1Ua maliu aue o ia, ua silafia le tagata ua tauaso talu ina fanau mai.
2Ona fesili mai lea o ona soo ia te ia, ua faapea mai, Rapi e, po o ai ea na agasala, po o ia nei, po o ona mātua, ina ua fanau mai o ia o tauaso?
3Ua tali atu Iesu, E lei agasala lenei tagata, po o ona mātua; a e peitai ina ia faaalia ai o galuega a le Atua ia te ia.
4E tatau ona ou faia galuega a le ua auina mai a‘u, manū o ao; e oo i le po, e le mafaia e se tasi ona galue ai.
5Manū ou i ai i le lalolagi, o a‘u o le malamalama o le lalolagi.
6Ua fetalai atu nei upu, ona feanu ifo lea o ia i le eleele; ona faia lea o le palapala i le feanuga, ua nini mata o le tauaso i le palapala;
7ona faapea atu lea o ia ia te ia, Alu ia, ina mulumulu i le taelega i Seloa, (o lona uiga pe a faamatalaina, O le auina.) Ona alu lea o ia, ua mulumulu, ua toe foi mai, ua vaai.
8Ona fai ane lea o e na tuaoi ma ia, ma e na muai iloa o ia ina o tauaso, E le o ia ea lenei sa nofo ma ole atu i mea?
9Ua faapea isi. O ia lenei; a ua faapea isi, Ua foliga ia te ia; a o ia ua fai mai, O a‘u lava lenei.
10Ona fai atu lea o i latou ia te ia, Pe na faapefea ona faapupulaina ou mata?
11Ua tali mai o ia, ua faapea mai, O le tasi tagata e igoa ia Iesu ua na faia le palapala, ua nini a‘i o‘u mata; ua fai mai foi ia te au, Alu ia i le taelega i Seloa, ma ia mulumulu ai. Ona ou alu ai lea, ma ou mulumuluina, ona ou vaai ai lea.
12Ona fai atu lea o i latou ia te ia, Po o fea o i ai o ia? Ua faapea mai o ia, Ou te le iloa.
13Ua latou ta‘ita‘iina le sa tauaso i le au faresaio.
14O le sapati foi na fai ai e Iesu le palapala, ma faapupulaina ona mata.
15Ona toe fesili lea o le au faresaio ia te ia, pe na faapefea ona vaai o ia. Ua faapea mai o ia ia te i latou, Na tuu mai e ia le palapala i o‘u mata, na ou mulumuluina, o lenei ua ou vaai.
16Ona fai ane lea o isi o le au faresaio, E le mai le Atua lenei tagata, auā ua le tausi e ia le sapati. Ua faapea isi, Pe mafai faapefea e se tagata agasala ona fai o faailoga faapena? O lea ua vaeluaina ai i latou.
17Ona toe faapea atu lea o i latou i le tauaso, Pe se a lau upu ia te ia, auā ua faapupula e ia i ou mata? Ua faapea mai o ia, O le perofeta lava ia.
18A e lei talitonu Iutaia o ia sa tauaso, ma ua vaai, seia valaauina e i latou o mātua o le na faapupulaina ona mata.
19Ona latou fesili atu lea ia te i laua, ua faapea atu, Po o la oulua tama lenei, lua te fai mai ai, sa tauaso ina o fanau mai? Pe na faapefea ona vaai nei?
20Ua tali mai ona mātua ia te i latou, ua faapea mai, Ua ma iloa o la ma tama lenei, na tauaso foi ina o fanau mai;
21a e ma te lei iloa pe na faapefea ona vaai nei; ma te lei iloa foi po o ai le na faapupulaina ona mata. Ua matua ia; ia outou fesili atu ia te ia, na te tautala mai lava o ia.
22Ua faapea ona fai atu ona mātua, auā ua la fefefe ia Iutaia; auā foi ua iu le filifiliga a Iutaia, afai e ta‘ua e se tasi, o le Keriso o ia, ona tulia ai lea o ia i le sunako.
23O le mea lea ua faapea atu ai ona mātua, Ua matua ia, ia outou fesili atu ia te ia.
24Ona latou toe valaau lea i le tagata sa tauaso, ma faapea atu ia te ia. Avatu ia le viiga i le Atua; ua matou iloa o le tagata agasala lena.
25Ona tali mai ai lea o ia, ua faapea mai, ou te le iloa pe se tagata agasala o ia; o le mea e tasi ua ou iloa o a‘u le tauaso, ua ou vaai nei.
26Ona toe faapea atu lea o i latou ia te ia, Pe se a se mea na ia faia ia te oe? Pe na faapefea ea ona faapupulaina e ia ou mata?
27Ua tali mai o ia ia te i latou, Ua uma ona ou ta‘u atu ia te outou, a e tou te lei faalogo mai lava. Pe se a le mea tou te toe fia faalogo mai ai? Tou te mananao ea ia fai outou mona soo?
28Ona upu leaga lea o i latou ia te ia, ua faapea atu, O oe lona soo; a o i matou nei, o soo o Mose i matou.
29Ua matou iloa, na fetalai mai le Atua ia Mose; a o lena tagata matou te le iloa pe maifea ia.
30Ua tali mai le tagata, ua faapea mai ia te i latou. O le mea e ofo ai lenei, ina ua le iloa e outou pe maifea o ia, a ua faapupula mai e ia o‘u mata.
31Ua tatou iloa e le faafofoga le Atua i e agasala; a e peitai a mata‘u se tasi i le Atua, ma fai lona finagalo, ona faafofoga mai lea o ia ia te ia.
32E lei faalogo lava talu mai le vavau, ona faapupulaina e se tasi o mata o le na fanau mai o tauaso.
33Ana le mai le Atua lena tagata, na te le mafaia se mea e tasi ona fai.
34Ua latou tali atu, ua faapea atu ia te ia, Ua fanau mai oe ua tumu i le agasala, e te a‘oa‘o mai ea ia te i matou? Ona latou tulia lea o ia i tua.
35Ua faafofoga Iesu ua latou tulia o ia i tua; ua ia silafia o ia, ona faapea atu lea ia te ia. Po ua e talitonu i le Atalii o le Atua?
36Ua tali mai o ia, ua faapea mai, Le Alii e, o ai ea o ia, ina ia ou talitonu ia te ia?
37Ua fetalai atu Iesu ia te ia. Ua e vaai ia te ia, o ia foi lenei ua tautala ma oe.
38Ona faapea mai lea o ia. Le Alii e, ua ou talitonu lava; ona ifo lea o ia ia te ia.
39Ona faapea ane ai lea o Iesu. O le faamasinoga, o le mea lea ua ou sau ai i le lalolagi nei: ina ia latou vaai o e le vaavaai, ia faatauasoina foi i latou o e vaai.
40Ua faalogo mai i ia mea nisi o le au faresaio sa latou i ai ma ia, ona faapea mai lea o i latou ia te ia. O i matou foi, ua matou tauaso ea?
41Ua faapea atu Iesu ia te i latou, Afai ana outou tauaso, po na leai sa outou agasala; lenei, o loo faapea outou. Matou te vaai; o lea o tumau ai pea la outou agasala.
Who We AreWhat We EelieveWhat We Do
2025 by iamachristian.org,Inc All rights reserved.
