FAILAUGA, 2 - Samoan Old Version Bible

O LE MATAUPU II.O mea a lenei olaga e fiafia ai tagata, e le manuia ai; e iu vale foi ia.

1Ua ou faapea ifo i lo‘u loto, Sau ia, ou te tofotofo ia te oe i le olioli, ina e fiafia ia i mea lelei; faauta foi, o le mea faatauvaa lava lea.

2Ua ou faapea i le ‘ata‘ata, Ua valea lea; o le olioli foi, Se a se mea na te faia?

3Ua ou manatunatu ifo i lo‘u loto e faamasani lo‘u tino i le uaina, o loo ta‘ita‘iina foi ma le poto lo‘u loto; e tago atu foi i le valea, seia ou iloa le mea e lelei ai tagata latou te faia i lalo o le lagi, i aso uma o latou olaga nei.

4Na ou faia galuega tetele mo a‘u; na ou faia fale mo a‘u; na ou faia tovine mo a‘u;

5na ou faia foi mo a‘u o faatoaga ma fanua e totō ai laau, na ou totō foi i ai laau uma lava e fua;

6na ou faia foi mo a‘u o vailepa, e faasūsū atu ai le fanua e tutupu ai laau;

7na ou fai mo a‘u o auauna tane ma auauna fafine, sa ia te au foi auauna na fananau mai i lo‘u aiga; sa ia te au foi o lafu povi ma mamoe e tele, e sili ia i latou uma lava e na muamua ia te au i Ierusalema;

8na ou faapotopoto foi mo a‘u ario, ma auro, ma le oloa tāua o tupu ma itu malo; na ou fai foi mo a‘u o tane pepese ma fafine pepese, ma mea e fiafia ai tagata, o le avā ma nisi avā.

9Na tamaoaiga foi a‘u, na tele foi a‘u mea i a latou uma lava e na muamua ia te au i Ierusalema; i le ma lea, ua tumau lo‘u poto ia te au.

10O mea uma foi sa fia vaai i ai o‘u mata ua ou le vaoia i ai; na ou le taofia foi lo‘u loto i se mea e tasi e fiafia ai; auā na olioli lo‘u loto i a‘u galuega uma; na fai foi lea ma‘u mea i a‘u galuega uma.

11Ona ou vaai lea i galuega uma na faia e o‘u lima, ma le galuega na ou tiga ai i fai; faauta foi, o mea faatauvaa uma lava ia, ma le ‘ai i le matagi, ua leai lava se mea aoga i lalo o le la.

12Na ou liliu ane foi ia ou iloa le poto, ma le faalialia vale, ma le valea; auā se a se mea e toe mafaia ona fai e le tagata e mulimuli mai i le tupu, e le na o mea ea ua uma ona faia?

13Na ou iloa foi ua sili le aoga o le poto i le valea, e pei ona sili o le aoga o le malamalama i le pouliuli.

14O le tagata poto, o i lona ulu ona mata, a o le valea, e savali o ia i le pouliuli; a ua ou iloa foi, e tasi lava le mea e oo ia te i laua uma.

15Ona ou faapea ifo lea i lo‘u loto, E pei ona oo i le vale, e faapea foi ona oo ia te au lava; ona o le a foi ua sili ai lo‘u nei poto? Ona ou faapea ifo lea i lo‘u loto, O le mea faatauvaa foi lea.

16Auā e le manatua le tagata poto, po o le vale e faavavau; auā o mea ua i ai nei e faagalogaloina uma lava i se aso. Aue! e oti le tagata poto e pei o le vale.

17O le mea lea na ou ‘ino‘ino ai le olaga nei; auā ua leaga ia te au galuega ua faia i lalo o le la; auā o mea uma lava e faatauvaa ia, ma le ‘ai i le matagi.

18Na ou ‘ino‘ino foi i a‘u galuega uma ua ou tiga ai i lalo o le la; auā ou te tuuina ia mo le tagata e nofo mai pe a mavae atu a‘u;

19o ai foi se na te iloa po o se tagata poto, po o se vale ia? a e pule o ia i a‘u galuega uma ua ou tiga ai, ma ou faia i lo‘u poto i lalo o le la. O le mea faatauvaa foi lea.

20Ona ou toe manatu ifo lea e faaliliu ese lo‘u loto i le faatuatua i galuega uma ua ou tiga ai i lalo o le la.

21Auā o loo galue le tasi tagata ma le poto, ma le iloa, ma le manuia; a e tuuina e ia mo le tagata na le tiga ai e fai mona tofi. O le mea faatauvaa lea, o le mea leaga tele.

22Auā se a se mea ua maua e le tagata i ana galuega uma, ma le taumafai o lona loto, ua tiga ai o ia i lalo o le la?

23auā o ona aso uma o faanoanoaga ia, o le mea tiga foi lana galuega; e le mapu foi lona loto i le po. O le mea faatauvaa foi lea.

24E leai se tasi mea lelei i le tagata na ona ia ‘ai, ma inu, ma faafiafia lona loto i mea lelei i ana galuega. Ua ou iloa foi le mea nei, e mai le aao o le Atua lea.

25Auā o ai se na te mafaia ona ‘ai, o ai foi se na te mafaia ona fai lona loto, e sili ia te au ne‘i?

26Auā e foaiina e le Atua i le tagata e lelei i ona luma, o le poto, ma le iloa o mea, ma le olioli; a o le ua agasala, e foaiina e ia i ai le faiva e faapotopoto ma faaputu, ina ia foaiina atu ai e ia i le ua lelei i luma o le Atua. O le mea faatauvaa foi lea, ma le ‘ai i le matagi.