1Ia alaga tele, aua le leo itiiti, ia e leo tele e pei o se pu; ma e faaali atu i lo‘u nuu o latou solitulafono, ma ē faaali atu i le aiga o Iakopo a latou agasala.
2A ua latou saili mai ia te au i lea aso ma lea aso, ua latou fia iloa o‘u ala; e pei o se nuu ua faia le amiotonu, ma latou le lafoai le faatonuga a lo latou Atua; ua latou fesili mai ia te au i faamasinoga tonu, ua latou faalatalata atu i le Atua ma le fiafia.
3Se a le mea ua matou anapopogi ai, a e te le silasila mai? se a le mea ua faatigaina ai i matou e i matou, a e te le silafia? Faauta, o le aso e anapopogi ai outou, ua outou maua ai le fiafia, ma outou faatauanauina a outou auauna ia faia a outou galuega uma.
4Faauta, ua outou anapopogi ia finau ai, ma misa ai, ma ia tu‘i ai i le lima e fai ai le amio leaga; aua tou te anapopogi e pei o le asō, e lagona ai o outou leo i le mea maualuga.
5E faapena ea le anapogi ou te loto i ai; o le aso e faatiga ai le tagata ia te ia lava? e punou ai ea lona ulu e pei o le fiso? e fola lona moega i le ie talatala ma le lefulefu? E te faaigoa ea lena mea o le anapogi ma le aso e fiafia i ai Ieova?
6E le o lenei ea le anapogi ou te loto i ai? ma ia tatalaina fusi na faia i le amio leaga, e tatala fusi o le amo, e tuuina atu ia sa‘oloto e ua faasauaina, ma ia outou gausia amo uma lava.
7E le o lenei ea? ona ia tofitofi au mea e ‘ai i le ua fia ‘ai, ia au mai i lou fale e ua matitiva ma faasauaina; a ē iloa le ua le lavalavā e te faaofuina o ia, aua foi e te lafi ia i latou o lou lava aiga.
8Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muli‘au mai le pupula o Ieova ia te oe.
9Ona e valaau lea, a e tali mai ai Ieova; e te alaga atu, a e fetalai mai o ia, O a‘u lenei; pe afai e te faate‘aeseina le amo ia te outou, o le tusi o le lima, ma le upu vale.
10Afai foi e te alofa atu i le ua fia‘ai, ma e fafaga ia ma‘ona o le ua tiga; ona alu ae lea o lou malamalama i le pouliuli, ma lou pogisa e pei o le aoauli ia.
11E ta‘ita‘iina foi oe e le aunoa e Ieova; e faamălie foi o ia ia te oe pe a oge vai, ma faamalosia ou ivi; e avea foi oe e pei se fanua ua faasūsūina, e pei o le punavai foi e le mate ona suāvai.
12O e tutupu mai ia te oe latou te ati ae mea na faatafunaina mai anamua; e te faatuina faavae o lea tupulaga ma lea tupulaga; e igoa ai oe, O lē ati ae i solo, O le faaola i magāala i mea e nonofo ai.
13Afai e te liliu ese lou vae i le sapati, a ē le faia lou lava loto i lo‘u aso sa; ma ē ta‘ua le sapati, o le aso fiafia, le aso ua sa ia Ieova, ua mamalu; ma e faamamalu i ai, o loo e le faia au lava amio, o loo le maua ai lou lava fiafia, ma ē le tautala ai i au lava upu;
14ona e fiafia lava lea ia Ieova; ou te faatietie ane foi ia te oe i luga o mea maualuluga o le lalolagi, ou te fafaga foi ia te oe i le tofi o Iakopo lou tamā; auā ua fetalai mai ai le fofoga o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
