1Ua fetalai mai foi Ieova ia Mose i le mauga o Sinai, ua faapea mai,
2Fai atu ia i le fanauga a Isaraelu, ia faapea atu ia i latou, A outou oo i le nuu ou te avatu ai ia te outou, ona fai ai lea se sapati e mapu ai le laueleele ia Ieova.
3E ono tausaga e te lulu ai saito i lou fanua, e ono tausaga e te teuteu ai lou tovine, ma faaputu ai ona fua.
4A o le fitu o tausaga e fai ma sapati lea e mapu ai le laueleele, o le sapati ia Ieova; aua e te lulu ai ni saito i lou fanua, aua foi e te teuteu ai lou tovine.
5O mea e tutupu fua nai lau seleselegāsaito, aua e te seleseleina, aua foi e te tau ni fua o lou vine ua le teua; o le tausaga lea e mapu ai le laueleele.
6O le sapati o le laueleele e fai lea ma mea e ‘ai ma outou, o oe ma lau auauna tane, ma lau auauna fafine, ma le ua fai lau galuega i le totogi, atoa ma le tagata ese o loo āumau ia te oe;
7ma au manu fanua atoa ma manu o le vao o i lou nuu, e fai ma mea e ‘ai o mea uma e tutupu ai.
8Ia e faitauina tausaga faasapati e fitu, e fitu ni fitu o tausaga; o le atoatoa foi o tausaga faasapati e fitu, e fagafulu ma le iva ia tausaga.
9Ona ili ai lea o le pu ma le leo tele i le aso e sefulu o le fituga masina, i le aso o le togiola, ia outou ili ai le pu i lo outou nuu uma lava.
10Ia outou faasaina le tausaga e limagafulu, ma tala‘i ai le saolotoga i lo outou nuu i e nonofo ai uma lava; e fai lea ma iupeli ia te outou, ma ia outou toe foi atu taitoatasi i lona lava fanua, ia outou toe foi atu foi taitoatasi i lona lava aiga.
11O le tausaga e limagafulu e fai lea ma iupeli ia te outou; aua tou te lulu ai ni saito, pe selesele ai mea e tutupu fua, pe tau ai ni fua o lou vine ua le teua.
12Auā o le iupeli lea; e paia lava ia te outou; o mea e tutupu ai i le fanua ia outou aai ai.
13O le tausaga foi o lea iupeli e toe foi atu ai outou e taitoatasi i lona lava fanua.
14Afai foi e te faatau atu se mea i lē lua te tuaoi, pe faatau mai se mea i ai le lima o lē lua te tuaoi, aua tou te faasaua le tasi i le tasi.
15E tusa ma le faitau o tausaga talu le iupeli ia e faatau mai ai i lē lua te tuaoi, e tusa foi ma le faitau o tausaga e fua mai ai, ia faatau mai ai o ia ia te oe;
16e tusa ma le tele o tausaga ia e faatele ai lona tau, e tusa foi ma le itiiti o tausaga ia e faaitiiti ai lona tau; auā e tusa ma le faitau o fuata e faatau mai e ia ia te oe.
17Aua lava tou te faasaua le tasi i le tasi; a ia e mata‘u i lou Atua; auā o a‘u o Ieova lo outou Atua.
18Ia outou faia foi a‘u tulafono, ma tausiusi i a‘u faamasinoga, ma fai ai; tou te nonofo ai i le nuu ma le filemu.
19E fua mai foi le fanua i ona fua, tou te aai ai, ma maoona ai, ma nonofo ai ma le filemu.
20Afai foi tou te fai mai, O ā mea matou te aai ai i le tausaga e fitu? faauta, matou te le luluina ni saito, pe faaputu ai ni a matou mea e tutupu.
21Ou te pule atu le manuia ia te outou i le ono o tausaga, ona fua mai ai lea i ona fua e tatau ma tausaga e tolu.
22Tou te luluina saito i lona valu o tausaga, ma aai pea lava i mea tuai seia oo lava i lona iva o tausaga; seia matua ni ona fua tou te aai pea lava i mea tuai.
23E le faatauina le fanua, ia faato; auā e o‘u lava le fanua; auā o tagata ese outou ma ē āumau ia te au.
24O le nuu uma e fai mo outou, ia outou tuu atu ia toe faatauina le fanua.
25Afai ua oo ina mativa lou uso, ma ua faatauina atu e ia sona fasi fanua, afai foi ua alu ane se tasi o lona aiga e toe faatau mai ai, ona toe faatauina mai ai lea e ia le mea na faatauina atu e lona uso.
26Afai ua le o ia te ia se tasi e toe faatauina mai, a ua maua e ia lava ni mea e tusa ma le toe faatau mai o le fanu;
27ona faitau lea e ia o tausaga o lana faatau, ma toe avane ai o mea o totoe i le tagata na ia faatau atu ai; ona foi atu lea o ia i lona fanua.
28A e afai ua le maua ni mea e lava ai ia toe faafoi mai ia te ia, ona tumau pea ai lea o le mea sa faatauina i le tagata na faatau mai ai, ina seia oo i le tausaga o le iupeli; ona tuuina atu ai lea pe a oo i le iupeli, ona toe foi atu ai lea o ia i lona lava tofi.
29Afai foi ua faatauina atu se tasi se fale o i le aai ua i le loto ‘olo, e mafaia lava ia te ia ona toe faatau mai ai i lea tausaga atoa na ia faatauina atu ai; na te mafaia lava ona toe faatau mai ai manū o lei atoa le tausaga.
30Afai foi ua le toe faatauina mai ai ina o lei atoa le tausaga, ona tumau pea ai lea o le fale o i le aai ua i le loto ‘olo i le tagata na faatauina mai ai e au tupulaga; e le tuuina atu lea pe a oo i iupeli.
31A o fale o i faoa aai ua le siomia i se ‘olo, e ta‘ua ia e pei o fanua a tua; e mafai ona toe faatau mai ai, e tuuina atu foi ia pe a oo i le iupeli.
32A e peitai ane o aai o sa Levī, o fale o i aai i lo latou fanua, e mafaia lava ona toe faatau mai e sa Levī i aso uma.
33A faatau ai foi e se tasi se mea a sa Levī, ona tuuina atu ai lea pe a oo i le iupeli o le fale sa faatauina, o le aai foi ua fai māna; auā o fale i aai a sa Levī o latou lava ia i le fanauga a Isaraelu.
34A o fanua i tuapa o a latou aai e le mafaatauina ia; auā o lo latou lava lea e faavavau.
35Afai foi ua oo ina mativa lou uso, ua na le toe lavā se mea; ona e fesoasoani ai lea ia te ia; e ui lava o ia le tagata ese ma le āumau; ina ia nofo lava o ia faatasi ma oe.
36Aua e te talia mai ia te ia se totogi, po o se mea e faasili; a ia e mata‘u i lou Atua; ina ia nofo lava lou uso faatasi ma oe.
37Aua e te avatu ia te ia au tupe e maua ai ni ona tupu; aua foi e te avatu ia te ia au mea e ‘ai ina ia toe maua mai se mea e faasili.
38O a‘u o Ieova lo outou Atua, o le na au mai ia te outou nai le nuu o Aikupito e foai atu ai ia te outou le nuu o Kanana; ina ia fai a‘u mo outou Atua.
39Afai foi ua oo ina mativa lou uso o loo nofo faatasi ma oe, ua na faatauina o ia e ia ia te oe, aua e te faapologa ia te ia e fai le galuega a le pologa.
40A ia i ai o ia ia te oe, e pei o le ua galue i le totogi, po o sē āumau, e auauna atu foi o ia ia te oe, seia oo i le tausaga o le iupeli;
41ona alu ese ai lea o ia ia te oe, o ia atoa ma ana fanau faatasi ma ia, e foi atu foi o ia i lona lava aiga, ma le fanua o ona tamā e foi atu ai lava o ia.
42Auā o a‘u auauna i latou na ou aumaia nai le nuu o Aikupito; e le faatauina i latou e fai ma pologa.
43Aua e te pule ia te ia ma le faasaua, a ia e mata‘u i lou Atua.
44O ou pologa tane ma ou pologa fafine, mai nuu ese lava ia, o e vagavagai ia te outou; tou te faatau mai i latou, o pologa tane, ma pologa fafine.
45O fanau foi a tagata ese, o e ua āumau ia te outou, tou te faatau mai ai ni o latou, atoa ma ni o latou aiga o ia te outou o e na fananau mai i lo outou nuu; e fai foi i latou mo outou.
46Tou te tofia foi i latou i a outou fanau pe a mavae atu outou, e fai mo latou tofi; e fai i latou ma pologa ia te outou e faavavau; a e peitai o outou uso o le fanauga a Isaraelu, aua tou te pule faasaua le tasi i le tasi.
47Afai foi e oo ina mauoa se tagata ese, po o se āumau o loo nofo faatasi ma oe, a o lou uso o loo nofo faatasi ma ia, ua oo ina mativa, ua na faatauina atu foi o ia e ia i le tagata ese, po o le āumau o loo nofo faatasi ma oe, po o so le fanau a le aiga o le tagata ese;
48a uma ona faatauina o ia e mafai ona toe faatauina mai; e mafai sona uso ona toe faatauina mai o ia;
49e mafai lava e le uso o lona tamā, po o le atalii o le uso o lona tamā ona toe faatauina mai o ia; e mafai foi e se tasi o lona lava aiga ona toe faatauina mai o ia; o ia foi lava pe a mafai ia te ia, ia toe faatau o ia ia te ia.
50La te faitau foi ma le na faatau ia te ia talu le tausaga na faatauina ai o ia ia te ia e oo lava i le tausaga o le iupeli; o tupe foi o lana faatau ia faatatauina i le faitau o tausaga, e pei o tausaga o le ua galue i le totogi e faapea lava ona fai ia te ia.
51A ua tele tausaga o totoe, ia faatatau i ai le tau o lona toe faatauina mai e toe avane ai tupe na faatauina ai o ia.
52Afai foi ua totoe na o nai tausaga itiiti ina seia oo i le tausaga o le iupeli, ona la faitau ai lea ma ia, e faatatau i ona tausaga e toe avane ai e ia le tau o lona faatauina mai.
53E ia te ia o ia e pei o se ua galue i le totogi i lea tausaga ma lea tausaga; aua le pule o ia ia te ia ma le faasaua i ou luma.
54Afai foi ua le toe faatauina mai o ia i nei tausaga, ona alu ese ai lea o ia i le tausaga o le iupeli, o ia atoa ma ana fanau faatasi ma ia.
55Auā o a‘u auauna le fanauga a Isaraelu, o a‘u auauna lava i latou na ou aumaia mai le nuu o Aikupito; o a‘u o Ieova lo outou Atua.
Who We AreWhat We EelieveWhat We Do
2025 by iamachristian.org,Inc All rights reserved.
