1A Faaooina oe e Ieova lou Atua i le nuu o le a e alu i ai e fai mo oe, a tulia foi e ia o nuu e tele i ou luma, o sa Hetī, ma sa Kirekasē, ma sa Amorī, ma sa Kananā, ma sa Perisē, ma sa Hivī, atoa ma sa Iepusē, o nuu e fitu e sili ona toatele ma le malolosi ia te oe;
2a tuuina mai i latou ia te oe e Ieova lou Atua e te fasia i latou, ia e matuā faaumatia lava i latou, aua e te osi se feagaiga ma i latou, aua foi e te alofa ia te i latou.
3Aua le fetaiai gafa ma i latou, aua le avatu lou afafine mā lona atalii, aua foi ne‘i e au mai lona afafine mā lou atalii;
4auā e faaliliueseina e ia lou atalii, ia le mulimuli mai ia te au, a e auauna i atua ese; ona tupu ai lea o le toasa o Ieova ia te outou, ma vave faaumatia ai oe.
5A ia faapea ona fai e outou ia te i latou, ia outou sofaia o latou fata faitaulaga, ia outou tu‘ipalaina o latou tupua, ma vavae i lalo o latou tupua o Asaira, o latou tupua foi ua ta ia outou susunu i le afi;
6auā o oe o lo nuu paia mo Ieova lou Atua, na filifilia oe e Ieova lou Atua ina ia avea ma nuu mona, o le oloa tāua e sili i nuu uma lava o i le fogāeleele.
7E le ona ua sili ona toatele outou i nuu uma na manao ai Ieova ia te outou, ma na filifilia outou, auā na sili ona toaitiiti outou i nuu uma lava;
8a e peitai ona ua alofa lava Ieova ia te outou, ona o lona tausi foi o le tautoga na ia tauto ai i o outou tamā, ua au mai ai outou e Ieova i le aao malosi, na ia faaolaina foi oe ai le mea sa nofo pologa ai, ai le lima o Farao le tupu o Aikupito.
9Ia e iloa foi o Ieova lou Atua o le Atua lava ia, o le Atua faamaoni, o le na te tausi i le feagaiga atoa ma le alofa i e alolofa atu ia te ia ma tausiusi i ana poloaiga, e oo lava i le afe o tupulaga;
10a e tauia e ia o e ‘ino‘ino ia te ia i o latou lava luma, ia faaumatia i latou; e le faatuai o ia i lē ‘ino‘ino ia te ia, a e taui atu ia te ia i ona lava luma.
11O lenei, ia e tausi i poloaiga, ma tulafono, ma faamasinoga ou te fai atu ai ia te oe i le aso nei ia faia.
12Afai foi tou te faalogo i ia faamasinoga ma tausi i ai ia faia, ona tausi lea e Ieova lou Atua o le feagaiga ma le alofa ia te oe na ia tauto ai i ou tamā;
13e alofa mai foi o ia ia te oe, ma faamanuia ia te oe, ma faatoateleina oe; e faamanuia foi e ia i lau fanau, ma le fua o lou laueleele, o lau saito, ma lau uaina, ma lau suāuu, o tama a au povi, ma au lafu mamoe i le laueleele na na tauto ai i ou tamā e foai atu ia te oe.
14E sili lou manuia i nuu uma lava; e leai se tane e pa po o se fafine pa ia te oe atoa ma au manu.
15E ave ese e Ieova o ma‘i uma lava ia te oe, na te le tuuina mai ia te oe se tasi ma‘i o ma‘i leaga o Aikupito na e iloa, a e tuuina atu ia te i latou uma o e ‘ino‘ino ia te oe.
16Ia e faaumatia nuu uma lava ua tuuina mai e Ieova lou Atua ia te oe; aua ne‘i e alofa ia te i latou, aua ne‘i e auauna foi i o latou atua; auā e avea lea mea ma mailei ia te oe.
17Afai e te faapea ifo i lou loto, O nuu ia e sili ona toatele ia te au, ou te mafaia faapefea ona tulia o i latou?
18Aua lava e te mata‘u ia te i latou; ia e matuā manatua mea na faia e Ieova lou Atua ia Farao ma Aikupito uma lava;
19o tofotofoga tetele sa vaai atu i ai ou mata, ma faailoga, ma vavega, ma le aao malosi, ma le aao faaloaloaina, na au mai ai oe e Ieova lou Atua; e faapea lava ona faia e Ieova lou Atua i nuu uma lava e te mata‘u ai.
20E auina atu foi le lagomumu ia te i latou e Ieova lou Atua, seia faaumatia ai e o totoe, ma ua lalafi nai ou luma.
21Aua lava e te atuatuvale ona o i latou, auā o Ieova lou Atua o ia te oe, o le Atua silisili ia ma le matautia.
22E tulia auauai e Ieova lou Atua ia nuu ai ou luma, e te le vave faaumatia i latou, ne‘i tupu tele ai manu feai e tigaina ai oe.
23A e tuuina mai i latou e Ieova lou Atua i ou luma, ma faaumatia i latou i le malaia tele, seia matuā faaumatia i latou.
24Na te tuuina mai foi o latou tupu i lou lima, e te tineia foi o latou igoa ai le lalolagi; e leai lava se tagata e tu mai e tetee ia te oe seia oo ina faaumatia i latou e oe.
25O tupua ua ta o latou atua ia e susunu i le afi; aua e te manao i le ario ma le auro o i ai, aua foi e te ave mā oe, ne‘i maileia ai oe; auā o le mea e inosia lea e Ieova lou Atua.
26Aua e te avatu i lou fale se mea e inosia, ne‘i fetuuina oe pei o lea mea; ia e matuā ‘ino‘ino i ai, ma ia matuā inosia e oe, auā o le mea fetuuina lava lea.
Who We AreWhat We EelieveWhat We Do
2025 by iamachristian.org,Inc All rights reserved.
