1Ua fetalai mai Ieova ia Mose, Ina alu ia ia Farao, ma fai atu ia te ia, O loo faapea ona fetalai mai o Ieova; ia e tuu mai lo‘u nuu e o, ina ia latou auauna mai ia te au.
2Afai foi e te le mafai ona tuu mai o i latou e o, faauta, ou te taia lou nuu uma lava i rane.
3E tutupu tele mai o rane i le vaitafe; e ae mai, ma ulufane i lou fale, i lou afeafe moe, ma lou moega, ma le mea e te taoto ai, o fale foi o au auauna, atoa ma lou nuu, o au ogaumu foi, ma au mea e palu ai falaoa;
4e o ae rane i luga ia te oe, ma luga o lou nuu, ma luga o au auauna uma lava.
5Ua fetalai mai foi Ieova ia Mose, E te fai atu ia Arona; ina faaloaloa ia lou lima e i ai lou tootoo i luga o vaitafe, ma vaita‘i, ma vailepa, ma ia faaae mai rane i le nuu o Aikupito.
6Ona faaloaloa lea e Arona o lona lima i vai o Aikupito, ona ae mai ai lea o rane, ua lilo ai lava le nuu o Aikupito.
7Ua faapea ona fai foi e taulāitu i a latou togafiti faataulāitu; ua faaae foi e i latou o rane i le nuu o Aikupito.
8Ona valaau lea o Farao ia Mose ma Arona, ua fai mai, Ina faatoga ia oulua ia Ieova ia ave ese e ia o rane ia te au ma lo‘u nuu, ona ou tuu atu lea o le nuu e o, ina ia latou fai taulaga ia Ieova.
9Ua tali atu Mose ia Farao, Ia e faatonu mai ia te au, po o afea ou te faatoga atu ai mo oe, ma au auauna, ma lou nuu, ia faaumatia ai rane o ia te oe ma ou fale, ina ia gata i le vaitafe ona i ai?
10Ua fai mai o ia, O a taeao; ona fai atu lea o Mose, E faia faapei o lau afioga, ina ia e silafia, e leai se tasi e tusa ma Ieova lo matou Atua;
11e mavae atu rane o ia te oe, ma ou fale, ma au auauna, ma lou nuu, na o le vaitafe e gata ai.
12Ona o i fafo lea o Mose ma Arona nai ia Farao; ua alaga atu foi Mose ia Ieova ona o rane ua ia tuuina atu ai ia Farao.
13Ona faia lea e Ieova e tusa ma le upu a Mose; ua mamate ai rane nai o latou fale, ma faoa aai, atoa ma fanua.
14Ua latou faapotopoto ai foi i faupuegārane, ua elo ai le nuu.
15Ua iloa e Farao, ua na maua sina mapu, ona faamaaa ai lea e ia o lona loto, ma na le faalogo ia te i laua, faapei ona fetalai mai ai o Ieova.
16Ona fetalai mai lea o Ieova ia Mose, Ia e fai atu ia Arona, faaloaloa ia lou tootoo, ma ta a‘i le efuefu o le fanua, ina ia liu ‘utu i le nuu uma lava o Aikupito.
17Na la faia foi faapea, na faaloaloa e Arona lona lima sa i ai lona tootoo, na ia ta i le efuefu o le fanua, i le, ua fai ma ‘utu i tagata atoa ma manu; ua liu ‘utu o le efuefu uma lava i le fanua i le nuu uma lava o Aikupito.
18Ua faapea ona fai foi e taulāitu i a latou togafiti faataulāitu, ina ia tutupu ae o ‘utu, a e le mafaia; sa i ai foi o ‘utu i tagata atoa ma manu.
19Ona fai atu lea o taulāitu ia Farao, O le aao lenei o le Atua; a ua maaa pea le loto o Farao, e lei faalogo o ia ia te i laua, faapei ona fetalai mai ai o Ieova.
20Ua fetalai mai foi Ieova ia Mose, Ia e ala usu atu i le taeao, ma ia e tu i luma o Farao; faauta, o le a alu ane o ia i le vai, ma ia e fai atu ia te ia. O loo faapea ona fetalai mai o Ieova, tuu mai ia lo‘u nuu e o, ina ia latou auauna mai ia te au;
21auā a ē le mafai ona tuu mai lo‘u nuu e o, ona ou auina atu lea ia te oe, ma au auauna, ma lou nuu, ma ou fale, o le vao garova; e tutumu foi fale o Aikupito atoa ma le laueleele o i ai latou i garova.
22Ou te vavae ese foi i lea lava aso o le laueleele o Kosena e i ai lo‘u nuu, ina ia le oo i ai ni garova, ina ia e iloa ai o a‘u lava o Ieova le pule i le lalolagi.
23Ou te tuu ai foi se tuaoi i le va o lo‘u nuu ma lou nuu; e fai lava lenei faailoga a taeao.
24Ona faapea lava lea ona fai e Ieova, ua oo mai ai garova e tele lava i le fale o Farao, ma fale o ana auauna, ma le nuu atoa uma o Aikupito; ua leaga le nuu ona o le vao garova.
25Ona valaau lea o Farao ia Mose ma Arona, ua fai mai i ai, Ina o ia outou, ma fai taulaga i lo outou Atua i le nuu na.
26A ua fai atu Mose, E le tatau ona matou faia faapea; auā o mea e inosia e Aikupito, o le a matou fai a‘i taulaga ia Ieova lo matou Atua; faauta, a matou fai a‘i taulaga i mea e inosia e Aikupito i o latou lava luma, latou te le fetogi mai ea ia te i matou i maa?
27Matou te o Malaga i aso e tolu i le vao, matou te fai taulaga ai ia Ieova lo matou Atua, faapei ona fetalai mai ai o ia te i matou.
28Ona fai mai lea o Farao, Ou te tuuina atu outou e o, ma ia outou fai taulaga ia Ieova lo outou Atua i le vao; tau lava ina ne‘i outou o mamao; ia oulua faatoga mo a‘u.
29Ua tali atu Mose, Faauta, ou te alu ese nei ia te oe, ou te faatoga atu foi ia Ieova ina ia aveesea le vao garova ia Farao, ma ana auauna, ma lona nuu o a taeao; tau lava ina ne‘i toe pepelo Farao i lona le tuuina mai le nuu e o e fai taulaga ia Ieova.
30Ona alu ese lea o Mose ia Farao, ua na faatoga atu foi ia Ieova.
31Ua fai foi e Ieova e tusa ma le upu a Mose, ua ave ese le vao garova ia Farao, ma ana auauna, ma lona nuu, ua le toe ai se tasi.
32A ua toe faamaaa e Farao i lona loto i lenei mea, ua na le tuuina mai lava le nuu e o.
Who We AreWhat We EelieveWhat We Do
2025 by iamachristian.org,Inc All rights reserved.
