1Ona tali mai ai lea o Elifasa le Timanu, ua faapea mai,
2E aoga ea le tagata i le Atua, e pei ona aoga o le ua poto ia te ia lava?
3Se mea ea e fiafia ai Le e ona le malosi uma lava ina ua e amiotonu? Po ua aoga ia te ia ina ua sao o au amio?
4E faia ea e ia se finauga ma oe ona o le mata‘u ia te oe? Na te faia ea se faamasinoga faatasi ma oe?
5E le ua tele ea au amio leaga, e ai foi se gataaga o au agasala?
6Auā ua e talia fua lava mai ou uso le mea tuu faafaatau; ua e to ese foi ofu o e matitiva.
7Ua e le avatua le vai i le ua lailoa ia inu ai; ua e le avatua foi le mea e ‘ai i le ua fia ‘ai.
8A o le tagata malosi, ua fai mona le laueleele; ua mau ai foi le alii mamalu.
9Ua e aaufuaina atu fafine ua oti a latou tane; ua gauia foi lima o e ua aumatuā.
10O le mea lea ua siosiomia ai oe i mailei; ua faaatuatuvaleina ai foi oe i le mata‘u faafuasei;
11po o le pouliuli e te le iloa ai se mea, ma vai e tele ua lofia ai oe.
12E lē o i le lagi i luga ea le Atua? Ina vaai ia foi i le maualuga o fetu, ua maualuluga lava!
13Ua e fai mai foi, Pe silafia mai faapefea le Atua? E mafai ea ona faamasino mai o ia i tua mai o le pogisa?
14Ua fai ao uliuli ma puipui ia te ia, ua ia le silafia mai ai; ua feafioai foi o ia i le faataaliolio o le lagi.
15Ua e mafaufau ea i le ala tuai na savavali ai tagata amio leaga?
16O e na aveeseina faafuasei, na lofia o latou faavae i le lolo.
17O e na fai atu i le Atua, Ina alu ese ia oe ia te i matou; i le ma lea, Se a se mea e faia e Le e ona le malosi uma lava mo i latou?
18A e peitai sa faatumuina e ia lava o latou fale i mea lelei. Ia mamao ia te au le filifiliga a e amio leaga!
19E iloa e tagata amiotonu, ma latou olioli ai; o e ua sao foi a latou amio, latou te tauemu ia te i latou.
20E, ua fano le na fai i tatou mona fili, ua faaumatia i le afi la latou faulaigāmea!
21Ia e faamasani ma ia, e te filemu ai; o le mea lea e oo mai ai le manuia ia te oe.
22Ia e talia le tulafono mai lona fofoga, ma ia e tuu ana afioga i lou loto.
23Afai e te foi atu i Le e ona le malosi uma lava, e atiina ae ai oe; ia e faateamamaoina le amioletonu i ou fale ie.
24Ona e teu ai lea o auro e sili i le efuefu, o auro foi o Ofeira e pei o maa o alia.
25E avea foi Le e ona le malosi uma lava ma au auro, ma faulaigāario ma oe.
26Ona e fiafia ai lea i Le e ona le malosi uma lava, ma faasaga ae ou mata i le Atua.
27E te talotalo ia te ia, na te faafofoga mai foi ia te oe; e te faataunuuina foi mea na e tauto ai.
28O le mea foi e te filifili e fai, e faatumauina lea mo oe; e pupula foi le malamalama i ou ala.
29Pe a faamaulaloina nisi, ona e fai atu lea, E faaeaina. Na te faaolaina foi le ua faamaulalo.
30Na te laveaiina le ua sala; e laveaiina foi o ia e ou lima mamā.
Who We AreWhat We EelieveWhat We Do
2025 by iamachristian.org,Inc All rights reserved.
