1Ia e tausia le masina o Apipa, ia e fai ai le paseka ia Ieova lou Atua; auā o le masina o Apipa na au mai ai oe e Ieova lou Atua i le po nai Aikupito.
2Ia e fasia le paseka ia Ieova lou Atua, o mamoe ma povi, i le mea e filifilia e Ieova e tuu ai lona suafa.
3Aua e te ‘ai ai faatasi ma areto e faafefeteina; o aso e fitu e te ‘ai ai faatasi ma areto e le faafefeteina, o le areto o le tiga; auā na faataalise ona e sau nai le nuu o Aikupito; ina ia e manatua le aso na e sau ai nai le nuu o Aikupito i aso uma o lou olaga.
4Aua foi ne‘i iloa ia te oe sina mea e faafefeteina i lou nuu uma lava i ona aso e fitu; aua foi ne‘i faatotoe e oo i le taeao sina tufaaga o mea na e fai taulaga ai i le afiafi o le aso muamua.
5E le mafai ona e fasia le paseka i se tasi o au aai ua foaiina mai e Ieova lou Atua ia te oe;
6tau lava o le mea e filifilia e Ieova lou Atua e tuu ai lona suafa, o le mea lea e te fasi ai le paseka i le afiafi, i le goto o le la, i ona po na e sau ai nai Aikupito.
7Ia e tunu foi, ma e ‘ai ai i le mea e filifilia e Ieova lou Atua; a oo i le taeao ona e liliu lea, ma alu atu i ou fale ie.
8O aso e ono e te ‘ai ai areto e le faafefeteina; a o le aso fitu e fai ai le faapotopotoga ia Ieova lou Atua; aua e te faia ni galuega.
9Ia e faitauina ni vaiasosa e fitu; e afua ona e faitau o nā vaiasosa e fitu ina ua faatoa tuu atu le selesaito i le saito o tu.
10Ona e fai ai lea o le tausamiga o vaiasosa ia Ieova lou Atua, o le taulaga e te loto ina fai, e te avatua, e pei ona faamanuia oe e Ieova lou Atua;
11e te olioli foi i luma o Ieova lou Atua, i le mea e filifilia e Ieova lou Atua e tuu ai lona suafa, o oe, ma lou atalii, ma lou afafine, ma lau auauna tane, ma lau auauna fafine, ma le sa Levī o i lau aai, o le tagata ese foi, ma le ua āumatuā, ma le fafine ua oti lana tane, o ia te oe.
12Ia e manatua foi na fai oe ma auauna i Aikupito; ia e anaana foi e fai nei tulafono.
13Ia e fai le tausamiga o fale apitaga i ona aso e fitu, pe a uma ona faaputuina o au saito ma lau uaina;
14e te olioli foi i lau tausamiga, o oe, ma lou atalii, ma lou afafine, ma lau auauna tane, ma lau auauna fafine, ma le sa Levī, ma le tagata ese, ma le ua āumatuā, ma le fafine na oti lana tane o i lau aai.
15O aso e fitu e te fai ai le tausamiga ia Ieova lou Atua i le mea e filifilia e Ieova; auā e faamanuia oe e Ieova lou Atua i au mea uma e maua mai, ma mea uma e faia i ou lima, e te olioli ai lava.
16E ta‘i atu tolu i le tausaga ona iloa o tane uma lava o ia te oe i luma o Ieova lou Atua i le mea e filifilia e ia; o le tausamiga o areto e le faafefeteina, ma le tausamiga o vaiasosa, i le ma le tausamiga o fale apitaga; aua foi ne‘i iloa se isi i luma o Ieova ua leai sana mea.
17E taitasi le tagata e tusa ma mea ua ia te ia, e tusa ma le manuia ua foaiina mai e Ieova lou Atua ia te oe.
18Ia e tofia mo oe nisi e fai ma faamasino ma faipule i au aai uma, ua foaiina mai e Ieova lou Atua ia te oe, i ou itu aiga; latou te faamasino foi i le nuu ma le faamasinoga tonu.
19Aua e te faapioina le faamasinoga; aua e te faailogaina se tasi, aua foi e te talia se mea alofa; auā o le mea alofa e faatauaso a‘i mata o e popoto, e faaseseina ai foi o upu a e amiotonu.
20Ia e tausisi lava i le mea e matuā tonu, ina ia e ola ai, ma e fai mou le nuu ua foaiina mai e Ieova lou Atua ia te oe.
21Aua e te faatuina se tupua o Asaira, so se tasi laau e lata ane i le fata faitaulaga a Ieova lou Atua, e te faia mo oe.
22Aua foi e te faatuina mo oe se tupua, o le mea e inosia e Ieova lou Atua.
Who We AreWhat We EelieveWhat We Do
2025 by iamachristian.org,Inc All rights reserved.
