faamāvae atu lea o ia i le au uso, ua latou folau atu i Suria, o i latou ma Pisila ma Akula; ua na sele mamā lona lauulu i Kenikerea; auā ua na fai lana tautoga.
19Ua oo i gatai o Efeso, ona tuua lea e ia o i laua i lea mea; a ua ulufale o ia i le sunako, ma lauga ia Iutaia.
20Ua aioi i latou ia te ia ia toe nofo i nai ona aso ma i latou; ua le mafai o ia.
21A ua faamāvae o ia ia te i latou, ua faapea atu, E tatau lava ina ou i ai i le tausamiga o le a fai i Ierusalema; a ou te toe foi mai ia te outou, pe a finagalo i ai le Atua. Ona tuuvaa atu lea o ia i Efeso.
22Ua oo atu i Kaisareia, ua alu ae, ma alofa atu i le ekalesia, ona alu ifo lea o ia i Anetioka.
23Ua fāi po foi, ona alu atu lea o ia, ua alu solo i le nuu o Kalatia ma Ferukia, ua faamalosia e ia le au soo uma.
24Ua sau foi i Efeso le tasi tagata Iutaia, o Apolo le igoa, o Alesania na fanau ai, o le tagata mau upu, ma le poto i Tusi.
25Ua a‘oa‘oina lenei tagata i le ala o le Ali; ua malosi foi lona loto, ua tautala atu o ia ma matuā a‘oa‘o atu i upu a le Alii, na o le papatisoga a Ioane ua iloa e ia.
26Ua afua foi ona tautala faamalosi o ia i le sunako; ua faalogo atu Akula ma Pisila ia te ia, ona la ave lea ia te ia, ma faamatala atu atili le ala o le Atua ia te ia.
27Ua loto o ia e alu atu i Akaia, ona tusi atu lea o le au uso, ma aioi atu i le au soo ia talia mai o ia; ua oo foi o ia, ona fesoasoani tele lea o ia i e na faatuatua ona o le alofa tunoa.
28Auā ua finau māua‘i o ia i tagata Iutaia ma le faamalosi i luma o le nuu, ua faasino atu i Tusi, o Iesu o le Keriso lea.
Who We AreWhat We EelieveWhat We Do
2025 by iamachristian.org,Inc All rights reserved.
