1Ia outou faalogologo i lenei upu o outou povi fafine o Vasana, o loo i le mauga o Samaria, o e faasaua i e vaivai, ma faasaunoa i e matitiva, o e faapea atu i o latou matai, Au mai ia, matou te feinu ai.
2Ua tauto le Alii o Ieova i lona paia, faauta, e oo mai aso ia te outou na te aveeseina ai outou i mātau, ma la outou fanau i mātau i‘a.
3Tou te o atu foi i mea ua lepetia, taitasi i le mea ua ia lumanai ai, e lafoaiina outou ai le maota, o loo fetalai mai ai Ieova.
4Ia outou o mai i Peteli, ma fai ai amio leaga; ina faatele ia agasala i Kilikala; ia outou avatu i taeao a outou taulaga, ma mea e sefulu a‘i a outou mea i lona tolu o tausaga.
5Ina fai ia se taulaga faafetai i mea ua faafefeteina; ia outou tala‘iina taulaga e faia ma le loto, ia outou logo atu ai; auā o lo outou loto lea, le fanauga a Isaraelu e, o loo fetalai mai ai le Alii o Ieova.
6O a‘u foi, ua ou avatu ia te outou nifo mamā i a outou aai uma, ma le oge i mea e ‘ai i o outou nuu uma; a ua outou le toe foi mai lava ia te au, o loo fetalai mai ai Ieova.
7Ua ou taofia foi le ua ia te outou, a e toe tolu masina i le oo ai le seleselegāsaito; ua ou faatotō ifo le ua i le tasi aai, a o le isi aai ua ou le faauaina; ua uaina le tasi pito nuu, a o le nuu e lei uaina ua mago lea.
8Ona o atu ai lea o aai pe lua pe tolu i le tasi aai e inu vai ai; a ua le malilie; a ua le toe foi mai lava outou ia te au, o loo fetalai mai ai Ieova.
9Ua ou taia outou i le mamae ma le polopologā; ua ‘aina e le sē kasama o outou faatoaga, ma o outou tovine, ma o outou mati, ma outou olive; a na le toe foi mai outou ia te au, o loo fetalai mai ai Ieova.
10Ua ou auina atu ia te outou le faamai, e pei ona i ai i Aikupito; ua ou fasia i le pelu o outou taulelea, o outou solofanua foi ua aveeseina; ua ou faaoo ae i o outou pogaiisu le elo o a outou toagālauapi; a ua outou le toe foi mai ia te au, o loo fetalai mai ai Ieova.
11Ua ou faaumatia nisi o outou, faapei ona faaumatia e le Atua o Sotoma ma Komoro; e pei o le motumotu o le afi outou ua seia mai le afi; a ua outou le toe foi mai ia te au, o loo fetalai mai ai Ieova.
12O le mea lea e faapea ai ona ou faia ia te oe Isaraelu e, Ou te fai lenei mea ia te oe, o le mea lava lea Isaraelu e, ia e sauni ai lua te fetaiai ma lou Atua.
13Auā faauta mai, o le na faia mauga, ma na faia le matagi, ma ua faailoaina atu i le tagata lona manatu, o le na te liua le taeao i le pouliuli, o lē savali i luga o mea maualuluga o le lalolagi, o Ieova, o le Atua o ‘au, o lona suafa lea.
Who We AreWhat We EelieveWhat We Do
2025 by iamachristian.org,Inc All rights reserved.
