I TUPU, 10 - Samoan Old Version Bible

O LE MATAUPU X.Ua sau le tupu fafine o Seepa ia Solomona; o lana aloa ma lona poto.

1Ua faalogo le tupu fafine o Seepa i le tala ia Solomona ona o le suafa o Ieova, ona sau ai lea o ia e tofotofo ia te ia i upu faigata.

2Ua sau o ia i Ierusalema ma le au malaga e matuā toatele, ma kamela o au mai ai mea manogi, ma auro e matuā tele, ma maa tāua; na sau o ia ia Solomona, ona la tautalatala ai lea ma ia i mea uma na i ai i lona loto.

3Ua faamatalaina atu foi e Solomona ia te ia o ana upu uma; ua leai se mea e lilo i le tupu ua ia le ta‘u atu ia te ia.

4Ua iloa e le tupu fafine o Seepa o le poto uma o Solomona,

5ma le fale ua ia faia, ma mea e ‘ai o i lana laulau, ma ona nonofo o ana auauna, ma ona tutū o ana tautua, ma o latou ofu, ma ana tautu uaina, ma le ala na ia alu ae ai i le fale o Ieova; ona le toe ai lea o se loto ia te ia,

6Ona faapea lea o ia i le tupu, Ua moni le tala na ou faalogo ai i lo‘u nuu i au afioga, ma lou poto.

7A e peitai na ou le talia ia tala seia ou sau, ma vaavaai i ai o‘u mata. Faauta, e itiiti mea na talaina atu ia te au, a e tele mea na le talaina atu; ua sili lava lou poto, ma lou manuia i le tala na ou faalogo i ai.

8Amuia ou tagata, amuia foi au auauna nei, o e tutū i ou luma e le aunoa, ma faalogo i lou poto.

9Ia faafetaia Ieova lou Atua, o le na finagalo ia te oe e faanofo ia te oe i le nofoālii o Isaraelu; auā ua alofa Ieova ia Isaraelu e lei aunoa, ua na fai ai oe ma tupu, ina ia e faia faamasinoga ma mea tonu.

10Ua foai mai e ia i le tupu o auro e tasi le selau ma le luafulu o taleni, ma mea manogi e matuā tele lava, ma maa tāua; ua le toe aumaia ni mea manogi e tusa ona tele ma mea na foaiina mai e le tupu fafine o Seepa i le tupu o Solomona.

11O le fua foi o Hiramo na au mai ai auro mai Ofeira; ua au mai ai foi mai Ofeira o laau o alemuka e matuā tele, ma maa tāua.

12Ua faia e le tupu i laau o alemuka o pou mo le fale o Ieova, ma le fale o le tupu, o kitara foi, ma napeli mo le au pepese; e lei toe aumaia ni laau o alemuka faapea, e lei toe iloa foi ua oo i ona po nei.

13Ua foai atu e le tupu o Solomona i le tupu fafine o Seepa o mea uma na ia finagalo ma faatoga i ai, e faaopoopoina i mea na foaifuaina atu e le tupu o Solomona ia te ia. Ona foi atu lea o ia, ma alu atu i lona nuu, o ia ma ana auauna.

14O le fua o le mamafa o auro na aumaia ia Solomona i tausaga taitasi, o taleni o auro e ono selau ma le onogafulu ma le ono;

15atoa foi ma auro a e ua feoai e fāatau, atoa ma e faatauoa, ma tupu uma o Arapi, ma alii e pule i le nuu.

16Ua faia e le tupu o Solomona o talipupuni auro ua faasalalafaina e lua selau, e taiono selau o sekeli o auro i tali pupuni;

17ma talita auro ua faasalalafaina e tolu selau; e taitolu mina o auro i talita; na tuuina atu ia e le tupu i le fale o le vao o Lepanona.

18Ua faia foi e le tupu o le nofoālii tele i nifo o elefane, ua ia ufitia ai foi i le auro lelei.

19E ono tulagāvae faaapefai e alu ae ai i le nofoālii, ua faaofuofu foi i luga o le nofoālii i lona itu i tua; sa i ai mea e faalagolago i ai i itu taitasi o le mea e tietie ai; ua tutū foi leona e lua i tafatafa o mea e faalagolago i ai.

20Sa tutū ai foi leona e sefulu ma le lua i lea itu ma lea itu o tulagavae faaapefai e ono; e leai se mea e faapea ona fai i se tasi malo.

21O ipu inu uma a le tupu o Solomona o auro ia, ma ipu uma o le fale o le vao o Lepanona o auro lelei ia; e leai ni ipu ario; ua ta‘ufaatauvaaina lava ario i ona po o Solomona.

22Auā sa i ai i le tupu o vaa Tasesa i tai, faatasi ma vaa o Hiramo; na foi faatasi i tausaga e tolu o vaa Tasesa, ma au mai ai auro, ma ario, ma nifo o elefane, ma kofi, ma tuki.

23Na silisili le tupu o Solomona i tupu uma o le lalolagi i le mauoa ma le poto.

24Na sailiili atu ia Solomona salemausau uma ina ia latou faalogo i lona poto na tuuina e le Atua i lona loto.

25Na taitasi o i latou ma au mai ai lana mea alofa, o ipu ario, ma ipu auro, ma ofu, ma auupega, ma mea manogi, ma solofanua, ma falata, ilea tausaga ma lea tausaga.

26Ua faapotopoto e Solomona o kariota, ma ‘au e tietie i solofanua; sa ia te ia o kariota e tasi le afe ma le fa o selau, ma ‘au e tietie i solofanua e sefulu afe ma afe e lua; na ia tuuina i latou i aai o i ai kariota, i le ma Ierusalema foi e faatasi ai ma le tupu.

27Ua faateleina e le tupu i Ierusalema o ario ua faapei o maa; ua ia faateleina foi o arasi ua faapei o sukamoru i le fanua maulalo.

28Na aumaia solofanua mā Solomona mai Aikupito; na talia foi e le vao tagata faatau o le tupu o le vao solofanua i le tau.

29Na avae ma aumaia mai Aikupito se kariota i tupe e ono selau, ma se solofanua i le selau ma le limagafulu o tupe; sa faapea foi ona aumaia e i latou mā tupu uma o sa Hetī, ma tupu o Suria.