1Ua oo mai le Agaga o le Atua ia Asaraia le atalii o Oteta;
2ona alu atu ai lea o ia e faafetaiai ia Asa, ma ua faapea atu ia te ia, Asa e, ma Iuta uma, atoa ma Peniamina, ia outou faafogafoga mai ia te au; e ia te outou Ieova, pe a outou i ai ia te ia; afai foi tou te sailiili ia te ia, tou te maua o ia; a e afai e tuua o ia e outou, e tuua outou e ia.
3Ua tele lava aso ua aunoa ai Isaraelu ma le Atua moni, ma ua aunoa ma se faitaulaga e a‘oa‘o atu, ua aunoa foi ma le tulafono.
4A ua latou liliu mai ia Ieova le Atua o Isaraelu ina ua puapuagatia i latou, ma ua sailiili ia te ia ona maua ai lea o ia e i latou.
5O ona po ia na le i ai se filemu i lē alu atu ma lē foi mai, a ua tele le atuatuvale ia i latou uma sa nonofo i nuu.
6Na tu‘imomoia foi o le tasi nuu e le tasi nuu, ma le tasi aai e le tasi aai; auā sa faaatuatuvaleina i latou e le Atua i puapuaga uma lava.
7Ia faamalolosi outou, aua foi tou te lima vaivai; auā e tauia a outou galuega.
8Ua faalogo Asa i na upu, ma le valoaga a Oteta le perofeta, ona faamalosi ai lea o ia, ma na aveeseina o mea leaga i le nuu uma o Iuta ma Peniamina, atoa ma aai foi na ia faoa i le mauga o Efaraima, ma ua toe teuteu le fata faitaulaga o Ieova sa i luma o le faapaologa o le fale o Ieova.
9Ua faapotopotoina foi e ia o Iuta uma atoa ma Peniamina, ma tagata ese na ia te i latou mai Efaraima ma Manase atoa ma Simeona; auā na sosola mai i latou ia te ia e toatele mai Isaraelu, ina ua latou iloa ua ia te ia o Ieova lona Atua.
10Ona faapotopoto mai lea o i latou i Ierusalema i le tolu o masina i le sefulu ma le lima o tausaga o le nofoaiga a Asa.
11Ona latou faitaulaga ai lea ia Ieova i lea lava aso, i povi e fitu selau ma mamoe e fitu o afe, ai mea na latou vetea mai.
12Ua latou faia foi le feagaiga ia saili ia Ieova le Atua o latou tamā ma le loto atoa ma le agaga atoa;
13ai se tasi e le saili ia Ieova le Atua o Isaraelu e fasiotia o ia, o se tama po o se ua matua, o se tane po o se fafine.
14Ua latou tuuautapu ia Ieova ma le leo tele, ma le alaga fiafia, ma pu, ma foafoa.
15Ua fiafia Iuta uma i le tuuautapuga; auā ua latou tuuautapu ai ma le loto atoa, ma ua latou sailiili atu ia te ia ma o latou manao uma; ua latou maua foi o ia. Ua foaiina mai e Ieova le filemu ia te i latou i itu uma.
16O Maaka foi o le tinā o Asa le tupu, ua ia faatea ia te ia, ia le fai o ia ma sa‘o tamaitai, auā na ia faia le tupua o Asaira; ua vavae i lalo e Asa lana tupua, ma ua nutipalaina, ma susunuina i le alia o Ketarono.
17A e lei aveeseina o mea maualuluga i Isaraelu; a o le loto o Asa ua sao lea i ona aso uma.
18Ua au mai foi e ia i le fale o le Atua o mea na faasaina e lona tamā, ma mea foi na faasaina e ia, o ario, ma auro, ma ipu.
19Ua leai foi se toe taua ua oo i le tolugafulu ma le lima o tausaga o le nofoaiga a Asa.
Who We AreWhat We EelieveWhat We Do
2025 by iamachristian.org,Inc All rights reserved.
