1Sa loto gatasi foi Saulo ma i latou i lona fasiga. O lea lava aso ua tupu ai le saua tele i le ekalesia i Ierusalema; na faasalalauina foi i latou uma i nuu o Iutaia ma Samaria, ua toe na o le au aposetolo.
2Ua ave foi Setefano e tanu e tagata ua matatau i le Atua, ua matuā taufaitagitu‘i i latou ia te ia.
3A ua soona saua Saulo i le ekalesia, ua ulufale ia i lea fale ma lea fale, ma fetoso mai i tane ma fafine, ma tuuina atu i le fale puipui.
4Ua o solo foi e na faasalalauina, ma latou folafola atu le tala lelei o le upu.
5Ua alu ifo foi Filipo i le aai o Samaria, ua tala‘i atu Keriso ia te i latou.
6Ua naunau le motu o tagata ma le loto gatasi i upu na fai atu e Filipo, ua latou faalogologo ma vaavaai i faailoga ua faia e ia.
7Auā ua ō i fafo agaga leaga i tagata e toatele sa i ai, ua alalaga ma le leo tele; ua faamaloloina foi e sa mamai i le supa ma pipili e toatele.
8Ua tele lava le olioli i lea aai.
9A o le tasi tagata, o Simona le igoa, sa muai fai togafiti faataulāitu i lea aai ua faatupu ai le ofo o le nuu o Samaria, ua ia faapea, o ia lava o le silisili;
10ua naunau atu i latou uma lava ia te ia, o tagatānuu atoa ma alii, ua faapea ane, O le mana tele o le Atua lenei tagata.
11Ua latou naunau ia te ia, auā ua leva lona faatupuina o le ofo ia te i latou i ana togafiti faataulāitu.
12Ua talitonu i latou ia Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine.
13O Simona foi, ua talitonu ia; ua papatisoina foi o ia, ona faatasi atu lea o ia ia Filipo, ua matuā ofo, ina o matamata i faailoga ma vavega tele ua faia.
14Ua faalogo foi le au aposetolo i Ierusalema, ua talia e Samaria le afioga a le Atua, ona latou aauina atu lea o Peteru ma Ioane ia te i latou.
15Ua o mai foi i laua, ona tatalo lea mo i latou, ina ia maua e i latou le Agaga Paia;
16auā o ona po ia e lei afio ifo ai o ia i se tasi o i latou; ua na ona papatisoina o i latou i le suafa o le Alii o Iesu.
17Ona la faaee atu lea o laua lima ia te i latou, ona maua lea e i latou o le Agaga Paia.
18Ua vaaia foi e Simona, o le faaee o lima o aposetolo ua foai atu ai le Agaga Paia, ona au mai ai lea e ia o tupe ia te i laua,
19ua faapea mai, Au mai ia te au foi lena pule, ina ia maua le Agaga Paia e le tagata ou te faaee i ai o‘u lima.
20A ua fai atu Peteru ia te ia, Ia fano lau ario faatasi ma oe, auā ua e manatu e faatauina le mea foai fua a le Atua i tupe.
21E leai sau mea po o sou tofi i lenei mea; auā e le tonu lou loto i luma o le Atua.
22O lenei, ia e salamo i lou nei leaga, ma e faatoga atu i le Atua, pe mafaia ona faamagaloina le manatu o lou loto.
23Auā ua ou iloa ua e i ai i le au oona, ma le ta‘ui e le amioleaga.
24Ona tali atu lea o Simona, ua faapea atu, Faatoga ia oulua i le Alii mo a‘u, ina ia le oo mai ia te au se mea e tasi o ia mea ua oulua fai mai na.
25Ua uma foi lo laua molitino ma tautala atu i le afioga a le Alii, ona la toe foi atu lea i Ierusalema, ua folafola le tala lelei i aai e tele o Samaria.
26Ua fai mai foi le agelu a le Alii ia Filipo, ua faapea mai, Ina tu ia, ina alu i le itu i toga, i le ala e alu ifo mai Ierusalema i Kasa; o le mea ua tuufua lea.
27Ona tu lea o ia i luga, ua alu; faauta foi, o le tagata Aitiope, o le eunuka, o le auauna sili a Kanake le tupu fafine o Aitiope, le na tausi ana oloa uma lava; na alu atu o ia i Ierusalema e tapuai ai.
28Ua toe foi mai o tietie i lona nofoa faataavalevale, ma faitau i le perofeta o Isaia.
29Ua fai mai le Agaga ia Filipo, Faalatalata atu ia, ma e faatasi i lena nofoa faataavalevale.
30Ona momo‘e atu lea o Filipo, ua faalogo atu ia te ia o faitau i le perofeta o Isaia, ona fai atu lea o ia, Po ua e lagona ea i mea ua e faitauina?
31Ua fai mai o ia, Ou te mafaia faapefea, pe a le faasino mai se tasi ia te au? Ua na fai mai foi ia Filipo ia alu ae la te nonofo ma ia.
32O le fuaiupu foi o le tusi ua na faitau ai, o lenei, Pei o le mamoe ua ta‘ita‘iina ia fasia; pei o le tamai mamoe foi i luma o lē sele fulufulu e le tagi, e faapea foi o ia ua le tautala mai.
33O ona po o lona faamaulaloina na aveesea ai lona faamasinoga; o ai foi se na te talaina lana tupulaga? auā ua aveesea lona ola i le lalolagi.
34Ua fai mai e le eunuka ia Filipo, ua faapea mai, So‘u fesili atu ia te oe, ua fai mai lenei mea e le perofeta ia te ia? ia te ia ea, po o se tasi tagata?
35Ona tautala atu lea o Filipo, ua afua i lea lava Tusi ona folafola ia te ia o le tala lelei ia Iesu.
36Ua o ane foi i laua i le ala, ua oo i le tasi vai; ona fai mai lea o le eunuka, Faauta, o le vai; se a ea se mea e vaoia ai a‘u e aua le papatisoina o a‘u?
37Ua fai atu e Filipo, Afai ua e talitonu ma le loto atoa, e mafai ai lava. Ua tali mai o ia, ua faapea mai, Ou te talitonu o Iesu Keriso o le Alo o le Atua ia.
38Ona fai atu lea o ia ia faapau mai le nofoa faataavalevale; ona o ifo lea o i laua uma i le vai, o Filipo ma le eunuka; ua na papatiso foi ia te ia.
39Ua o ae i laua nai le vai, ona segia lea o Filipo e le Agaga o le Alii; ua le toe iloa ia e le eunuka, ua alu foi ia i lana malaga ma le olioli.
40A ua iloa Filipo i Asota; ua alu foi o ia, ma folafola solo le tala lelei i aai uma lava, ua oo lava ia i Kaisareia.
Who We AreWhat We EelieveWhat We Do
2025 by iamachristian.org,Inc All rights reserved.
