1Mulimuli ane ua tautala atu Iopu, ma fetuu i lona aso.
2Ua fai atu foi Iopu, ua faapea atu,
3Ia fano le aso na fanau mai ai a‘u, ma le po na fai ane ai, ua to le fafine, o le tama tane.
4Ia avea lena aso ma pouliuli, aua ne‘i suesueina e le Atua mai luga; aua ne‘i pupula i ai le malamalama.
5Ia toe maua e le pouliuli ma le ata o le oti, ia tumau i ona luga le ao, ia faamatautia i mea e pouliuli ai le aso.
6O lena po, ia faoa e le pouliuli tele, aua ne‘i olioli o ia faatasi ma aso o le tausaga, aua foi ne‘i oo o ia i le faitauina o masina.
7Faauta, ia vale lava lea po, aua ne‘i iai se pese fiafia.
8Ia faafanoina ia e i latou o e ua fetuuina aso, o e ua popoto e faaoso mai i leviatana.
9Ia faapouliuliina fetu o lona afiafi po, ia faatalitali i le malamalama, ae leai lava; aua foi ne‘i vaai atu ia i laumata o le taeao.
10Auā sa le punitia e ia o faitotoa o le manava o lo‘u tinā, ma ua le natia le tiga ia te au.
11Se a le mea na le oti ai a‘u ina o faatoa te‘a mai i le manava? Se a le mea na le to ai la‘u mānava ina o ou sau mai le manava?
12Se a le mea na talia ai a‘u i tulivae? Se a foi na talia ai a‘u e susu ou te susu ai?
13Auā po o pe na ua ou taoto ai ma le filemu, ma ou moe ai, ona ou malolo ai lea,
14faatasi ma tupu ma faipule o le lalolagi, o e na ati ae mo i latou o mea ua gaogao;
15po o faatasi ma alii sili, o e na iai auro, o e na faatutumuina o latou fale i ario;
16po o pei o se fanau le au ua natia, ua leai lava o a‘u; e pei o tama meamea ua le iloa le malamalama.
17O lea mea ua le toe iai le faasoesa o tagata amio leaga; o lea mea foi ua malolo ai e na lailoa.
18Ua fifilemu faatasi ai o e sa noanoatia, latou te le faalogologo i le leo o le ua faasaua.
19O iai i lea mea o tagatānuu atoa ma alii, ua saoloto ai foi le pologa nai lona alii.
20Se a le mea ua tuuina mai ai le malamalama i le ua tigaina, ma le ola i e ua faanoanoa o latou loto?
21O e ua faatalitali i le oti, a ua le oo mai; e tele foi ona eli i ai, a e itiiti i le oloa ua natia.
22O e ua matuā olioli, ma ua fiafia pe a maua e i latou le tuugamau.
23Se a le mea ua tuuina mai ai le malamalama i le tagata o le ua lilo lona ala, ua puipuia foi o ia e le Atua?
24Auā ua muai sau lo‘u maputiga ao lei ‘ai au, ma ua maligi mai o‘u faataio e pei o vai.
25Auā o le mea na ou matuā fefe ai, ua oo mai lea ia te au, ua oo mai foi ia te au le mea na ou mata‘u ai.
26Ua ou le filemu, ua ou le mapu foi, ua ou le malolo, a ua oo mai le atuatuvale.
Who We AreWhat We EelieveWhat We Do
2025 by iamachristian.org,Inc All rights reserved.
