1O le afioga a Ieova na oo mai ia Sefanaia le atalii o Kusi, o le atalii lea o Ketalia, o le atalii lea o Amaria, o le atalii lea o Esekia, i ona po o Iosia le atalii o Amone le tupu o Iuta.
2Ua fetalai mai Ieova, Ou te matuā faaumatia mea uma i le fogaeleele.
3Ou te faaumatia tagata ma manu vaefa, ou te faaumatia manu felelei atoa ma i‘a o le sami, o mea foi e tausuai ai atoa ma tagata amio leaga, ou te faaumatia foi tagata i le fogaeleele, ua fetalai mai ai Ieova.
4Ou te faaloaloa atu foi lo‘u lima i luga o Iuta, ma luga o i latou uma o e nonofo i Ierusalema, ou te faaumatia foi i lenei mea o toe mea a Paala, o le igoa foi o faitaulaga i tupua faatasi ma ositaulaga;
5o i latou foi o e ifo i ‘au o le lagi i luga o fale; o i latou foi o e ifo ma tauto ia Ieova, a e tauto foi ia Moloka;
6o i latou foi o e liliu ese ia Ieova, ma e o loo saili ia Ieova, pe fesili ia te ia.
7Ina faalologo ia i luma o le Alii o Ieova, auā ua latalata le aso o Ieova; auā ua sauni e Ieova le taulaga, ua faapaiaina e ia e na ia tala‘iina.
8O le aso o le taulaga a Ieova ou te taui atu ai i alii sili ma alo o le tupu, atoa foi ma i latou uma o e oofu i ofu o nuu ese.
9O lea lava aso ou te taui atu ai i latou uma lava o e feosofi i le faitotoa, ma faatumu le fale o latou alii i le saua ma le pepelo.
10O loo fetalai mai Ieova, O lea aso e i ai le leo o le alaga i le faitotoa o i‘a, ma le uio i le lua o aai, ma le taalili o le lepetia o mea e tele i mauga.
11Ina uio ia outou o e mau i Metesa, auā ua faaumatia le nuu uma o Kanana; ua fasiotia i latou uma o e ave avega o ario.
12Ona po foi ia ou te suesue ai Ierusalema i sulu, ona ou taui atu lea i tagata o e ua to‘a i luga o ‘alu o a latou uaina, o loo faapea i o latou loto, E le faia e Ieova se mea lelei, na te le faia foi se mea leaga.
13E avea foi o latou oloa ma vete, o latou fale foi e avea ia ma mea gaogao; latou te faia fale, a e latou te le mau ai; latou te faia tovine foi, a e latou te le feinu ai uaina.
14O loo latalata mai le aso tele o Ieova, e lata mai lava, o loo matuā televave mai lava, o le taalili o le aso o Ieova; e matuā tagiaue ai le toa.
15E fai lea aso ma aso o le toasa, o le aso o le puapuaga ma le tiga, o le aso o le faatafunaina ma le faagaogaoina, o le aso o le pouliuli ma le pogisa, o le aso o ao ma le faamalumalu,
16o le aso o le pu ma le pāpā o alaga i le taua, e sii i aai nofo ‘olo atoa ma ‘olo maualuluga.
17Ou te faatiga foi i tagata, latou te savavali ai pei o tagata tauaso, auā ua latou agasala atu ia Ieova; e faamaligiina o latou toto pei o le efuefu, e fai o latou tino foi pei o otaota.
18E le mafai lava i o latou ario ma o latou auro ona laveai ia te i latou i le aso o le toasa o Ieova; a e faaumatia le nuu uma i le afi o lona fuā; auā e matuā faafuasei ona faaumatia e ia o i latou uma o e nonofo i le nuu.
Who We AreWhat We EelieveWhat We Do
2025 by iamachristian.org,Inc All rights reserved.
