1Ua fai ifo Tavita i lona loto, E iu ina ou oti se aso i le lima o Saulo; e leai se mea e lelei ia te au na ona ou matuā sola i le nuu o Filisitia; ona tuua lea o a‘u e Saulo, e le toe saili ia te au i nuu uma o Isaraelu, ona ou sao ai lea i lona lima.
2Ona tulai lea o Tavita, ua alu atu o ia atoa ma tagata e toaono galau sa ia te ia, ia Akisa le atalii o Maoka, le tupu o Kata.
3Ua nonofo Tavita ma Akisa i Kata, o ia ma ona tagata, taitasi ma lona aiga; o Tavita foi ma ana avā e toalua, o Ainoama le Isereelu, ma Apikaila le avā a Napalu le Karamelu.
4Ua tauina atu ia Saulo, ua sola Tavita i Kata, ona le toe saili lea o ia ia te ia.
5Ua fai atu Tavita ia Akisa, Afai ua alofagia a‘u e oe, ia tuu mai se mea ou te nofo ai i se faoa aai, ona ou nofo lea i lea mea; se a le mea e nofo ai lau auauna i le aai o le tupu faatasi ma oe?
6Ona tuu atu lea e Akisa ia te ia i lea lava aso o Sekeleka; o le mea lea ua fai ai Sekeleka mo tupu o Iuta, ua oo i lenei aso.
7O ona aso atoa sa nofo ai Tavita i le nuu o Filisitia, o le tausaga ma masina e fa.
8Ua o ae Tavita ma ona tagata, ua latou osofia Kasuri, ma Kasera, ma Amaleka; auā o i latou nei sa nonofo i le nuu mai le vavau, i le mea e alu atu ai i Sura, e oo atu i le nuu o Aikupito.
9Ua fasi e Tavita le nuu, ua le faaola se tane po o se fafine, ua ia au mai foi o mamoe, ma povi, ma asini, ma kamela, ma ofu; ona foi mai lea o ia, ua alu ia Akisa.
10Ua fai mai Akisa, Po o fea nuu na outou osofia i le aso? Ua fai atu Tavita, O le itu i toga o sa Iutā, ma le itu i toga o sa Ieramaelū, ma le itu i toga o sa Kenī.
11Ua le faaola e Tavita se tane po o se fafine e sau i Kata, o loo faapea ane, Ne‘i ta‘ua i tatou e i latou, e faapea, O loo faapea ona fai e Tavita; o le a faapea foi lana amio i aso uma e nofo ai o ia i le nuu o Filisitia.
12Ua talia e Akisa le tala a Tavita, ua faapea ane o ia, Ua matuā inosia o ia ia te ia e lona nuu o Isaraelu; o lea e fai ai o ia ma auauna ia te au e faavavau.
Who We AreWhat We EelieveWhat We Do
2025 by iamachristian.org,Inc All rights reserved.
