1Sa i ai le oge i le nofoaiga a Tavita i tausaga e tolu, na faasosoo ia tausaga; ona fesili ai lea o Tavita ia Ieova. Ua fetalai mai Ieova, Ua tupu ai ona o Saulo ma lona aiga ua totolima, ina ua na fasiotia tagata o Kipeona.
2Ona aami lea e le tupu i tagata o Kipeona, ua fai atu o ia ia te i latou; (a o tagata o Kipeona e le ni fanauga a Isaraelu i latou, a o e na totoe o sa Amorī, na fai ai le tautoga a le fanauga a Isaraelu ia te i latou; a o Saulo, na ia saili e fasi ia i latou i lona maelega ona o le fanauga a Isaraelu ma Iuta);
3ua fai atu Tavita i tagata o Kipeona, Se a se mea ou te faia mo outou? Se a foi se mea ou te togiola a‘i, ina ia outou faamanuia le tofi o Ieova?
4Ua fai mai tagata o Kipeona ia te ia, E te le aumaia mā matou ario po o auro mai ia Saulo ma lona aiga; e le fasiotia foi se tagata o Isaraelu ona o i matou. Ua fai atu o ia, O le mea tou te fai mai ai, ou te faia lava lea mo outou.
5Ona latou fai mai lea i le tupu, O le tagata na faaumatia i matou, ma na manatu leaga ia i matou ina ia faaumatia i matou, ia le nonofo i matou i le laueleele uma lava o Isaraelu;
6tuu mai ia ia te i matou tagata e toafitu ai lana fanau, matou te faatāutauina i latou i luma o Ieova i Kipea o Saulo o le na filifilia e Ieova. Ua fai atu le tupu, Ou te avatua lava.
7A ua faasao e le tupu ia Mefiposeta le atalii o Ionatana le atalii o Saulo, ona o le tauto ia Ioeva sa ia te i laua o Tavita atoa ma Ionatana le atalii o Saulo.
8A ua ave e le tupu tama e toalua a Risepa le afafine o Aia, na ia fanau ia Saulo, o Aremoni ma Mefiposeta; ma tama e toalima a Mekala le afafine o Saulo, na ia tausia ma Atarielu le atalii o Pasili le Malata;
9na ia tuuina atu i latou i lima o tagata o Kipeona; ona latou faatāutauina lea o i latou i le mauga i luma o Ieova, ua pauu faatasi i latou e toafitu; na fasiotia foi i latou i aso muamua o le seleselega i le amataga o le seleselega karite.
10Ona ave lea e Risepa le afafine o Aia le ie talatala, ma na fofola mo ia i le papa, e afua mai i le amataga o le seleselega, ua oo ina maligi mai le vai mai le lagi ia te i latou; ua le mafai ia te ia ona tuu ai o se manu lele ia te i latou i le ao, po o se manu feai i le po.
11Ua ta‘uina atu ia Tavita le mea na faia e Risepa le afafine o Aia le palake a Saulo;
12ona alu atu lea o Tavita, ua na avea ivi o Saulo ma ivi o Ionatana lona atalii mai tagata o Iapese-Kiliata, na latou gaoia nai le malae o Petesani, na faatāutauina ai i lea mea e Filisitia i ona po na fasia ai Saulo e Filisitia i Kilepoa.
13Ua ia avae nai lea mea o ivi o Saulo ma ivi o Ionatana lona atalii, ma ua faatasi ai ivi o e na faatāutauina.
14Ua latou tanumia ivi o Saulo ma Ionatana lona atalii i le laueleele o Peniamina i Sela, i le tuugamau o Kiso lona tamā; ma latou faia mea uma na poloai ai le tupu; ona faafofoga lea o le Atua i le tatalo mo le laueleele, ina ua uma ia mea.
15Ona toe tau lea o le taua a Filisitia ma Isaraelu, ua alu ifo ai Tavita ma ana auauna faatasi ma ia, ua latou tau ma Filisitia; ona vaivai ai lea o Tavita.
16O Isepenopa foi, o so le fanau a Rafa, o le mamafa o lona tao e tolu selau o sekeli o ‘apa memea, o ia ua fusia i le pelu fou, na faapea a ia, na te fasia Tavita.
17Ona fesoasoani lea ia te ia o Apisai le tama a Seruia, ma na taia le Filisitia, ma fasiotia o ia. Ona tauto ai lea o tagata o Tavita ia te ia, ua faapea, E te le toe maliu atu ma i matou i le taua, ina ne‘i tineia le malamalama o Isaraelu.
18Mulimuli ane i nei mea, ua toe tau le taua ma Filisitia i Kopa; ona fasia lea e Sepekai o le sa Usā, o Sapa o so le fanau a Rafa.
19Ona toe tau lea o le taua ma Filisitia i Kopa; ona fasia lea e Eleana le atalii o Ari-oreki le Peteleema, o le uso o Koliata le Kata; o le fuata o lona tao ua pei se laau faalava o lē lalaga ie.
20Ua toe tau le taua i Kata; sa i ai le tagata maualuga, o ona tamatamai lima ma ona tamatamai vae ua taiono, e lua sefulu ma le fa ona atoatoa; o ia foi o le atalii o le sa Rafā.
21Ua ia faifai ia Isaraelu, ona fasia lea o ia e Ionatana le atalii o Sama le uso o Tavita.
22O i latou nei e toafā na fanau ia Rafa i Kata; ua oti i latou i le lima o Tavita, ma lima o ana auauna.
Who We AreWhat We EelieveWhat We Do
2025 by iamachristian.org,Inc All rights reserved.
