EFESO, 3 - Samoan Old Version Bible

O LE MATAUPU III.O le alofa o le Atua i nuu faapaupau.

1Ona o lea mea, o a‘u o Paulo o le ua noanoatia ona o Keriso Iesu, ona o outou o nuu ese;

2auā ua outou faalogologo i le sauniga o le alofa tunoa o le Atua ua tuuina mai ia te au mo outou;

3ina ua na faailoa mai ia te au i le faaaliga, o le mea sa lilo, (faapei ona a‘u muai tusia i ni upu itiiti,

4pe a faitaulia e mafai ai outou ona iloa ai lou loto matala i le upu ia Keriso sa lilo,)

5sa le faailoa atu i nisi tupulaga o le fanauga a tagata, faapei ona faaali mai nei e le Agaga, i ana aposetolo paia, ma ana perofeta paia;

6ia avea nuu ese ma suli faatasi ma tino e tasi, ma ia tofusia faatasi i lana sa folafola mai ona o Keriso, i le tala lelei;

7ua fai ai a‘u ma auauna, e tusa ma le mea foaifuaina mai i le alofa tunoa o le Atua, ua na foaiina mai ia te au i le galuega tele a lona mana;

8ua au mai ia te au le aupito itiiti lava i le au paia uma lenei lava alofa tunoa, ina ia ou folafola atu i nuu ese le oloa faulai o Keriso e le masuesueina lava;

9e faamalamalamaina atu foi i tagata uma le uiga o le mafuta faatasi i le mea lilo sa natia talu mai i tupulaga anamua e le Atua, o le na faia mea uma lava e Iesu Keriso;

10ina ia iloa nei e alii sili ma le au faipule i mea o i le lagi, i le ekalesia, le poto uiga eseese o le Atua,

11e tusa ma lona finagalo talu anamua lava, na ia faia e Keriso Iesu lo tatou Alii;

12o ia ua tatou maua ai le faamalosi, ma le ta‘ita‘iga ma le loto tele, i le faatuatua ia te ia.

13O lenei, ou te aioi atu, aua ne‘i faavaivai ina ua puapuagatia a‘u ona o outou, auā o le mea tou te mitamita ai lena.

14O le mea lea ou te tootuli ai i le Tamā o lo tatou Alii o Iesu Keriso,

15o ia ua faaigoaina ai le aiga uma o i le lagi atoa ma le lalolagi;

16ina ia foaiina ia te outou e tusa ma le faulai o lona viiga, ia faamalosia outou i le mana e lona lava Agaga, i le tagata i totonu;

17ia nofo mau Keriso i o outou loto i le faatuatua, ina ia mauaa outou,

18ma ia faavaeina i le alofa, tou te mafai ai ona iloa lelei e outou atoa ma le au paia uma, o le uiga o le lautele, ma le umi, ma le loloto, ma le maualuga,

19ia iloa foi le alofa o Keriso ua silisili ese e le mailea, ia faatutumuina outou i le tumu uma lava o le Atua.

20Ia ia te ia o le na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma le mana o loo matuā galue i totonu ia te i tatou,

21ia ia te ia le viiga i le ekalesia ona o Keriso Iesu, i augatupulaga uma, e faavavau faavavau lava. Amene.