1O le sefulu ma le fitu o tausaga o Peka le atalii o Remalia na fai ai ma tupu Aasa le atalii o Iotama le tupu o Iuta.
2O le luafulu o ona tausaga na fai ai Aasa ma tupu; e sefulu ma le ono foi tausaga na fai ai o ia ma tupu i Ierusalema; ua na le faia le amiotonu i luma o Ieova lona Atua faapei o Tavita lona tamā.
3A ua na savali i le ala o tupu o Isaraelu, ma na faaui ane lava lona atalii i le afi, faapei o tu leaga a nuu ese e na tulia e Ieova i luma o le fanauga a Isaraelu.
4Ua ia faia foi taulaga, ma faamu mea manogi i mea maualuluga, i luga foi o mauga, atoa ma lalo o laau lauolaola uma.
5O ona po ia na o ae ai Resina le tupu o Suria, ma Peka le atalii o Remalia le tupu o Isaraelu e tau ma Ierusalema; ua la siomia Aasa, a e lei mafaia ona la manumalo.
6O ona po ia na toe faoa ai e Resina le tupu o Suria o Elata mo Suria, ua na tuli foi sa Iutā nai Elata; ona o mai ai lea o tagata Suria i Elata, ua latou nonofo ai, ua oo mai lava i le aso nei.
7Ona auina atu ai lea e Aasa o le sāvali ia Tikila-pilesa le tupu o Asuria, ua faapea atu, O a‘u o lau auauna ma lou atalii; ina afio mai ia e faaola ia te au i le lima o le tupu o Suria, ma le lima o le tupu o Isaraelu, ua la sii mai le taua ia te au.
8Ua ave foi e Aasa ario ma auro na i ai i le fale o Ieova, ma mea e teu ai oloa i le fale o le tupu, ua avatu e fai ma mea alofa i le tupu o Asuria.
9Ona talia ai lea o ia e le tupu o Asuria; ona alu ae ai lea o le tupu o Asuria i Tamaseko, ma na aea, ma na faatāfeaina i latou i Kira, ua na fasioti foi ia Resina.
10Ona alu atu ai lea o le tupu o Aasa i Tamaseko e feiloai ma Tikila-pilesa le tupu o Asuria; ona iloa ai lea e ia o le fata faitaulaga i Tamaseko, ona tusitusi atu ai lea e le tupu o Aasa ia Uria le ositaulaga o le faatusa o le fata faitaulaga ma lona fuafua, o lona uiga uma lava.
11Ona faia lea e Uria le ositaulaga o le fata faitaulaga e tusa ma mea uma na poloai mai ai le tupu o Aasa i Tamaseko; ua faapea ona faia e Uria e faatali atu i le sau o le tupu o Aasa mai Tamaseko.
12Ua sau le tupu mai Tamaseko, ona iloa ai lea e le tupu o le fata faitaulaga; ona faalatalata atu ai lea o le tupu i le fata faitaulaga, ua faitaulaga ai i ona luga.
13Ua na susunu foi lana taulaga mu ma lana taulaga i mea e ‘ai, ua na liligi atu foi lana taulaga i mea e inu, ua na sausau foi le toto o ana taulaga faafetai i luga o le fata.
14Ua na sii ese foi le fata ‘apa memea sa i luma o Ieova nai luma fale, nai le va o le fata ma le fale o Ieova, ma tuu ai i le itu i matu o le fata faitaulaga.
15Ona fai atu ai lea o Aasa le tupu ia Uria le ositaulaga, ua faapea atu, E susunu i luga o le fata tele le taulaga mu o le taeao, ma le taulaga i mea e ‘ai o le afiafi, atoa foi ma le taulaga mu a le tupu, ma lana taulaga i mea e ‘ai, o le taulaga mu foi a tagata uma o le nuu, atoa ma a latou taulaga i mea e ‘ai, ma a latou taulaga i mea e inu; e sausau foi i ona luga le toto uma o le taulaga mu, ma le toto uma o le taulaga; a e ia te au le fata ‘apa memea, ou te saili atu ai.
16Ona faia lea e Uria le ositaulaga e tusa ma mea uma ua fai atu ai le tupu o Aasa.
17Ua vavae ese foi e le tupu o Aasa itu o tuugātanoa, ua tuu ese foi le tanoa e mulumulu ai i o latou luga, ua na tuu i lalo foi le vai nai luga o povi ‘apa memea sa i ona lalo, ma ua tuu ai i luga o le paepae.
18Ua na liliu ese foi ai le fale o Ieova le faapaologa o le sapati na latou faia i le fale, atoa ma le ala o le tupu i fafo, a e tuu mo le tupu o Asuria.
19O toe o mea a Aasa na ia faia, e lei tusia ea i le tusi o tala i nofoaiga a tupu o Iuta?
20Ua taoto foi Aasa faatasi ma ona tamā, ua tanu foi faatasi ma ona tamā i le aai o Tavita; ona soloai ane ai lea o Esekia lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
