1O tulafono ia ma faamasinoga tou te tausiusi i ai ia faia i le nuu o le a foaiina mai ia te oe e Ieova le Atua o ou tamā, ina ia fai mo outou, i aso uma tou te ola ai i le fogaeleele.
2Ia outou matuā faaumatia mea uma lava na auauna a‘i i o latou atua o nuu o le a fai mo outou, i luga i mauga maualuluga ma mauga iti, o i lalo ifo foi o laau lauolaola uma.
3Ia outou sofaia o latou fata faitaulaga, ia outou nutipalaina foi o latou tupua, ma susunu i le afi o latou tupua o Asaira; ia outou vavae i lalo foi o tupua ua ta o latou atua, ia outou tineia foi o latou igoa ai lea lava mea.
4Aua lava tou te faapea ona fai ia Ieova lo outou Atua.
5A o le mea e filifilia e Ieova lo outou Atua ai o outou itu aiga uma lava e tuu ai lona suafa, o lona afioaga lava ia outou sailiili i ai ma e alu atu i ai.
6Ia outou ave i ai a outou taulaga mu, ma a outou taulaga, ma le mea e sefulu a‘i a outou mea, ma taulaga sii a o outou lima, ma mea ua outou tauto ai, ma a outou taulaga tou te loto ina fai, atoa ma uluai tama a outou povi ma a outou mamoe.
7Tou te aai ai i lea mea i luma o Ieova lo outou Atua, tou te olioli foi i mea uma lava e faia i o outou lima, o outou atoa ma o outou aiga, o mea ua faamanuia ai oe e Ieova lou Atua.
8Tou te le faia e pei o mea uma ua fai e i tatou iinei i le aso nei, o loo taitasi le tagata ma fai mea uma ua tonu i lona manatu.
9Auā ona po nei ua le oo lava outou i le malologa ma le tofi ua foaiina ia te outou e Ieova lo outou Atua.
10A e tou te sopoia atu Ioritana, ma outou nonofo i le nuu ua foaiina mai e Ieova lo outou Atua e fai mo outou tofi; na te avatua foi le mapusaga ia te outou ai o outou fili uma lava i itu uma, ma outou nonofo ai ma le filemu.
11O le mea foi e filifilia e Ieova lo outou Atua e tuu ai lona suafa, o le mea lea tou te ave i ai mea uma lava ou te fai atu ai ia te outou; o a outou taulaga mu, ma a outou taulaga, ma mea e sefulu a‘i a outou mea, ma taulaga sii a o outou lima, ma mea uma e sili ua outou tauto ai, ua outou tauto ai ia Ieova;
12tou te olioli foi i luma o Ieova lo outou Atua, o outou, ma o outou atalii, ma o outou afafine, ma a outou auauna tane, ma a outou auauna fafine, ma le sa Levī o i a outou aai, auā e leai sona fanua po o sona tofi faatasi ma outou.
13Ia oe, ne‘i e fai au taulaga mu i mea uma e te vaai i ai;
14a e tau lava o le mea e filifilia e Ieova i se tasi o outou itu aiga, e te fai ai au taulaga mu, e te fai ai foi mea uma lava ou te fai atu ai ia te oe.
15A e peitai o mea uma e te manao i ai, ia e fasia, ma e ‘ai i manu, e tusa ma le manuia mai ia Ieova lou Atua ua ia foaiina mai ia te oe i au aai uma; o le ua leaga ma le ua mamā la te aai ai, e pei ona ‘aina o le sevi ma le aila.
16A o le toto, aua tou te aai ai; tou te sasaaina lea i le eleele e pei o le suāvai.
17E te le ‘ai lava i au aai o mea e sefulu a‘i lau saito, ma lau uaina, ma lau suāuu, po o uluai tama a au povi, ma au mamoe, ma au mea uma ua e tauto ai, ua e tauto ai lava, ma au taulaga e te loto ina fai, ma taulaga sii a lou lima;
18auā o mea nā e te ‘ai ai i luma o Ieova lou Atua i le mea e filifilia e Ieova lou Atua, o oe, ma lou atalii, ma lou afafine, ma lau auauna tane, ma lau auauna fafine, ma le sa Levī o i lau aai; e te olioli foi i luma o Ieova lou Atua, i mea uma lava e te faia i ou lima.
19Ia oe, ne‘i e tuulafoai le sa Levī i ou aso uma e te mau ai i lou fanua.
20A faalauteleina e Ieova lou Atua lou laueleele, e faapei ona ia fetalaia mai ia te oe, ma e fai ane, Ou te ‘ai manu; auā e manao lou loto e ‘ai manu; ona e ai ai lea i manu, i mea uma e manao i ai lou loto.
21A vava mamao ma oe le mea ua filifilia e Ieova lou Atua e tuu ai lona suafa, ona e fasi ai lea ni au povi ma ni au mamoe, ua foaiina mai e Ieova lou Atua ia te oe, e faapei ona ou fai atu ai ia te oe, e te ‘ai foi i au aai i mea uma e manao i ai lou loto.
22E pei ona ‘aina o le sevi ma le aila, e faapea ona e ‘ai ai o na mea; o le ua leaga atoa ma le ua mamā la te aai ai.
23A o le toto, aua lava e te ‘ai ai; auā o le toto o le ola lava lea; aua e te ‘ai le ola faatasi ma le tino.
24Aua e te ‘ai ai; e te sasaaina lea i le eleele e pei o le suāvai.
25E te le ‘ai ai lava; ina ia manuia ai oe ma au fanau pe a mavae atu oe, pe a e faia le mea tonu i luma o Ieova.
26A o au mea paia o ia te oe, ma au mea ua e tauto ai, ia e ave, ma e alu i le mea e filifilia e Ieova.
27Ia e osia au taulaga mu, o tufaaga ma le toto, i luga o le fata faitaulaga o Ieova lou Atua; o le toto foi o au taulaga ia e sasaa i luga o le fata faitaulaga o Ieova lou Atua, a o tufaaga e te ‘ai ai.
28Ia e anaana mai, ma e faalogo mai i nei upu uma ou te fai atu ai ia te oe, ina ia manuia ai oe ma au fanau pe a mavae atu oe, e oo i le faavavau, pe a e faia le mea lelei ma le tonu i luma o Ieova lou Atua.
29A faaumatia i ou luma e Ieova lou Atua o ia nuu e te alu i ai e fai mou, a e fai mou lava, ma e nofo i o latou nuu;
30ia oe, ne‘i maileia oe i lou mulimuli atu ia te i latou, pe a faaumatia i latou i ou luma; aua foi ne‘i e saili atu i o latou atua, o loo faapea ane, Pe faapefea ona auauna nuu nei i o latou atua? ou te faia faapea lava e a‘u.
31Aua lava ne‘i e faia faapea ia Ieova lou Atua; auā o mea uma e inosia e Ieova, o loo inosia lava e ia, ua latou faia i o latou atua; auā ua latou susunu i le afi o latou atalii ma o latou afafine e fai ma taulaga i o latou atua.
32O mea uma lava ou te fai atu ai ia te outou, ia outou tausiusi i ai e fai; aua ne‘i e faaopoopo i ai se mea, aua foi ne‘i e ave ese ai se mea.
Who We AreWhat We EelieveWhat We Do
2025 by iamachristian.org,Inc All rights reserved.
